అక్షరటుడే, వెబ్డెస్క్: Chanakya Niti | జీవితంలో విజయం సాధించాలన్నా, సమాజంలో గౌరవంగా బతకాలన్నా కేవలం కష్టపడితే సరిపోదు, సరైన వ్యక్తిత్వాన్ని కూడా అలవరుచుకోవాలని ఆచార్య చాణక్యుడు తన ‘చాణక్య నీతి’లో పేర్కొన్నారు.
చాలామంది తాము చేసే పనుల వల్ల ఇతరులు ఏమనుకుంటారో అని అనవసరంగా భయపడుతూ, సిగ్గుపడుతూ ఉంటారు. ఇలాంటి సంకోచం మనిషి ఎదుగుదలకు ప్రధాన అడ్డంకి అని ఆయన హెచ్చరించారు. ముఖ్యంగా ఈ నాలుగు విషయాల్లో సిగ్గును వదిలేసిన వాడే జీవితంలో ఉన్నత శిఖరాలను అధిరోహిస్తాడని చాణక్యుడు వివరించారు.
Chanakya Niti | అభిప్రాయాలను చెప్పడం:
చాలామంది నలుగురిలో తమ మనసులోని మాటను చెప్పడానికి లేదా ఎవరైనా తప్పు చేస్తుంటే ప్రశ్నించడానికి వెనుకాడుతుంటారు. కానీ, చాణక్యుడి ప్రకారం.. మీ అభిప్రాయాన్ని ధైర్యంగా, స్పష్టంగా చెప్పడంలో అస్సలు సిగ్గుపడకూడదు. తన కోసం తాను మాట్లాడుకోలేని వ్యక్తి, ఇతరుల కోసం నిలబడలేడు. అటువంటి వారు జీవితంలో ఎప్పటికీ విజేతలుగా నిలవలేరు.
Chanakya Niti | ఆకలి విషయంలో:
ఆహారం అనేది ప్రాథమిక అవసరం. కొంతమంది పదిమందిలో ఉన్నప్పుడు లేదా ఇతరుల ఇంటికి వెళ్ళినప్పుడు సరిగ్గా తినడానికి సిగ్గుపడుతుంటారు. ఇలా ఆహారం విషయంలో మొహమాటపడే వ్యక్తి అనవసరంగా కష్టాలను కొని తెచ్చుకుంటాడు. ఆరోగ్యం బాగుంటేనే ఏదైనా సాధించగలం, కాబట్టి భోజనం విషయంలో ఎప్పుడూ సంకోచించకూడదని చాణక్యుడు సూచించారు.
ఆర్థిక లావాదేవీల విషయంలో:
అప్పు తీసుకోవడం అనేది మంచి పద్ధతి కాకపోయినా, అత్యవసర సమయాల్లో సహాయం కోరడంలో లేదా మీకు రావలసిన డబ్బును అడగడంలో అస్సలు సిగ్గుపడకూడదు. ముఖ్యంగా వ్యాపార లావాదేవీల్లో లేదా ఇచ్చిన అప్పును తిరిగి అడిగేటప్పుడు మొహమాటపడితే భారీ ఆర్థిక నష్టాలను ఎదుర్కోవాల్సి వస్తుంది. అయితే, తీసుకున్న అప్పును తిరిగి చెల్లించే సామర్థ్యం ఉన్నప్పుడే అడగాలని ఆయన స్పష్టం చేశారు.
జ్ఞానాన్ని సంపాదించడం:
విద్య నేర్చుకునేటప్పుడు లేదా ఏదైనా కొత్త విషయం తెలుసుకునేటప్పుడు సిగ్గుపడే వారు జీవితంలో అభివృద్ధి చెందలేరు. తెలియని విషయాన్ని అడిగి తెలుసుకోవడంలో తప్పు లేదు. సందేహాలను క్లియర్ చేసుకోకుండా అలాగే ఉండిపోతే జ్ఞానం వృద్ధి చెందదు. నేర్చుకోవాలనే తపన ఉన్నవారు ఎప్పుడూ వినయంగా ఉంటూ, ప్రశ్నలు అడిగి జ్ఞానాన్ని పెంచుకోవాలని చాణక్యుడు బోధించారు.
ఇది కూడా చదవండి: Tea Time Biscuits | టీతో బిస్కెట్లు తింటున్నారా.. అయితే ఈ షాకింగ్ నిజాలు తెలుసుకోవాల్సిందే!
