అక్షరటుడే, వెబ్డెస్క్: Nalgonda Budget 2026 | నల్గొండ నగర అభివృద్ధికి బాటలు పడుతున్నాయి. ఈ మేరకు భారీ బడ్జెట్ కేటాయిస్తూ మేయర్ బుర్రి చైతన్య శ్రీనివాస్ రెడ్డి రూ. 281.46 కోట్ల వార్షిక బడ్జెట్ను ప్రవేశపెట్టారు. ఈ బడ్జెట్లో ప్రధానంగా మౌలిక వసతుల అభివృద్ధికి పెద్దపీట వేయడం గమనార్హం. నల్గొండ నగరాన్ని వేగంగా అభివృద్ధి పథంలోకి తీసుకెళ్లేలా స్పష్టమైన ప్రణాళికతో బడ్జెట్ రూపొందించినట్లు స్థానిక ప్రజాప్రతినిధులు పేర్కొంటున్నారు.
Nalgonda Budget 2026 | రూ. 203.01 కోట్లు గ్రాంట్ల రూపంలో..
తాజా బడ్జెట్లో పన్నుల కంటే కూడా కేంద్ర, రాష్ట్ర ప్రభుత్వాల నుంచి వచ్చే గ్రాంట్లపైనే ఎక్కువగా ఆధారపడినట్లు తెలుస్తోంది. మొత్తంగా రూ. 203.01 కోట్లు గ్రాంట్ల రూపంలో లభించనున్నట్లు గణాంకాలు చూపారు. మురికివాడల అభివృద్ధికి ప్రత్యేక నిధులు కేటాయించారు. తద్వారా బలహీన వర్గాల జీవన ప్రమాణాలను మెరుగుపర్చే దిశగా చర్యలు చేపట్టబోతున్నట్లు మేయర్ తెలిపారు.
Nalgonda Budget 2026 | జీతాలు, విద్యుత్ బిల్లులు..
తాగునీటి సరఫరా, పారిశుద్ధ్యం, మొక్కల పెంపకం వంటి కార్యక్రమాలను నగర అభివృద్ధికి కీలకంగా గుర్తించి వాటికి అధిక ప్రాధాన్యం ఇచ్చారు. మరోవైపు జీతాలు, విద్యుత్ బిల్లుల వంటి ఖర్చుల కోసం రూ. 40 కోట్ల వరకు కేటాయించారు.
నగరాన్ని సుందరంగా తీర్చిదిద్దేందుకు ప్రాధాన్యం ఇస్తున్నారు. ఇందుకోసం మార్కెట్లు, కొత్త పార్కులు, పార్కింగ్ సదుపాయాలను అభివృద్ధి చేయాలని ప్రణాళిక రూపొందించారు. దీనికితోడు వార్డుల వారీగా అభివృద్ధి పనుల కోసం రూ. 18.45 కోట్లు కేటాయించారు.
