అక్షరటుడే, వెబ్డెస్క్: FIIs Stock Market Sale | దేశీయ స్టాక్ మార్కెట్ గత ఏడాదిన్నరగా తీవ్ర ఒడిదుడుకులకు లోనవుతోంది. అమెరికా అధ్యక్షుడిగా డొనాల్డ్ ట్రంప్ (Donald Trump) రెండో పర్యాయం అధికారంలోకి వచ్చినప్పటినుంచి పతనం ప్రారంభమైంది. వివిధ దేశాలపై ప్రతీకార సుంకాలను విధించడంతో సూచీలు పతనమయ్యాయి.
వాటి ప్రభావంనుంచి మార్కెట్లు ఇప్పుడిప్పుడే కోలుకుంటున్నాయి. అయితే గతనెలలో ఇరాన్పై అమెరికా దాడితో మళ్లీ అనిశ్చిత పరిస్థితులు ఏర్పడి మార్కెట్లు తీవ్రంగా నష్టపోతున్నాయి. మార్చి నెల ఇన్వెస్టర్లకు చేదు అనుభవాన్ని మిగిల్చింది. సుమారు రూ. 50 లక్షల కోట్లకుపైనే సంపద హరించుకుపోయింది.
FIIs Stock Market Sale | డీఐఐలు కొంటున్నా ఆగని పతనం..
స్టాక్ మార్కెట్ (Stock Market)లో పతనాన్ని అడ్డుకోవడానికి దేశీయ సంస్థాగత ఇన్వెస్టర్లు తీవ్రంగా ప్రయత్నిస్తున్నారు. మార్చిలో నికరంగా రూ. 1,42,960 లక్షల కోట్ల విలువైన స్టాక్ కొనుగోలు చేశారు. అయితే ఫారిన్ ఇన్స్టిట్యూషనల్ ఇన్వెస్టర్లు మాత్రం రేపన్నదే లేదన్నట్లుగా అమ్మకాలకు పాల్పడుతూనే ఉన్నారు. వారు ఒక్క మార్చి నెలలోనే నికరంగా రూ. 1,22,540 లక్షల కోట్ల విలువైన స్టాక్స్ అమ్మేశారు.
FIIs Stock Market Sale | కొవిడ్ క్రాష్కు మించి..
ఇరాన్ తో ఇజ్రాయెల్, అమెరికా చేస్తున్న యుద్ధం నేపథ్యంలో క్రూడాయిల్ (Crude oil) ధరలు విపరీతంగా పెరుగుతుండడం, డాలర్ బలపడుతుండడంతో ఇన్వెస్టర్ల సెంటిమెంట్ దెబ్బతింది. విదేశీ సంస్ధాగత పెట్టుబడిదారులు తమ పెట్టుబడుల్ని పెద్ద మొత్తంలో ఉపసంహరించుకుంటుండడంతో రిటైల్ ఇన్వెస్టర్ల సెంటిమెంట్ బలహీనపడి వారూ భారీగా అమ్మకాలకు పాల్పడుతున్నారు. ఎఫ్ఐఐలు కొవిడ్ క్రాష్కు మించి ప్రస్తుత యుద్ధ పరిస్థితుల్లో అమ్మకాలకు పాల్పడుతున్నారు. కోవిడ్ సమయంలో 2020 మార్చిలో ఎఫ్ ఐఐలు నికరంగా రూ. 65,816 కోట్ల విలువైన స్టాక్స్ విక్రయించారు. ప్రస్తుత మార్చిలో ఇది దాదాపు రెట్టింపు కావడం గమనార్హం. పశ్చిమాసియాలో ఉద్రిక్తతల కారణంగా క్రూడాయిల్ ధరలు పెరగడం, దీని ప్రభావంతో ద్రవ్యోల్బణం పెరిగే అవకాశాలు ఉండడం, రూపాయి విలువ భారీగా పతనమవుతుండడం వంటి అంశాలూ ఎఫ్ఐఐల అమ్మకాలకు కారణమవుతున్నాయి.
FIIs Stock Market Sale | పది శాతానికిపైగా పడిపోయిన సెన్సెక్స్, నిఫ్టీ..
యుద్ధం కారణంగా దేశీయ స్టాక్ మార్కెట్ (Domestic Stock Market) మార్చిలో పది శాతానికిపైగా పతనమయ్యింది. మార్చి ప్రారంభంలో 80,238 పాయింట్ల వద్ద ఉన్న సెన్సెక్స్.. నెలాఖరుకు వచ్చేసరికి 71,947 పాయింట్లకు పడిపోయింది. నెలరోజుల్లో 8,291 పాయింట్లు కోల్పోయింది. ఇదే సమయంలో నిఫ్టీ సైతం భారీగా నష్టపోయింది. మార్చిలో 24,865 పాయింట్లనుంచి 22,331 పాయింట్లకు తగ్గింది. ఒక్క నెలరోజుల్లోనే నిఫ్టీ 2,534 పాయింట్లు తగ్గడం గమనార్హం.
ఇది కూడా చదవండి..: Ganji Drinks | వేసవి తాపాన్ని తరిమికొట్టే అమృతం ‘గంజి’.. ఏ గంజితో ఎలాంటి లాభాలు అంటే!
