అక్షరటుడే, వెబ్డెస్క్: Peacock Snake Venom | నెమలి అంటే మనకు వెంటనే గుర్తొచ్చేది దాని అందమైన పింఛం. కానీ, ఈ అందమైన పక్షి వెనుక ఒక భయంకరమైన వేటగాడు ఉన్నాడనే విషయం చాలామందికి తెలియదు.
ప్రాణాంతక విష సర్పాలను కూడా నెమలి అతి సులువుగా మట్టుబెడుతుంది. అయితే, అంతటి విషం కడుపులోకి వెళ్లినా నెమలికి ఏమీ కాదా? అది ప్రాణాలతో ఎలా ఉండగలుగుతుంది? దీని వెనుక ఉన్న శాస్త్రీయ రహస్యాలను వన్యప్రాణి నిపుణులు ఏం చెబుతున్నారో ఇప్పుడు తెలుసుకుందాం.
Peacock Snake Venom | విషాన్ని జీర్ణం చేసుకునే శక్తి:
నెమలి ఒక ‘సర్వభక్షకి’. అన్ని రకాల పదార్థాలు.. అంటే ఇది గింజలు, కీటకాలతో పాటు పాములను కూడా ఆహారంగా తీసుకుంటుంది. ప్రకృతి సిద్ధంగానే నెమలికి విషాన్ని తట్టుకునే సామర్థ్యం ఉంటుంది. పాము విషం అనేది ప్రాథమికంగా ఒక సంక్లిష్టమైన ప్రొటీన్ (Complex Protein). ఇది రక్తంలో కలిసినప్పుడే ప్రాణాపాయం కలిగిస్తుంది.
కానీ, పామును నెమలి తిన్నప్పుడు ఆ విషం నేరుగా దాని జీర్ణకోశంలోకి వెళ్తుంది. అక్కడ ఉండే జఠర రసాలు ఆ విషాన్ని విడగొట్టి జీర్ణం చేస్తాయి. అంటే విషం రక్తంలో కలవకుండానే కడుపులో ఆహారంలా మారిపోతుంది.
Peacock Snake Venom | నోటి గాయాలు లేకపోవడం:
పామును నెమలి మింగినప్పుడు దాని నోటిలో గానీ, గొంతులో గానీ, కడుపులో గానీ ఎలాంటి గాయాలు లేకపోతే అది పూర్తిగా సురక్షితం. ఒకవేళ పొరపాటున ఎక్కడైనా పుండు లేదా గాయం ఉండి, దాని ద్వారా విషం రక్తంలోకి ప్రవేశిస్తే మాత్రం నెమలి ప్రాణానికే ప్రమాదం.
అయితే, పక్షులలో మనుషుల్లాగా నోటి పూతలు రావడం చాలా అరుదు. అందుకే అవి పాములను తిన్నా చాలా ఆరోగ్యంగా, శక్తివంతంగా ఉండగలుగుతాయి.
పురాణాల్లోనూ ప్రత్యేక స్థానం:
పాములను వేటాడి, విషాన్ని సైతం జీర్ణం చేసుకోగల ఈ విలక్షణమైన శక్తి ఉండటం వల్లే మన సంస్కృతిలో నెమలిని అత్యంత పవిత్రమైన పక్షిగా భావిస్తారు. ప్రకృతి ప్రసాదించిన ఈ అద్భుతమైన రక్షణ కవచమే నెమలిని విష సర్పాల పాలిట సింహస్వప్నంగా మార్చింది.
పాము విషం రక్తంలోకి వెళ్లకుండా నేరుగా కడుపులోకి వెళ్లడం, అక్కడ అది జీర్ణమైపోవడమే నెమలి మనుగడకు అసలు కారణం. అందుకే విషపూరిత పాములను తిన్నా నెమలికి ఎలాంటి హాని కలగదు.
ఇది కూడా చదవండి: Karna | కర్ణ మరణం నుంచి కష్టాల వరకు.. ‘సవాలక్ష’ అనే పదం ఎలా వచ్చిందంటే!
