అక్షరటుడే, వెబ్డెస్క్ : 2 BHK Shops Auction | జీహెచ్ఎంసీ (GHMC) పరిధిలోని డబుల్ బెడ్ రూమ్ హౌసింగ్ కాలనీలలో ఉన్న 1,400కు పైగా దుకాణాల వేలం ప్రక్రియ ఏప్రిల్ 9 (గురువారం) నుంచి ప్రారంభం కానుంది. హైదరాబాద్ (Hyderabad), రంగారెడ్డి, మేడ్చల్-మల్కాజిగిరి, సంగారెడ్డి జిల్లాల్లోని 36 కాలనీల్లో ఉన్న దుకాణాలకు పలు దశల్లో వేలం నిర్వహించనున్నారు.
వేలంపాట కోసం కలెక్టర్లు ఇప్పటికే నోటిఫికేషన్లు జారీ చేశారు. మొదటి దశలో రంగారెడ్డి జిల్లాలోని 8 కాలనీలలోని 273 దుకాణాలకు ఏప్రిల్ 9, 10 తేదీలలో వేలంపాట నిర్వహించనున్నారు. ఆయా కాలనీల్లో ప్రజల అవసరాలను తీర్చడానికి, స్థానిక వ్యాపార కార్యకలాపాలను ప్రోత్సహించడానికి 60 నుంచి 400 చదరపు అడుగుల విస్తీర్ణంలో దుకాణాలను నిర్మించారు. ఆసక్తి గల బిడ్డర్లు ఉదయం 11 గంటలలోపు సంబంధిత ఆర్డీవో కార్యాలయంలో అవసరమైన ఎర్నెస్ట్ మనీ డిపాజిట్ (EMD) సమర్పించి వేలం కోసం నమోదు చేసుకోవచ్చు.
2 BHK Shops Auction | కాలనీల అభివృద్ధికి..
ఈ దుకాణాల వేలం ద్వారా వచ్చే ఆదాయాన్ని ఆయా కాలనీల అభివృద్ధి, నిర్వహణ కోసం వినియోగిస్తారు. ఈ నిధులను ఉమ్మడి ఖాతాల ద్వారా నిర్వహించడానికి, సహకార సంఘాల చట్టం కింద నివాసితుల సంక్షేమ సంఘాలు ఏర్పాటు చేస్తామని ప్రభుత్వం తెలిపింది. వేలం ద్వారా వచ్చిన ఆదాయాన్ని కార్పస్ ఫండ్గా నిర్వహిస్తారు. దాని ద్వారా వచ్చే ఆదాయం, నివాసితుల నుంచి వచ్చే నెలవారీ నిర్వహణ ఖర్చులను లైటింగ్, లిఫ్టులు, బోర్వెల్స్ వంటి ఉమ్మడి ప్రాంతాల నిర్వహణ కోసం వినియోగిస్తారు.
2 BHK Shops Auction | వేలం షెడ్యూల్
ఏప్రిల్ 9, 10 తేదీల్లో రంగారెడ్డి (Rangareddy) జిల్లాలోని 8 కాలనీల్లో , 273 దుకాణాలకు వేలం వేస్తారు. ఏప్రిల్ 15, 16 తేదీల్లో హైదరాబాద్ జిల్లాలో గల 10 కాలనీల్లో ఉన్న 77 దుకాణాలకు, 15 నుంచి17 తేదీల్లో మేడ్చల్–మల్కాజిగిరి జిల్లాలోని 12 కాలనీల్లో 892 దుకాణాలకు వేలం పాట నిర్వహిస్తారు. ఏప్రిల్ 15 నుంచి 18, 21తేదీల్లో సంగారెడ్డి జిల్లాలో గల 6 కాలనీలు, 372 దుకాణాలను వేలం వేస్తామని అధికారులు తెలిపారు.
దీనిని కూడా చదవండి : Illegal Water Motors | నల్లాకు మోటార్ పెడుతున్నారా.. జలమండలి కఠిన చర్యలు
