Gudivada Amarnath Jail Sentence | గుడివాడ అమర్‌నాథ్‌కు జైలు శిక్ష.. ఆత్మహత్యాయత్నం కేసులో రైల్వే కోర్టు తీర్పు

అక్షరటుడే, వెబ్​డెస్క్: Gudivada Amarnath Jail Sentence | మాజీ మంత్రి, వైఎస్సార్‌సీపీ నేత గుడివాడ అమర్‌నాథ్‌  (Gudivada Amarnath) ఆత్మహత్యాయత్నం కేసులో జైలు శిక్ష పడింది. విశాఖపట్నంలో జరిగిన నిరాహార దీక్షకు సంబంధించి నమోదైన కేసులో రైల్వే కోర్టు (Railway Court) ఆరు నెలల జైలు శిక్షతో పాటు రూ.5 వేల జరిమానా విధిస్తూ తీర్పు వెలువరించింది. ఈ మేరకు అదనపు చీఫ్ జ్యుడీషియల్ మెజిస్ట్రేట్ వరలక్ష్మి తీర్పు ఇచ్చారు.

Gudivada Amarnath Jail Sentence | అమర్‌నాథ్ ఆమరణ నిరాహార దీక్ష

ఈ కేసు 2016 ఏప్రిల్ నెలకు చెందినది కాగా, అప్పట్లో విశాఖపట్నంలో రైల్వే జోన్ సాధన కోసం జీవీఎంసీ గాంధీ విగ్రహం వద్ద అమర్‌నాథ్ ఆమరణ నిరాహార దీక్ష చేపట్టారు. దీక్ష కొనసాగుతున్న సమయంలో ఆయన ఆరోగ్యం క్షీణించడంతో వెంటనే కేజీహెచ్‌కి తరలించారు. అయితే ఈ ఘటన అనంతరం టూ టౌన్ పోలీసులు అమర్‌నాథ్‌పై ఆత్మహత్యాయత్నం నేరం కింద కేసు నమోదు చేశారు. విచారణ అనంతరం కోర్టు ఆయనపై ఆరోపణలు రుజువయ్యాయని నిర్ధారించి శిక్ష విధించింది.

Gudivada Amarnath Jail Sentence | రాజ‌కీయాల్లో హాట్ టాపిక్..

కోర్టు తీర్పుపై స్పందించిన అమర్‌నాథ్, ఈ నిర్ణయాన్ని హైకోర్టు (Highcourt)లో సవాలు చేయనున్నట్లు వెల్లడించారు. గుడివాడ అమర్‌నాథ్ రాజకీయాల్లో తన ప్రయాణాన్ని కాంగ్రెస్ పార్టీ (Congress Party)తో ప్రారంభించారు. 2006లో విశాఖపట్నంలో కార్పొరేటర్‌గా గెలిచి ప్రజా జీవనంలోకి అడుగుపెట్టారు. అనంతరం 2011లో కాంగ్రెస్ పార్టీకి రాజీనామా చేసి వైఎస్సార్‌సీపీలో చేరారు. ఆ పార్టీ తరఫున రాష్ట్ర అధికార ప్రతినిధిగా, అనకాపల్లి నియోజకవర్గ (Anakapalli Constituency) ఇంఛార్జ్‌గా బాధ్యతలు నిర్వహించారు. 2014లో అనకాపల్లి లోక్‌సభ స్థానం నుంచి పోటీ చేసి ఓడిపోయిన అమర్‌నాథ్, 2019లో అనకాపల్లి అసెంబ్లీ నియోజకవర్గం నుంచి ఎమ్మెల్యేగా గెలిచారు. అనంతరం వైఎస్ జగన్ మోహన్ రెడ్డి మంత్రివర్గంలో మంత్రి పదవి కూడా చేపట్టారు. అయితే 2024 ఎన్నికల్లో గాజువాక నుంచి పోటీ చేసి ఓటమి పాలయ్యారు. ప్రస్తుతం విశాఖపట్నం జిల్లా వైఎస్సార్‌సీపీ అధ్యక్షుడిగా కొనసాగుతున్నారు.

అమర్‌నాథ్ తండ్రి గుడివాడ గురునాథరావు ప్రముఖ రాజకీయ నాయకుడు. ఆయన ఎమ్మెల్యేగా, ఎంపీగా సేవలందించారు. 1989లో పెందుర్తి నుంచి ఎమ్మెల్యేగా గెలిచిన గురునాథరావు, రాష్ట్ర సాంకేతిక విద్యాశాఖ మంత్రిగా పనిచేశారు. అలాగే 1998లో అనకాపల్లి నుంచి ఎంపీగా గెలుపొందారు. మొత్తంగా, ఒక దశాబ్దం కిందట జరిగిన నిరాహార దీక్ష కేసులో ఇప్పుడు వచ్చిన ఈ తీర్పు రాజకీయ వర్గాల్లో చర్చనీయాంశంగా మారింది.

ఇది కూడా చదవండి..: Income Tax Appointment | ఆదాయ పన్ను శాఖ ఏపీ, తెలంగాణ ప్రిన్సిపల్ చీఫ్‌ కమిషనర్‌గా సురేశ్‌ బత్తిని