Mohan Bhagwat RSS | హిందువులను సంఘటితం చేయడానికే ఆర్​ఎస్​ఎస్ ఏర్పాటు ​: మోహన్​ భగవత్​

అక్షరటుడే, వెబ్​డెస్క్ : Mohan Bhagwat RSS | నిజామాబాద్​ జిల్లా కందకుర్తి (Kandakuthi)లోని కేశవ స్ఫూర్తి మందిరాన్ని ఆర్​ఎస్​ఎస్​ చీఫ్ (RSS Chief)​ మోహన్​ భగవత్​ శనివారం ప్రారంభించారు. అనంతరం మందిరాన్ని సందర్శించారు. ఈ సందర్భంగా సందర్శకుల బుక్​లో​ సందేశాన్ని రాశారు.

ఆర్​ఎస్​ఎస్​ చీఫ్​ మాట్లాడుతూ.. హెడ్గేవార్ (Hedgewar)​ జననం, మరణం నాగ్​పూర్​లోనే జరిగిందన్నారు. అయితే ఆయన పూర్వికులు కందకుర్తికి చెందిన వారని చెప్పారు. దీంతో ఇక్కడ స్ఫూర్తి కేంద్రం నిర్మించాలని యోచించామన్నారు. కందకుర్తి ప్రాశస్త్యం తనకు ఈ రోజు తెలిసిందన్నారు.

Mohan Bhagwat RSS | హిందూ సమాజాన్ని జాగృతం చేయడానికి..

గరుడ్మంతుడు స్వర్గానికి వెళ్లి అమృతం తెచ్చి తన తల్లిని బానిసత్వం నుంచి విముక్తి చేశారని మోహన్​ భగవత్​ తెలిపారు. అనంతరం ఆ అమృతాన్ని తిరిగి తీసుకెళ్లి ఇంద్రుడికి ఇచ్చారని చెప్పారు. తన కోసం అమృతం తేలేదని, తల్లిని బానిసత్వం నుంచి విడిపించాడనికి తెచ్చాడని చెప్పారు. హెడ్గేవార్ ​సైతం తల్లి భారతమాతను దాస్య శృంఖాలల నుంచి విడిపించడానికి ఆర్​ఎస్ఎస్​ను ఏర్పాటు చేశారన్నారు. బ్రిటిష్​ వాళ్లకంటే ముందు ఎంతో మందిని విదేశీయులు భారత్​ను పాలించారన్నారు. హిందువులు ఏకంగా లేకపోవడంతోనే ఇది జరిగిందన్నారు. భవిష్యత్​లో సైతం హిందూ సమాజం జాగృతం కాకపోతే బానిసత్వం తప్పదని ఆయన భావించారని చెప్పారు. దీంతో హిందువుల్లో చైతన్యం కోసం ఆర్​ఎస్ఎస్​ను స్థాపించారని మోహన్​ భగవత్​ తెలిపారు.

Mohan Bhagwat RSS | ఇక్కడి నుంచే…

హిందూ సమాజాన్ని ఆదర్శంగా మార్చడానికి హెడ్గేవార్​ సంస్థను ఏర్పాటు చేశారన్నారు. నేడు ఆయన చూపిన మార్గంలో ఎంతోమంది నడుస్తున్నారని చెప్పారు. హెడ్గేవర్​కు కందకుర్తి నుంచి సేవా భావం, దేశ భక్తి వచ్చాయన్నారు. కందకుర్తిలోని మట్టిలో సైతం హెడ్గేవార్​ స్ఫూర్తి ఉందన్నారు. నేడు ఆయన చూపిన మార్గంలో స్ఫూర్తి మందిరం ఏర్పాటు చేసుకున్నామని, భవిష్యత్​లో ఆయన ఆశయ సాధనకు ముందుకు సాగాలని సూచించారు.

Mohan Bhagwat RSS | పట్టిష్టమైన పోలీసు భద్రత..

మోహన్​ భగవత్ పర్యటన సందర్భంగా పోలీస్​శాఖ పటిష్టమైన భద్రత ఏర్పాట్లు చేసింది. కేంద్ర పారా మిలటరీ, రాష్ట్రస్థాయి బలగాలు, 6 క్యూఆర్టీ బృందాలు, సీసీ కెమెరాలు ఏర్పాటు చేశారు. సీపీ సాయిచైతన్య ఏర్పాట్లను దగ్గరుంచి పర్యవేక్షించారు. ఎంపీ అర్వింద్​, ఎమ్మెల్యేలు సుదర్శన్​రెడ్డి, ధన్​పాల్​ సూర్యనారాయణ, రాకేష్​రెడ్డి, వెంకట రమణారెడ్డి, రామారావు పటేల్​, కందకుర్తి సర్పంచ్​ గియాజుద్దీన్, ఆర్​ఎస్​ఎస్​ ప్రముఖులు పాల్గొన్నారు.

Mohan Bhagwat RSS | సన్మానాలు

స్మృతి వనం నిర్మాణంలో కీలకంగా వ్యవహరించిన అందరిని సన్మానించారు. సహకరించిన దాతలు, నిర్మాణంలో సాయం చేసిన వారు, స్థపతి, డిజైన్​ చేసిన వారు, నిర్మాణ పనులు చేపట్టిన మేస్త్రీలను ఆర్​ఎస్​ఎస్​ చీఫ్​ మోహన్​ భగవత్​ సన్మానించారు.

ఇది కూడా చదవండి : Geo Special Technology | తెలంగాణ అభివృద్ధిలో జియో స్పెషల్​ టెక్నాలజీస్​ కీలకపాత్ర..