అక్షరటుడే, వెబ్డెస్క్ : Noida Workers Protest | జీతాలు పెంచాలని కార్మికులు చేపట్టిన ఆందోళన హింసాత్మకంగా మారింది. కార్మికులు ఆఫీసు అద్దాలు ధ్వంసం చేశారు. వాహనాలకు నిప్పు పెట్టారు. ఈ ఘటన ఢిల్లీలోని నోయిడా సెక్టార్ 2 (Noida Sector 2)లో చోటు చేసుకుంది.
నోయిడాలో ఫ్యాక్టరీ కార్మికులు (Factory Workers) చేపట్టిన నిరసన హింసాత్మకంగా మారింది. పోలీసులు పరిస్థితిని అదుపులోకి తెచ్చేందుకు యత్నించగా.. ఆందోళనకారులు వాహనాలను ధ్వంసం చేస్తూ, రాళ్లు విసిరారు. అనేక ఫ్యాక్టరీలు ఉన్న నోయిడా ఫేజ్ 2లో నిరసన చేస్తున్న కార్మికులు ఒక పోలీస్ వ్యాన్ను, ఇతర వాహనాలను ధ్వంసం చేశారు. జీతాల పెంపు, ఇతర ప్రయోజనాలు కల్పించాలని డిమాండ్ చేస్తూ కార్మికులు ఆందోళన చేస్తున్నారు. దీంతో పోలీసులు భారీగా మోహరించారు. ఆందోళనలతో సోమవారం ఉదయం నోయిడాలోని ప్రధాన రహదారులపై ట్రాఫిక్ జామ్ అయింది.
Noida Workers Protest | కార్మికులకు హక్కులు దక్కాలి
కార్మికులకు వారి హక్కులు దక్కాలని, పరిశ్రమలు కార్మిక చట్టాలను పాటించాలని ఉత్తరప్రదేశ్ ముఖ్యమంత్రి యోగి ఆదిత్యనాథ్ (UP CM Yogi Adityanath) అన్నారు. కార్మికులను రెచ్చగొట్టడానికి ప్రయత్నిస్తున్న సంఘ విద్రోహ శక్తులపై కఠిన చర్యలు తీసుకోవాలని ఆదేశించారు. కొన్ని రోజులుగా ఫ్యాక్టరీ కార్మికులు వేతన పెంపు, మెరుగైన పని పరిస్థితులు కల్పించాలని డిమాండ్ చేస్తున్నారు. నైపుణ్యం లేని కార్మికులకు కనీస వేతనాన్ని నెలకు రూ.11,274 నుంచి రూ.15,220కి పెంచుతున్నట్లు హర్యానా ప్రభుత్వం (Haryana Government) ప్రకటించిన తర్వాత ఈ నిరసనలు ప్రారంభమయ్యాయి. హర్యానాలో తమ సమకాలీకులకు అదే పనికి ఎక్కువ వేతనం లభిస్తోందని వాదిస్తూ, ఉత్తర ప్రదేశ్ ప్రభుత్వం కూడా కనీస వేతనాలను పెంచాలని నోయిడాలోని కార్మికులు ఇప్పుడు డిమాండ్ చేస్తున్నారు.
Noida Workers Protest | సంయమనం పాటించాలి
నిరసన జరుగుతున్న ప్రదేశానికి ఉన్నతాధికారులను పంపినట్లు నోయిడా పోలీసులు తెలిపారు. తాము కార్మికులతో మాట్లాడుతున్నామని, సంయమనం పాటించాలని కోరారు. పరిస్థితిని అదుపులో ఉంచడానికి కనీస బలప్రయోగం చేస్తున్నామని, వదంతులను నమ్మవద్దని విజ్ఞప్తి చేశారు. ప్రతి కార్మికుడికి గౌరవప్రదమైన జీతం, సురక్షితమైన పని వాతావరణం, ప్రాథమిక సౌకర్యాలు లభించాలని ముఖ్యమంత్రి యోగి ఆదిత్యనాథ్ అన్నారు. స్థానిక అధికారులు, పారిశ్రామిక యూనిట్లతో చర్చలు జరపాలని రాష్ట్ర కార్మిక శాఖను సీఎం ఆదేశించారు.
ఇది కూడా చదవండి..: Vijay Campaign Incident | అభిమానుల పూలవర్షం.. పారిపోయిన టీవీకే చీఫ్ విజయ్
