అక్షరటుడే, వెబ్డెస్క్: Iran US Tensions | ఇరాన్–అమెరికా దేశాల మధ్య ఉద్రిక్తతలు మరింత తీవ్రమయ్యే ప్రమాదం ఉందని ఐక్యరాజ్యసమితి మానవహక్కుల ప్రతినిధి వోల్కర్ టుర్క్ ఆందోళన వ్యక్తం చేశారు. ఇరాన్పై యూఎస్ సైనిక చర్య ముప్పు కొనసాగుతున్న నేపథ్యంలో ప్రాంతీయ స్థాయిలో ఉద్రిక్తతలు పెరిగే అవకాశంపై వోల్కర్ తీవ్ర ఆందోళన వ్యక్తం చేసినట్లు ఏఎఫ్పీ వెల్లడించింది.
Iran US Tensions |యూఎస్ ప్రతినిధుల అసంతృప్తి
ఇరాన్, మధ్యవర్తి ఒమన్ దేశాలు జెనీవాలో చర్చలు సానుకూలంగా జరిగాయని, మంచి పురోగతి ఉందని తెలిపినా… అమెరికా ప్రతినిధులు మాత్రం అంత సంతృప్తిగా లేనట్లు సమాచారం. స్టీవ్ విట్కాఫ్, జారెడ్ కుష్నర్ తో కూడిన యూఎస్ ప్రతినిధులు అసంతృప్తిగా జెనీవా వీడినట్లు బ్లూమ్బర్గ్ పేర్కొంది.
Iran US Tensions | ఇరాన్ క్షిపణులు..
ఇక, యూఎస్ అధ్యక్షుడు డొనాల్డ్ ట్రంప్ తన స్టేట్ ఆఫ్ ది యూనియన్ ప్రసంగంలో అమెరికాను లక్ష్యంగా చేసుకునే ఇరాన్ క్షిపణులను అభివృద్ధి చేస్తోందని చేసిన ఆరోపణలకు ఆధారాలు లేవని రాయిటర్స్ వర్గాలు పేర్కొన్నాయి. ఇరాన్ను ‘ప్రపంచంలో నంబర్ వన్ ఉగ్రవాదానికి మద్దతుదారు’గా చెబుతూ.. అణ్వాయుధాలు కలిగి ఉండనివ్వమని ట్రంప్ హెచ్చరించారు.
Iran US Tensions | మళ్లీ వియన్నాలో..
జెనీవా చర్చలు విఫలం అయ్యాయి. ఇక తదుపరి చర్చలు వియన్నాలో వచ్చే వారం జరగనున్నట్లు ఒమన్ విదేశాంగ మంత్రి సయ్యద్ బదర్ అల్బుసైదీ తెలిపారు. ఐక్యరాజ్యసమితి అణు పర్యవేక్షణ సంస్థ అంతర్జాతీయ అణుశక్తి సంస్థ (IAEA) పాత్ర ఈ చర్చల్లో కీలకమవుతుందని విశ్లేషకులు పేర్కొంటున్నారు.
ఇరాన్ విదేశాంగ మంత్రి అబ్బాస్ అరఘ్చి మాట్లాడుతూ.. అణు, ఆంక్షల ఎత్తివేతలో సుదీర్ఘ చర్చలు జరిగినట్లు చెప్పారు. ఇక, ఇరాన్ యురేనియం శుద్ధికి ఒకే అనీ.. అంతర్జాతీయ ఆంక్షలు ఎత్తివేయాలని పట్టుబట్టినట్లు అసోసియేటెడ్ ప్రెస్ వెల్లడించింది.
యూఎస్ మాత్రం ఇరాన్ క్షిపణి, ప్రాంతీయ మిలిటెంట్ గుంపులకు మద్దతు అంశాలపైనా చర్చించాలని పట్టుబడుతోంది. ట్రంప్ గత వారం పక్షం రోజుల గడువు విధించారు. ఆలోగా ఒప్పందం కుదరకపోతే చర్యలు తప్పవని ట్రంప్ హెచ్చరించిన విషయం విదితమే.
ఇదిలా ఉంటే.. ఒమన్ విదేశాంగ మంత్రి బదర్ అల్బుసైదీ వాషింగ్టన్లో శుక్రవారం యూఎస్ ఉపాధ్యక్షుడిని కలిసే మీట్ అయ్యే అవకాశముంది. తాజా చర్చల నేపథ్యంలో తక్షణ ముప్పు కొంతవరకు తగ్గినప్పటికీ, పూర్తి స్థాయి ఒప్పందం కుదరడానికి ఇంకా సమయం పట్టొచ్చని విశ్లేషకులు భావిస్తున్నారు.
