అక్షరటుడే, వెబ్డెస్క్: HPV Vaccination Drive | హైదరాబాద్ నగరంలోని కింగ్ కోఠి హాస్పిటల్ (King Kothi Hospital)లో హెచ్పీవీ వ్యాక్సినేషన్ డ్రైవ్ను ఆరోగ్యశాఖ మంత్రి దామోదర్ రాజనర్సింహ ప్రారంభించారు. వ్యాక్సిన్ వేయించికున్న బాలికలకు ఆయన సర్టిఫికెట్లు ప్రధానం చేశారు.
మహిళల్లో గర్భాశయ క్యాన్సర్ నివారించేందుకు హెచ్పీవీ వ్యాక్సిన్ (HPV Vaccin) వేస్తున్న విషయం తెలిసిందే. నేటి నుంచి 3 నెలల వరకూ వ్యాక్సినేషన్ కార్యక్రమం కొనసాగనుంది. మొదటి నెల రోజుల వరకూ ప్రభుత్వ జనరల్ హాస్పిటళ్లు, ఏరియా హాస్పిటళ్లు, కమ్యునిటీ హెల్త్ సెంటర్లలో వ్యాక్సిన్లు అందుబాటులో ఉంటాయి. తర్వాత ప్రాథమిక ఆరోగ్య కేంద్రాల్లోనూ అందుబాటులోకి రానున్నాయి.
HPV Vaccination Drive | చారిత్రాత్మక ఘట్టం
మంత్రి దామోదర్ రాజనర్సింహ (Damodar Rajanarsimha) మాట్లాడుతూ.. ఈ రోజు ఆరోగ్య రంగంలో చారిత్రాత్మక ఘట్టం అన్నారు. ఆడబిడ్డల ఆరోగ్యాన్ని కాపాడేందుకు ఒక బృహత్తర కార్యక్రమానికి శ్రీకారం చుట్టినట్లు తెలిపారు. మారుతున్న జీవనశైలి, ఆహారపు అలవాట్లు, కాలుష్యం వంటి కారణాలతో దేశవ్యాప్తంగా క్యాన్సర్ విస్తరిస్తోందని చెప్పారు. రాష్ట్రంలో ఏటా 55 వేల నుంచి 60 వేల క్యాన్సర్ కేసులు నమోదవుతున్నాయని వెల్లడించారు.
HPV Vaccination Drive | సమగ్ర పాలసీ
క్యాన్సర్ మహమ్మారిని ఎదుర్కోవడానికి రాష్ట్ర ప్రభుత్వం ఒక సమగ్ర పాలసీని రూపొందించిందని మంత్రి తెలిపారు. ములుగు, ఆదిలాబాద్ (Adilabad) వంటి మారుమూల జిల్లాల్లో కూడా ఇప్పుడు కీమోథెరపీ సేవలను అందుబాటులోకి తీసుకొచ్చామని చెప్పారు. ప్రతి జిల్లాలో డే కేర్ క్యాన్సర్ సెంటర్లను ఏర్పాటు చేశామని తెలిపారు. క్యాన్సర్ చికిత్సా రంగంలో ప్రఖ్యాతిగాంచిన డాక్టర్ నోరి దత్తాత్రేయుడును సలహాదారుగా నియమించుకొని, ఆయన సూచనలతో వ్యాది కట్టడికి అనేక చర్యలు తీసుకుంటున్నట్లు వెల్లడించారు.
HPV Vaccination Drive | రెండో స్థానంలో..
దేశంలో మహిళల్లో వచ్చే క్యాన్సర్లలో సర్వైకల్ కేన్సర్ రెండో స్థానంలో ఉందని దామోదర్ రాజనర్సింహ తెలిపారు. రాష్ట్రంలో ఏటా సగటున 3,200 మంది మహిళలు దీని బారిన పడుతున్నారని చెప్పారు. ముందస్తుగా నివారించగలిగే ఏకైక క్యాన్సర్ ఇదే అన్నారు. హ్యూమన్ పాపిలోమా అనే వైరస్తో ఇది వస్తుందన్నారు. ఆ వైరస్ను అంతం చేయడానికే… కేంద్ర ప్రభుత్వ సహకారంతో రాష్ట్రవ్యాప్తంగా HPV వ్యాక్సినేషన్ డ్రైవ్ ప్రారంభించినట్లు వెళ్లడించారు. ఇందులో భాగంగా 14 ఏళ్లు నిండి 15 ఏళ్లలోపు బాలికలందరికీ వ్యాక్సిన్ వేయనున్నట్లు తెలిపారు.
ఇది కూడా చదవండి..: Sharada Peeth Demolition Row | శారద పీఠాన్ని కూల్చడానికి కాంగ్రెస్ ప్రభుత్వం కుట్ర: హరీశ్ రావు
