అక్షరటుడే, వెబ్డెస్క్: Khamenei Death Protests | ఇరాన్ సుప్రీం నాయకుడు ఆయతుల్లా అలీ ఖమేనీ మరణం తర్వాత హైదరాబాద్లోని అమెరికా కాన్సులేట్ జనరల్లో, భారతదేశంలోని ఇతర ప్రాంతాలలోనూ నిరసనలు చెలరేగడంతో భద్రతను కట్టుదిట్టం చేశారు. అమెరికా, ఇజ్రాయెల్ సంయుక్తంగా నిర్వహించిన దాడుల్లో ఖమేనీ మరణించారు.
ఖమేనీ మరణం తర్వాత ఉత్తరప్రదేశ్లోని వివిధ జిల్లాలు, జమ్మూ కశ్మీర్లోని కొన్ని ప్రాంతాలు, లడఖ్లో నిరసనలు జరిగాయి. కర్ణాటక, మధ్యప్రదేశ్లోని భోపాల్లలోనూ ప్రజలు వీధుల్లోకి వచ్చారు.
కాగా, మధ్య ప్రాచ్యంలో పెరుగుతున్న ఘర్షణ దృష్ట్యా, ప్రధాని మోడీ రెండు రోజుల పర్యటన తర్వాత ఢిల్లీలో ఆదివారం రాత్రి అడుగుపెట్టారు. ఆ వెంటనే భద్రతా వ్యవహారాల క్యాబినెట్ కమిటీ (సీసీఎస్) సమావేశం ఏర్పాటు చేశారు.
ఇరాన్ లక్ష్యాలపై అమెరికా-ఇజ్రాయెల్ సమన్వయంతో దాడులు చేయడం, గల్ఫ్ అంతటా టెహ్రాన్ ప్రతీకార క్షిపణి, డ్రోన్ దాడుల తర్వాత అమెరికా – ఇరాన్ మధ్య పెరుగుతున్న వివాదం భారతదేశ విమానయాన రంగాన్ని, విదేశీ ప్రయాణికులను గణనీయంగా ప్రభావితం చేసింది.
ఇరాన్ – పశ్చిమాసియాలోని కొన్ని ప్రాంతాలపై గగనతల పరిమితుల కారణంగా ఫిబ్రవరి 28న 410 దేశీయ విమానాలను నిలిపివేశారు. ఆదివారం మరో 444 విమానాలను రద్దు చేయవచ్చని పౌర విమానయాన మంత్రిత్వ శాఖ (MoCA) వెల్లడించింది. గల్ఫ్ దేశాలకు విమానయాన సంస్థలు సేవలను నిలిపివేయడం, ప్రభావిత కారిడార్ల మీదుగా వెళ్లే విమానాలను దారి మళ్లించారు.
దుబాయ్, దోహా, మనామాతో సహా గల్ఫ్ నగరాల్లో తాజా పేలుళ్లు.. ఇరాన్, ఇజ్రాయెల్ – ఇరాక్లలో తాత్కాలిక గగనతల మూసివేతలతో ప్రపంచ విమానయానం అయోమయంలో పడింది.
బెంగళూరు, కోల్కతా, చెన్నై విమానాశ్రయాలలో అనేక మంది భారతీయ ప్రయాణికులు చిక్కుకుపోయారు. సౌదీ అరేబియాలో అంతరాయాలను ఎదుర్కొంటున్న ప్రయాణికుల కోసం రియాద్లోని భారత రాయబార కార్యాలయం 24×7 హెల్ప్లైన్ నంబరులను అందుబాటులో ఉంచింది.
ఎయిర్ ఇండియా, ఎయిర్ ఇండియా ఎక్స్ప్రెస్,ఇండిగో, ఎమిరేట్స్ వంటి విమానయాన సంస్థలు భద్రతా సమస్యలను పేర్కొంటూ రద్దు, దారి మళ్లింపులను ప్రకటించాయి.
Khamenei Death Protests | జమ్మూ కశ్మీర్ అంతటా నిరసనలు
ఇరాన్ సుప్రీం లీడర్ అయితోల్లా అలీ ఖమేనీ మరణాన్ని ధ్రువీకరించిన తర్వాత జమ్మూ కశ్మీర్లోని పలు ప్రాంతాలలో నిరసనలు చెలరేగాయి. వందలాది మంది కశ్మీరీ షియా ముస్లింలు ఖమేనీ చిత్రాలు, ఇరాన్కు మద్దతు ఇచ్చే బ్యానర్లను మోస్తూ వీధుల్లోకి వచ్చారు.
Khamenei Death Protests | యూఎస్-ఇరాన్ వివాదం భారత్పై ప్రభావం
యూఎస్, ఇజ్రాయెల్ ఇరానియన్ సైనిక , అణు-సంబంధిత ప్రదేశాలపై సమన్వయంతో వైమానిక దాడులు నిర్వహించాయి. ఇది ఈ ప్రాంతంలో తీవ్ర ఉద్రిక్తతకు దారితీసింది.
గల్ఫ్లోని కొన్ని ప్రాంతాలలో ఇజ్రాయెల్ నగరాలు, యూఎస్ సైనిక స్థావరాలు, సంస్థాపనలను లక్ష్యంగా చేసుకుని ఇరాన్ క్షిపణి, డ్రోన్ దాడులతో ప్రతీకారం తీర్చుకుంది. ఇజ్రాయెల్లో వైమానిక దాడి సైరన్లు వినిపించాయి. దుబాయ్, దోహాతో సహా గల్ఫ్ నగరాల్లో పేలుళ్లు వినిపించాయి.
