అక్షరటుడే, వెబ్డెస్క్ : Crude Oil Effect | పశ్చిమాసియాలో ఇప్పట్లో శాంతి నెలకొనే పరిస్థితి కనిపించడం లేదు. అమెరికా, ఇరాన్ల మధ్య పోరు కొనసాగుతుండడం, ఇరాన్ కీలకమైన హార్ముజ్ జలసంధి (Strait of Hormuz)ని మూసి వేయడంతో చమురు సరఫరా వ్యవస్థకు ఆటంకాలు ఏర్పడ్డాయి. పలు దేశాలు ముడి చమురు ఉత్పత్తిని నిలిపివేయడంతో క్రూడ్ ఆయిల్ ధరలకు రెక్కలొచ్చాయి.
ఒక్కరోజే సుమారు 30 శాతం వరకు పెరిగి బ్యారెల్ ధర 117 డాలర్లకు చేరింది. 2022 తర్వాత ఇదే అత్యధికం. బ్యారెల్కు 150 డాలర్ల వరకు పెరిగే అవకాశాలున్నాయన్న భయాలతో ఇన్వెస్టర్లు ఒత్తిడికి గురవుతున్నారు. క్రూడ్ ఆయిల్ ధర పెరుగుతుండడం, రూపాయి విలువ పతనమవుతుండడం, విదేశీ సంస్థాగత మదుపరులు పెట్టుబడులు ఉపసంహరిస్తూనే ఉండడంతో మన స్టాక్ మార్కెట్లు (Stock Markets) కోలుకోలేకపోతున్నాయి.
Crude Oil Effect | భారీ నష్టాలతో ప్రారంభమై..
దేశీయ స్టాక్ మార్కెట్ (Domestic Stock Market) సోమవారం భారీ నష్టాలతో ప్రారంభమైంది. సెన్సెక్స్ 1,862 పాయింట్ల నష్టంతో ప్రారంభమై మరో 632 పాయింట్లు పతనమైంది. అక్కడినుంచి 909 పాయింట్లు పైకి ఎగబాకింది. నిఫ్టీ 582 పాయింట్ల నష్టంతో ప్రారంభమై మరో 171 పాయింట్లు కోల్పోయింది. కనిష్టాల వద్ద కొనుగోళ్ల మద్దతు లభించడంతో 262 పాయింట్లు పెరిగింది.
Crude Oil Effect | 2024 తర్వాత అతిపెద్ద పతనం..
2024 జూన్ 4 తర్వాత దేశీయ స్టాక్ మార్కెట్లు రెండో అతిపెద్ద పతనాన్ని నమోదు చేశాయి. అప్పట్లో ప్రధాన సూచీలు 5.7 శాతం నష్టపోయాయి. లోక్సభ ఎన్నికలలో బీజేపీకి సంపూర్ణ మెజారిటీ రాకపోవడంతో సెన్సెక్స్ 4,390 పాయింట్లు, నిఫ్టీ 1,380 పాయింట్లు పడిపోయాయి. ఉదయం 11 గంటల ప్రాంతంలో సెన్సెక్స్ 1,915 పాయింట్ల నష్టంతో 77,003 వద్ద, నిఫ్టీ 610 పాయింట్ల నష్టంతో 23,840 వద్ద కదలాడుతున్నాయి.
Crude Oil Effect | అన్ని సెక్టార్లలో రక్తపాతం
అన్ని సెక్టార్ల స్టాక్స్ రక్తమోడుతున్నాయి. నిఫ్టీ (Nifty) ఆటో ఇండెక్స్ 4.77 శాతం, బ్యాంక్ నిఫ్టీ 4.18 శాతం, మెటల్ ఇండెక్స్ 3.67 శాతం, మీడియా 3.65 శాతం, ఫైనాన్షియల్ సర్వీసెస్ 3.61 శాతం, క్యాపిటల్ గూడ్స్ 3.27 శాతం నష్టపోగా.. ఆయిల్ అండ్ గ్యాస్, కన్జూమర్ డ్యూరెబుల్స్, రియాలిటీ, ఎఫ్ ఎంసీజీ, టెలికాం, పవర్, యుటిలిటీ, ఎనర్జీ ఇండెక్స్లు రెండు శాతానికిపైగా నష్టంతో ఉన్నాయి.
Crude Oil Effect | లాభాల్లో ఒకే ఒక్కటి..
బీఎస్ఈ సెన్సెక్స్లో ఒక స్టాక్ లాభాలతో ఉండగా.. 29 స్టాక్స్ నష్టాలతో ట్రేడ్ అవుతున్నాయి. హెచ్సీఎల్ టెక్ 0.43 శాతం లాభంతో ఉంది.
Top Losers : ఇండిగో 5.90 శాతం, ఎస్బీఐ 5.70 శాతం, మారుతి 4.61 శాతం, ఎంఅండ్ఎం 4.53 శాతం, ఆసియన్ పెయింట్ 4.50 శాతం నష్టాలతో ఉన్నాయి.
ఇది కూడా చదవండి..: Stock Market Crash | మళ్లీ కుప్పకూలిన మార్కెట్లు.. భారీ నష్టాలతో ముగిసిన సూచీలు
