అక్షరటుడే, వెబ్డెస్క్: Farooq Abdullah Attack | జమ్మూకశ్మీర్ (Jammu and Kashmir) రాజకీయాల్లో కీలక నేతగా గుర్తింపు పొందిన ఫరూఖ్ అబ్ధుల్లా (88)పై హత్యాయత్నం జరిగిన ఘటన కలకలం రేపింది. జమ్మూ నగరంలోని గ్రేటర్ కైలాష్ ప్రాంతంలో ఉన్న రాయల్ పార్క్ (Royal Park)లో నిర్వహించిన ఓ వివాహ వేడుకలో పాల్గొన్న సమయంలో ఈ ఘటన చోటుచేసుకుంది. అయితే భద్రతా సిబ్బంది అప్రమత్తతతో ఈ దాడి విఫలమై, ఫరూక్ అబ్దుల్లా త్రుటిలో ప్రాణాపాయం నుంచి బయటపడ్డారు.
Farooq Abdullah Attack | పాయింట్ బ్లాంక్ రేంజ్లో కాల్పులు
సమాచారం ప్రకారం, ఫరూక్ అబ్దుల్లా వేడుకలో పాల్గొంటున్న సమయంలో ఓ వ్యక్తి ఆయనకు అత్యంత సమీపంగా వెనుక నుంచి చేరుకున్నాడు. అతడు తుపాకీతో ఫరూక్ అబ్దుల్లాపై గురిపెట్టి పాయింట్ బ్లాంక్ రేంజ్లో కాల్పులు జరపబోయాడు. అయితే వెంటనే స్పందించిన జెడ్ ప్లస్ భద్రతలో భాగంగా ఉన్న నేషనల్ సెక్యూరిటీ గ్రాండ్ కమాండోలు దుండగుడిని పక్కకు నెట్టేశారు. దీంతో తూటా లక్ష్యాన్ని తప్పి ఫరూక్ అబ్దుల్లా సురక్షితంగా బయటపడ్డారు.
Farooq Abdullah Attack | ప్రమాదం తప్పింది..
ఈ సంఘటన అక్కడికక్కడే ఉద్రిక్తతకు దారి తీసింది. దాడి విఫలమైన వెంటనే అక్కడున్న ప్రజలు దుండగుడిని పట్టుకుని కొట్టారు. అనంతరం భద్రతా సిబ్బంది అతడిని అదుపులోకి తీసుకుని పోలీసులకు అప్పగించారు. ఈ ఘటనకు సంబంధించిన వీడియోలు ప్రస్తుతం బయటకు వచ్చి సోషల్ మీడియాలో వైరల్ అవుతున్నాయి. దుండగుడిని కమల్ సింగ్ జమ్వాల్ (65)గా గుర్తించారు. అతడు జమ్మూలోని పురానాస్ మండీ (Puranas Mandi) ప్రాంతానికి చెందిన వ్యక్తిగా పోలీసులు తెలిపారు. అరెస్టు అనంతరం కూడా అతడిలో ఎలాంటి పశ్చాత్తాపం కనిపించలేదని, ఈ క్షణం కోసం గత 20 సంవత్సరాలుగా ఎదురు చూస్తున్నానని చెప్పినట్లు సమాచారం.
ఈ ఘటనపై ఫరూక్ అబ్దుల్లా కుమారుడు, జమ్మూకశ్మీర్ ముఖ్యమంత్రి ఒమర్ అబ్ధుల్లా తీవ్రంగా స్పందించారు. ఇది కచ్చితంగా తన తండ్రిపై జరిగిన హత్యాయత్నమేనని ఆయన పేర్కొన్నారు. అల్లాహ్ దయవల్ల తన తండ్రి ప్రాణాపాయం నుంచి బయటపడ్డారని చెప్పారు. అదే సమయంలో భద్రతా వ్యవస్థపై ఆయన తీవ్ర ఆందోళన వ్యక్తం చేశారు. జెడ్ ప్లస్ భద్రతతో పాటు ప్రత్యేక కమాండోలు ఉన్న మాజీ ముఖ్యమంత్రికి ఇంత సమీపంలోకి ఆయుధంతో దుండగుడు ఎలా చేరుకున్నాడన్న ప్రశ్నకు సమాధానం కావాలని ఆయన డిమాండ్ చేశారు. ఈ ఘటన భద్రతా లోపాలను బయటపెట్టిందని ఆయన అభిప్రాయపడ్డారు.ఘటన సమయంలో ఫరూక్ అబ్దుల్లా వెంట జమ్మూకశ్మీర్ ఉప ముఖ్యమంత్రి సురేందర్ చౌదరి (Deputy CM Surender Chaudhary), ముఖ్యమంత్రి సలహాదారు నాసిర్ సోగామి కూడా ఉన్నారు. దేవుడి దయవల్ల అందరూ సురక్షితంగా బయటపడ్డారని నాసిర్ సోగామి తెలిపారు. దాడి వెనుక ఉద్దేశం ఏమిటన్నది ప్రస్తుతం చెప్పలేమని, దర్యాప్తు పూర్తయ్యాకే పూర్తి వివరాలు వెల్లడవుతాయని ఆయన అన్నారు.
ఇది కూడా చదవండి..: Monalisa Love Marriage | తండ్రిపై కేసు పెట్టి.. ప్రియుడిని పెళ్లి చేసుకున్న కుంభమేళా మోనాలిసా
