అక్షరటుడే, వెబ్డెస్క్ : Chandrababu Naidu Ratings | ఆంధ్రప్రదేశ్ (Andhra Pradesh) సచివాలయంలో జరిగిన కలెక్టర్ల సదస్సు రాజకీయ వర్గాల్లో చర్చకు దారితీసింది. ఈ సమావేశంలో ముఖ్యమంత్రి చంద్రబాబు నాయుడు మంత్రుల పనితీరుపై ప్రత్యేకంగా సమీక్ష నిర్వహించారు.
సాధారణంగా మంత్రుల పనితీరుపై మౌఖికంగా చర్చించే సమావేశాలకంటే భిన్నంగా, ఈసారి ప్రతి మంత్రి కార్యాలయంలో ఫైళ్ల పరిష్కారం ఎంత వేగంగా జరుగుతోందో గణాంకాల ఆధారంగా విశ్లేషించి రేటింగ్స్ ప్రకటించడం విశేషంగా మారింది. పాలనలో వేగం పెరగడంతో పాటు ప్రజలకు సేవలు త్వరగా అందేలా చేయడమే ఈ సమీక్ష ప్రధాన లక్ష్యమని సీఎం తెలిపారు. ఫైళ్లను పెండింగ్లో ఉంచడం వల్ల పరిపాలనలో జాప్యం జరుగుతుందని, నిర్ణయాలు ఆలస్యం అయితే ప్రజలకు ఇబ్బందులు ఎదురవుతాయని ఆయన సూచించారు.
Chandrababu Naidu Ratings | పవన్ కళ్యాణ్ స్థానం ఎంత?
సీఎం ప్రకటించిన నివేదిక ప్రకారం వ్యవసాయ శాఖ మంత్రి అచ్చెం నాయుడు ఫైళ్ల క్లియరెన్స్ విషయంలో అత్యంత వేగంగా పనిచేస్తూ మొదటి స్థానంలో నిలిచారు. ఆయన పనితీరును ముఖ్యమంత్రి ప్రత్యేకంగా ప్రశంసించినట్లు సమాచారం. శాఖలో వచ్చిన ఫైళ్లను త్వరగా పరిశీలించి నిర్ణయాలు తీసుకోవడం వల్ల పరిపాలన వేగంగా సాగుతోందని అభిప్రాయం వ్యక్తం చేశారు. ఈ జాబితాలో రెండో స్థానంలో మంత్రి నిమ్మల రామానాయుడు నిలిచారు. అనంతరం మంత్రి కొండపల్లి శ్రీనివాస్ మూడో స్థానంలో నిలిచినట్లు వెల్లడించారు. ఉపముఖ్యమంత్రి పవన్ కళ్యాణ్ (Deputy CM Pawan Kalyan) ఈ రేటింగ్స్లో నాలుగో స్థానాన్ని దక్కించుకోవడం కూడా ప్రాధాన్యతను సంతరించుకుంది.
Chandrababu Naidu Ratings | సమన్వయంతో పని చేయాలి
హోం శాఖ బాధ్యతలు నిర్వహిస్తున్న మంత్రి వంగలపూడి అనిత (Vangalapudi Anitha) ఫైళ్ల క్లియరెన్స్ విషయంలో చివరి స్థానంలో నిలిచినట్లు సీఎం పేర్కొన్నారు. ముఖ్యమైన శాఖల్లో ఫైళ్లు ఎక్కువకాలం పెండింగ్లో ఉండకూడదని, నిర్ణయాలను సమయానికి తీసుకోవాలని ఈ సందర్భంగా ఆయన సూచించారు. మంత్రులందరూ తమ శాఖల్లో ఫైళ్ల కదలికపై ప్రత్యేక దృష్టి పెట్టాలని సీఎం స్పష్టం చేశారు. ప్రజలకు సేవలు అందించడంలో జాప్యం అస్సలు సహించబోమని సుతిమెత్తగా హెచ్చరించారు. అధికారులు, మంత్రులు సమన్వయంతో పనిచేస్తేనే ప్రభుత్వ పథకాలు వేగంగా అమలు అవుతాయని కూడా ఆయన తెలిపారు. ఈ సమీక్షలో వెల్లడైన రేటింగ్స్ ప్రస్తుతం రాజకీయ వర్గాల్లో చర్చనీయాంశంగా మారాయి. పాలనలో పారదర్శకత, బాధ్యతను పెంచేందుకు సీఎం తీసుకున్న ఈ చర్యకు కొందరు ప్రశంసలు కురిపిస్తుండగా, మరికొందరు దీనిపై భిన్నాభిప్రాయాలు వ్యక్తం చేస్తున్నారు. మొత్తంగా ఈ సమీక్షతో మంత్రుల పనితీరు అంశం మరోసారి రాజకీయ చర్చకు కేంద్రబిందువైంది.
ఇది కూడా చదవండి..: YS Jagan Corruption Allegations | రాష్ట్రంలో భారీగా అవినీతి : వైఎస్ జగన్
