Musi Beautification Project | ఇళ్లు కూల్చకుండా మూసీ సుందరీకరణ చేయొచ్చు : కేటీఆర్​

అక్షరటుడే, వెబ్​డెస్క్ : Musi Beautification Project | మూసీ మురికి కూపంగా మారింది కాంగ్రెస్‌ హయాంలోనే అని బీఆర్​ఎస్​ వర్కింగ్ ప్రెసిడెంట్​ కేటీఆర్​ (KTR) అన్నారు. కేసీఆర్ ప్రభుత్వ హయాంలో మూసీ అభివృద్ధికి చేపట్టిన చర్యలపై హిమాయత్ సాగర్ వద్ద ఆయన పవర్‌పాయింట్ ప్రజెంటేషన్ ఇచ్చారు.

మూసీ విషయంలో గతంలో చేసిన పాపానికి కాంగ్రెస్‌ (Congress) పార్టీ చెంపలేసుకుని క్షమాపణలు చెప్పాలని కేటీఆర్​ డిమాండ్​ చేశారు. మూసీ ప్రాజెక్టు (Musi Project)తో వేలాది కుటుంబాలు ఆగమవుతున్నాయని ఆవేదన వ్యక్తం చేశారు. మూసీని ప్రక్షాళన చేసేందుకు బీఆర్‌ఎస్‌ మంచి ప్రణాళికలు సిద్ధం చేసిందని చెప్పారు. మంచి రేవుల నుంచి ఘట్కేసర్‌ వరకు 57కి.మీ. పరిధిలో మూసీ రూపం మార్చాలనుకున్నామని పేర్కొన్నారు. నదిపై 15 బ్రిడ్జ్‌లు నిర్మించాలని ప్లాన్‌ చేశామన్నారు.

Musi Beautification Project | ఆపమని చెప్పలేదు

మూసీ సుందరీకరణ ఆపమని రేవంత్ రెడ్డి (CM Revanth Reddy)కి ఎవరు చెప్పలేదని కేటీఆర్​ అన్నారు. కానీ పేదలను ఇబ్బంది పెట్టకుండా చేయమనే చెప్పామన్నారు. 2016–17 సంవత్సరంలో రూ.16,634 కోట్లతో మూసీ సుందరీకరణ చేసేందుకు, కేసీఆర్ హయాంలో మూసీ రివర్ డెవలప్మెంట్ కార్పొరేషన్ ఏర్పాటు చేశామని గుర్తు చేశారు. కానీ ఒక్క ఇల్లు కూడా కూల్చలేదన్నారు.

Musi Beautification Project | గాంధీ విగ్రహం కోసం..

గాంధీ మునిమనవడు కూడా గాంధీ విగ్రహం వద్దని చెప్తున్నారని మాజీ మంత్రి అన్నారు. మహాత్ముడి పేరు చెప్పి ఇండ్లు కూల్చి, ఆయనకు చెడ్డ పేరు తీసుకురావొద్దు అని తుషార్ గాంధీ చెప్పారన్నారు. మేధా పాట్కర్ లాంటి మేధావులు కూడా రేవంత్ రెడ్డి చర్యలకు అడ్డు చెప్తున్నారని విమర్శించారు. మూసీ ప్రాజెక్టు సుందరీకరణ కోసం చేస్తున్నారా, భూముల కోసం చేస్తున్నారా అని ప్రశ్నించారు.

Musi Beautification Project | నీళ్లను ఎక్కడ వదలాలి

ఎస్టీపీ (STP)లో ట్రీట్మెంట్ చేసిన నీళ్లను మూసీలోకి వదలొద్దని రేవంత్ రెడ్డి అంటున్నారని కేటీఆర్​ అన్నారు. ‘మూసీలోకి కాకుకండా మీ ఇంటి వెనక వదలాలా’ అని ప్రశ్నించారు. 54 నాలాలను ఒకదగ్గరికి తీసుకువచ్చి వాటిని ట్రీట్ చేసి.. మూసీలోకి వదులుతామని తెలిపారు. ఇది కూడా తెలియకుండా రేవంత్ రెడ్డి మున్సిపల్ మంత్రి ఎలా అయ్యారని ఎద్దేవా చేశారు.

మూసీ ప్రాజెక్టు కోసం కూలగొట్టే ఒక అపార్ట్‌మెంట్‌లో ముగ్గురు జర్నలిస్టులు ఉన్నారని, వారిని కాకా పట్టడానికి రేవంత్​రెడ్డి ప్రయత్నిస్తున్నారని చెప్పారు. ఆ అపార్ట్​మెంట్ పక్కనే వాళ్ళకి 7 ఎకరాలు ఇస్తానని, అందులో అంతకంటే మంచి అపార్ట్‌మెంట్‌లు కట్టిస్తాను చెబుతున్నారన్నారు. మరి హిమాయత్‌ సాగర్ (Himayath Sagar) లో బస్తీ ప్రజలకు కూడా పక్కనే స్థలం ఇస్తారా అని ప్రశ్నించారు.

దీనిని కూడా చదవండి : Telangana Heavy Rains | రైతులకు అలెర్ట్​.. రాష్ట్రానికి భారీ వర్ష సూచన