Moinabad Drugs Case | మొయినాబాద్​ డ్రగ్స్​ కేసు విచారణకు సిట్​ ఏర్పాటు

అక్షరటుడే, వెబ్​డెస్క్ : Moinabad Drugs Case | రాష్ట్రవ్యాప్తంగా సంచలనం సృష్టించిన మొయినాబాద్  డ్రగ్స్​ కేసు విచారణకు ప్రభుత్వం సిట్​ ఏర్పాటు చేసింది. ఈ మేరకు డీజీపీ శివధర్​రెడ్డి ఉత్తర్వులు జారీ చేశారు. డ్రగ్స్​, అక్రమ ఆయుధాలు, ఇతర తీవ్రమైన నేరాలకు సంబంధించిన ఈ కేసుపై సమగ్ర దర్యాప్తు జరిపేందుకు సిట్‌కు బాధ్యతలు అప్పగించారు. మూడు నెలల్లోగా ఛార్జిషీట్ దాఖలు చేయాలని ఆదేశించారు.

రంగారెడ్డి (Rangareddy) జిల్లా మొయినాబాద్​లో బీఆర్​ఎస్​ మాజీ ఎమ్మెల్యే పైలెట్ రోహిత్​రెడ్డి (Pilot Rohit Reddy), టీడీపీ ఎంపీ పుట్టా మహేశ్​, పలువురు వ్యాపారులు డ్రగ్స్​ పార్టీ చేసుకుంటుండగా పోలీసులు దాడి చేసిన విషయం తెలిసిందే. పార్టీలోని వారికి డ్రగ్స్​ పరీక్షలు చేయగా.. మాజీ ఎమ్మెల్యే రోహిత్​రెడ్డి, ఎంపీ పుట్ట మహేశ్​ (MP Putta Mahesh)కు పాజిటివ్ వచ్చింది. ఈ కేసులో కీలక వ్యక్తులు ఉండటంతో విచారణ కోసం ప్రత్యేక దర్యాప్తు బృందాన్ని ప్రభుత్వం ఏర్పాటు చేసింది. సిట్​కు ఫ్యూచ్​ర్​ సిటీ కమిషనర్​ సుధీర్​ బాబు (Sudheer Babu) నేతృత్వం వహించనున్నారు.

Moinabad Drugs Case | సిట్‌లోని అధికారులు వీరే..

సిట్​లో శాంతిభద్రతలు, గ్రేహౌండ్స్, ఈగల్​ టీమ్​కు చెందిన అధికారులు ఉన్నారు. చేవేళ్ల డీసీపీ యోగేష్ గౌతమ్, గ్రేహౌండ్స్​ గ్రూప్​ కమాండర్​ ఎం. రవీందర్ రెడ్డి, షాద్​నగర్​ డీసీపీ శిరీష, ఈగల్​ టీమ్​ డీఎస్పీలు హరీష్​చంద్రరెడ్డి, ఎన్ బుచ్చయ్య, మొయినాబాద్​ ఎస్​హెచ్​వో వై మల్లికార్జున రెడ్డి, మోకిల ఎస్సై కోటేశ్వరరావు, మొయినాబాద్​ ఎస్సై వెంకన్న, శంషాబాద్​ రూరల్ ఎస్సై సదాత్ అలీ సిట్​లో సభ్యులుగా ఉన్నారు.

Moinabad Drugs Case | రోహిత్​రెడ్డికి రిమాండ్​

ఈ కేసును సమగ్రంగా దర్యాప్తు చేసి, నేరం మూలాలను కనుగొనాలని డీజీపీ ఆదేశించారు. పెద్ద డ్రగ్ నెట్‌వర్క్‌లతో ఉన్న సంబంధాలపై దర్యాప్తు చేసేటప్పుడు అత్యున్నత ప్రమాణాలను పాటించాలని సూచించారు. కాగా ఈ కేసులో మాజీ ఎమ్మెల్యే పైలట్ రోహిత్ రెడ్డి, మరో ఇద్దరికి కోర్టు రిమాండ్​ విధించిన విషయం తెలిసిందే. రోహిత్ రెడ్డి, అతని సోదరుడు రితేష్ రెడ్డి, ఢిల్లీకి చెందిన వ్యాపారవేత్త నమిత్ శర్మలకు న్యాయస్థానం 14 రోజుల రిమాండ్​ విధించింది. కాగా ఫామ్​హౌస్​లో దాడి చేసిన పోలీసులు ఒక మహిళతో సహా మొత్తం 11 మందిని అదుపులోకి తీసుకున్నారు. అయితే ఎంపీ పుట్ట మహేష్ కుమార్​తో పాటు మరో ఏడుగురికి బెయిల్ వచ్చింది.

దీనిని కూడా చదవండి : Rohit Reddy Drugs Case | మాజీ ఎమ్మెల్యే రోహిత్ రెడ్డిపై కేసీఆర్​ ఆగ్రహం.. షోకాజ్​ నోటీసులు జారీ