అక్షరటుడే, వెబ్డెస్క్: Swayampaka Danam | హిందూ సనాతన ధర్మంలో దానానికి ఉన్న ప్రాముఖ్యం అంతా ఇంతా కాదు. మనిషి తన జీవిత కాలంలో చేసే అనేక పుణ్యకార్యాలలో ‘అన్నదానం’ అత్యున్నతమైనదిగా పరిగణిస్తారు.
అయితే, వండిన ఆహారాన్ని వడ్డించడమే కాకుండా, ఎదుటివారు తమకు నచ్చిన విధంగా, శుచిగా వండుకోవడానికి అవసరమైన అన్ని రకాల వస్తువులను సమకూర్చడాన్నే ‘స్వయంపాక దానం’ అంటారు.
పూజలు, పండుగలు, వివాహాది శుభకార్యాల సమయంలో బ్రాహ్మణులకు లేదా ఆకలితో ఉన్నవారికి స్వయంపాకం ఇవ్వడం మన పూర్వీకుల నుంచి వస్తున్న ఒక గొప్ప ఆచారం.
Swayampaka Danam | మనుస్మృతి ఏం చెబుతోంది?
మనుస్మృతి ప్రకారం (మన సంప్రదాయం ప్రకారం.. శాస్త్రబద్ధమైనది, పెద్దలు ఆమోదించిన మార్గం) స్వయంపాక దానం చేయడం వల్ల కేవలం పుణ్యం మాత్రమే కాదు.. ఆ కుటుంబానికి ఆరోగ్యం, వంశవృద్ధి కలుగుతాయని స్పష్టంగా పేర్కొన్నారు.
స్వయంపాకంలో ఇచ్చే పదార్థాలన్నీ సహజ సిద్ధమైనవి, ఆరోగ్యానికి మేలు చేసేవి కావడం వల్ల, ఆ సరకులను స్వీకరించిన వారు పొందే శారీరక తృప్తి దాతకు శుభ ఫలితాలను ఇస్తుంది.
Swayampaka Danam | స్వయంపాకంలో ఉండాల్సినవి:
స్వయంపాకం అంటే కేవలం బియ్యం ఇవ్వడం మాత్రమే కాదు. ఒక నిండు కుటుంబం ఒక పూట భోజనాన్ని సంపూర్ణంగా ముగించేందుకు అవసరమైన ప్రతి వస్తువు అందులో ఉండాలి.
కూరగాయలు: తోటకూర, దోసకాయ, వంకాయ, గుమ్మడికాయ వంటి కనీసం ఐదు రకాల తాజా కూరగాయలు ఉండాలి.
దినుసులు: నాణ్యమైన బియ్యం, కందిపప్పు, పెసరపప్పుతో పాటు రుచి కోసం చింతపండు, ఉప్పు, మిరపకాయలు, అల్లం, కొత్తిమీర తప్పనిసరి.
పాల ఉత్పత్తులు, ఇతరాలు: పాలు, పెరుగు, స్వచ్ఛమైన నెయ్యి, వంట నూనె , తేనెను కూడా జతచేయాలి.
శుభ సూచకాలు: కొబ్బరికాయ, అరటిపండ్లు, తాంబూలం (తమలపాకులు, వక్కలు), తీపి కోసం బెల్లం ఉండాలి.
దాన విధి, ఫలితం:
ఈ వస్తువులన్నింటినీ ఒక అరిటాకులో గానీ లేదా పెద్ద విస్తరిలో గానీ సర్ది, ఆపై తమ స్తోమతకు తగ్గట్టుగా ‘దక్షిణ’ (నగదు) ఉంచి పండితులకు లేదా పేదలకు సమర్పించాలి. ఆ సరుకులను అందుకున్న వారు తృప్తిగా వండుకుని భుజించిన తర్వాత, ‘అన్నదాతా సుఖీభవ’ అని మనస్ఫూర్తిగా దీవిస్తే.. ఆ దీవెన దాత కుటుంబానికి రక్షణ కవచంలా పనిచేస్తుంది.
దీనివల్ల ఆయురారోగ్యాలు పెంపొందడమే కాకుండా, ఇంట్లో ఎప్పుడూ తినడానికి తిండి, తాగడానికి నీరు కొరత ఉండదని, సుఖసంతోషాలతో జీవిస్తారని భక్తుల ప్రబల విశ్వాసం.
ఇది కూడా చదవండి: Eating Direction Vastu | ఈ దిశలో కూర్చుని తింటే తిరుగులేని అదృష్టం.. వాస్తు నిపుణులు ఏం చెబుతున్నారంటే!
