అక్షరటుడే, వెబ్డెస్క్: Amaravati Fire Accident | ఆంధ్రప్రదేశ్ రాజధాని అమరావతి (Amaravathi) పరిధిలో మరోసారి భారీ అగ్ని ప్రమాదం చోటుచేసుకోవడం కలకలం రేపింది. గుంటూరు జిల్లా రాయపూడి సమీపంలో నిర్మాణంలో ఉన్న ప్రిన్సిపల్ సెక్రటరీల భవనాల ప్రాంగణంలో సోమవారం అర్థరాత్రి మంటలు చెలరేగాయి.
సమాచారం ప్రకారం, రాజధాని నిర్మాణ పనులు నిర్వహిస్తున్న మేఘా ఇంజనీరింగ్ సంస్థ నిల్వ చేసిన హెచ్డీపీ ఈ పైపులకు ఒక్కసారిగా మంటలు అంటుకోవడంతో అగ్ని ప్రమాదం(Fire Accident) తీవ్ర రూపం దాల్చింది. రాత్రి 11 గంటల సమయంలో ప్రారంభమైన ఈ మంటలు వేగంగా వ్యాపించాయి.ప్రమాద సమాచారం అందుకున్న వెంటనే పోలీసులు, అగ్నిమాపక సిబ్బంది ఘటనా స్థలానికి చేరుకుని సహాయక చర్యలు ప్రారంభించారు. మంటలను పూర్తిగా అదుపులోకి తీసుకురావడానికి దాదాపు మూడు గంటల పాటు శ్రమించాల్సి వచ్చింది. అదృష్టవశాత్తు ప్రాణనష్టం ఏదీ సంభవించలేదని అధికారులు తెలిపారు.
Amaravati Fire Accident | వరుస అగ్ని ప్రమాదాలు.. పెరుగుతున్న అనుమానాలు
అయితే ఈ అగ్ని ప్రమాదానికి గల అసలు కారణాలు ఇంకా తెలియరాలేదు. పోలీసులు కేసు నమోదు చేసి దర్యాప్తు ప్రారంభించారు. గమనించదగ్గ విషయం ఏమిటంటే, అమరావతి ప్రాంతంలో ఇది రెండో అగ్ని ప్రమాదం. ఇటీవల మార్చి 11న వెలగపూడి సమీపంలో ఎల్ అండ్ టి సంస్థకు చెందిన కోట్ల రూపాయల విలువైన పైపులు అగ్నికి ఆహుతయ్యాయి. ఆ ఘటన కూడా అనుమానాస్పదంగా మారడంతో తీవ్ర చర్చకు దారి తీసింది. ఆ ప్రమాదంపై నారా చంద్రబాబు నాయుడు (Chandra Babu Naidu) సమగ్ర దర్యాప్తుకు ఆదేశాలు జారీ చేసిన సంగతి తెలిసిందే. ఇప్పుడు రాయపూడిలో జరిగిన తాజా ఘటనతో వరుసగా అగ్ని ప్రమాదాలు చోటుచేసుకోవడం స్థానికుల్లో భయాందోళనలకు కారణమవుతోంది.
Amaravati Fire Accident | కాంట్రాక్ట్ సంస్థల నిర్లక్ష్యం కారణంగానే ఈ ప్రమాదాలు
ఈ ఘటనల వెనుక ఏదైనా కుట్ర కోణం ఉందా అన్న అనుమానాలు వ్యక్తమవుతున్నాయి. ఈ నేపథ్యంలో రాష్ట్ర హోం మంత్రి వంగలపూడి అనిత (Vangalapudi Anita) కూడా ఈ ఘటనపై సమగ్ర విచారణ జరిపించాలని అధికారులను ఆదేశించారు. అదేవిధంగా, రాజధాని నిర్మాణ పనులు చేపడుతున్న కాంట్రాక్ట్ సంస్థల నిర్లక్ష్యం కారణంగానే ఈ ప్రమాదాలు జరుగుతున్నాయనే విమర్శలు కూడా వినిపిస్తున్నాయి. రెండు వారాల వ్యవధిలోనే ఒకే ప్రాంతంలో ఇలాంటి ఘటనలు పునరావృతం కావడం భద్రతా ప్రమాణాలపై పెద్ద ప్రశ్నలు లేవనెత్తుతోంది. నిర్మాణ ప్రాంగణాల్లో అగ్ని భద్రతా చర్యలు సరైన విధంగా అమలు అవుతున్నాయా లేదా అన్న అంశంపై అధికారులు ప్రత్యేక దృష్టి పెట్టాల్సిన అవసరం ఉందని నిపుణులు సూచిస్తున్నారు.
ఇది కూడా చదవండి..: QNet Fraud Raids | ఎంఎల్ఎం సంస్థ క్యూనెట్పై సీసీఎస్ దాడులు
