అక్షరటుడే, వెబ్డెస్క్ : Adulterated Ginger Garlic Paste | హైదరాబాద్ (Hyderabad) పోలీసులు ఇటీవల కల్తీపై ఉక్కుపాదం మోపుతున్నారు. ప్రజారోగ్యంతో చెలగాటం ఆడుతూ కల్తీ, తక్కువ నాణ్యత కలిగిన ఆహార పదార్థాలు తయారు చేస్తున్న వారిపై నిత్యం దాడులు చేస్తున్నారు. తాజాగా కల్తీ అల్లం వెల్లుల్లి పేస్ట్ తయారు చేస్తున్న ఇద్దరిని అరెస్ట్ చేశారు.
బోరబండ (Borabanda)లో కల్తీ అల్లం-వెల్లుల్లి పేస్ట్ తయారీ కేంద్రంపై పోలీసులు మంగళవారం దాడులు చేశారు. పక్కా సమాచారం మేరకు ఖైరతాబాద్ జోన్ కమిషనర్ టాస్క్ ఫోర్స్ అధికారులు (Taskforce Police) బోరబండలోని మధురా నగర్లో ‘ఏ1 సహారా గోల్డ్ జింజర్ అండ్ గార్లిక్ పేస్ట్’ పేరుతో నడుస్తున్న కేంద్రంలో తనిఖీలు నిర్వహించారు.నిందితుడు మహ్మద్ అబ్దుల్లా కల్తీ అల్లం-వెల్లుల్లి పేస్ట్ను తయారు చేస్తున్నట్లు గుర్తించారు. అతడిని అరెస్ట్ చేశారు.
Adulterated Ginger Garlic Paste | రసాయనాలతో..
ప్లాస్టిక్ కంటైనర్లను ఉపయోగించి, అత్యంత అపరిశుభ్రమైన వాతావరణంలో ఈ పేస్ట్ను తయారు చేస్తున్నారని అధికారులు తెలిపారు. ఆ యూనిట్లో కనీస పారిశుధ్యం కొరవడింది. ఉత్పత్తులు దుమ్ము, ఈగలు, ఇతర కాలుష్య కారకాలకు గురై, వినియోగానికి అనర్హంగా మారాయి. తక్కువ నాణ్యత గల ముడి పదార్థాలను ఉపయోగిస్తున్నారని, వాటి నిల్వ కాలాన్ని, పరిమాణాన్ని పెంచడానికి ఎసిటిక్ యాసిడ్, అధిక ఉప్పు కలుపుతున్నారని అధికారులు కనుగొన్నారు. కల్తీ పేస్ట్, వెల్లుల్లి, అల్లం వంటి ముడి పదార్థాలు, ఉప్పు సంచులు, ప్యాకేజింగ్ పౌచ్లు, మిక్సర్లు, గ్రైండర్లు, సీలింగ్ యూనిట్ల వంటి యంత్రాలను స్వాధీనం చేసుకున్నారు. వీటి విలువ రూ.4.5 లక్షలు ఉంటుందని అంచనా.
Adulterated Ginger Garlic Paste | టప్పచబుత్రలో..
నగరంలోని టప్పచబుత్రలో కల్తీ అల్లం-వెల్లుల్లి పేస్ట్ తయారీ కేంద్రంపై టాస్క్ఫోర్స్ పోలీసులు దాడులు చేశారు అపరిశుభ్రమైన పరిస్థితుల్లో కల్తీ అల్లం వెల్లుల్లి పేస్ట్ను తయారు చేస్తూ, విక్రయిస్తున్న మహ్మద్ జాఫర్ ఆలంను అరెస్టు చేశారు. 1,155 కిలోల నాణ్యతలేని పేస్ట్, యంత్రాలు ప్యాకింగ్ సామగ్రిని సీజ్ చేశారు. వీటి విలువ రూ.2.5 లక్షల వరకు ఉంటుందని అధికారులు తెలిపారు.
దీనిని కూడా చదవండి : Nizamabad fire accident | నగరంలో భారీ అగ్నిప్రమాదం.. కాలనీవాసుల భయాందోళన
