అక్షరటుడే, వెబ్డెస్క్: Anjali Sardana Startup | ఆ యువతి తన కలలను సాకారం చేసుకుంది. నేటి యువతరానికి ఆదర్శంగా నిలిచేలా స్టార్టప్ను నెలకొల్పి ఏడాదిలో దానిని రూ.800 కోట్లకు విస్తరించింది. 23 ఏళ్ల వయసులో ఏ పని చేయాలన్న యువత ఆలోచిస్తుంటారు. వ్యాపార రంగంలోకి దిగడానికి భయపడతారు. ఆమె మాత్రం ప్రాంటో అనే సంస్థను స్థాపించింది. అది నేడు లక్షలాది మందికి చేరువ కావడంతో వ్యాపారం రూ.800 కోట్లకు చేరింది.
ప్రస్తుతం మెట్రో నగరాల్లో చాలా మంది దంపతులు ఉద్యోగాలు చేస్తుంటారు. సాఫ్ట్వేర్, ఇతర ప్రైవేట్ కంపెనీల్లో కొలువు చేసే వారికి ఇంటి పని చేసుకోవడానికి వీలు ఉండదు. ఇలాంటి వారి కోసం అంజలి సర్దానా (Anjali Sardana) అనే యువతి ప్రాంటో అనే సంస్థను స్థాపించింది. గృహ సహాయ సేవల రంగంలో సేవలు అందించడం దీని లక్ష్యం.
Anjali Sardana Startup | అమెరికాలో చదువు
అంజలి అమెరికా (America)లోని జార్జ్టౌన్ విశ్వవిద్యాలయం (Georgetown University)లో చదువు పూర్తి చేశారు. అనంతరం పలు సంస్థల్లో పని చేశారు. 2025 ఏప్రిల్లో ప్రాంటోను ప్రారంభించారు. ఢిల్లీ గుర్గావ్లోని ఒక్క చిన్న ఆఫీసులో తమ ప్రయాణాన్ని మొదలు పెట్టారు. వినియోగదారులకు సేవలు అందించేందుకు తొలిరోజుల్లో ఆమె నేలపైనే నిద్రించేవారు. ప్రస్తుతం ఆ సంస్థకు వినియోగదారులు పెరిగారు. దీంతో ఎపిక్ క్యాపిటల్, జనరల్ క్యాటలిస్ట్ వంటి సంస్థల నుంచి సుమారు రూ.200 కోట్ల నిధులను సేకరించింది. కంపెనీ విలువ 100 మిలియన్ల (రూ.830 కోట్ల)కు చేరింది.
Anjali Sardana Startup | ప్రముఖ నగరాల్లో
సంస్థ ప్రారంభించిన మొదట్లో తమకు రోజుకు కేవలం 170 బుకింగ్లు మాత్రమే వచ్చేవాని అంజలి గుర్తు చేసుకున్నారు. ప్రస్తుతం రోజుకు 18 వేలకు బుకింగ్లకు చేరుకున్నట్లు చెప్పారు. అప్పుడు తాము చాలా చిన్న స్థాయిలో ఉండేవాళ్లమని, ఇప్పుడు తమ దగ్గర 3 వేల మందికి పైగా శిక్షణ పొందిన కార్మికులు ఉన్నారని వెల్లడించారు. బెంగళూరు, ఢిల్లీ, ముంబై, చెన్నై సహా 10 ప్రధాన నగరాల్లో ఈ సంస్థ ప్రస్తుతం సేవలు అందిస్తుంది. మరిన్ని నగరాలకు సేవలు విస్తరించేందుకు ప్లాన్ చేస్తోంది.
Anjali Sardana Startup | ఎలా పని చేస్తుంది
ఇంటిపనులకు వినియోగదారులను అనుసంధానించే ఒక డిజిటల్ ప్లాట్ఫారమ్ ప్రాంటో.. ఇల్లు ఊడ్చడం, పాత్రలు కడగడం, వంటగది, బాత్రూమ్ శుభ్రత, బట్టలు ఉతకడం లాంటి పనుల కోసం దీని ద్వారా పని మనుషులను బుక్ చేసుకోవచ్చు. బుక్ చేసుకున్న 10 నిమిషాల్లోనే సహాయకులు ఇంటికి వస్తారు. దీంతో సంస్థకు ఆదరణ పెరిగింది. 23 ఏళ్ల వయసులోనే కంపెనీలో 40 శాతం వాటాతో కోట్లాది రూపాయల సామ్రాజ్యాన్ని అంజలి ఏలుతున్నారు.
Anjali Sardana Startup | రెండో సారి నిధుల సేకరణ
ప్రాంటో సంస్థ గత సంవత్సరం ఆగస్టులో జనరల్ క్యాటలిస్ట్ (General Catalyst) నేతృత్వంలో 11 మిలియన్ల డాలర్ల నిధులను సేకరించింది. తాజాగా రూ.200 కోట్లను సమీకరించింది. నిధుల సమీకరణతో సంస్థలో అంజలి వాట 40 శాతానికి తగ్గింది.
ఇది కూడా చదవండి..: Adulterated Ginger Garlic Paste | అసిటిక్ యాసిడ్ – గమ్ పౌడర్తో అల్లం–వెల్లుల్లి పేస్ట్ తయారీ.. రెండు టన్నుల కల్తీ సరకు పట్టివేత!
