అక్షరటుడే, వెబ్డెస్క్ : Asha Bhosle Death | భారతీయ సినీ సంగీత చరిత్రలో చిరస్థాయిగా నిలిచిపోయే గాయని ఆశా భోస్లే (Asha Bhosle) ఇక లేరు. గత కొంతకాలంగా అనారోగ్య సమస్యలతో బాధపడుతున్న ఆమె, ముంబైలోని బ్రీచ్ క్యాండీ ఆసుపత్రి (Breach Candy Hospital)లో చికిత్స పొందుతూ ఆదివారం తుదిశ్వాస విడిచారు. ఆమె వయస్సు 92 సంవత్సరాలు.
ఆశా భోస్లే ఛాతిలో ఇన్ఫెక్షన్, తీవ్రమైన అలసట కారణంగా శనివారం ఆసుపత్రిలో చేరారు. ఆమె పరిస్థితి ఒక్కసారిగా విషమించింది. వైద్యులు అత్యుత్తమ చికిత్స అందించినప్పటికీ, ఆమెను కాపాడలేకపోయినట్లు ఆసుపత్రి వర్గాలు వెల్లడించాయి. ఈ వార్త వెలువడగానే దేశవ్యాప్తంగా సినీ, సంగీత రంగాల్లో విషాద ఛాయలు అలుముకున్నాయి.
Asha Bhosle Death | 12 వేలకి పైగా పాటలు..
సుమారు ఎనిమిది దశాబ్దాల సుదీర్ఘ సంగీత ప్రయాణంలో ఆశా భోస్లే 20కి పైగా భాషల్లో 12 వేలకుపైగా పాటలు ఆలపించి అరుదైన రికార్డు సృష్టించారు. ఆమె గాన వైవిధ్యం, శైలీ ప్రత్యేకత భారతీయ సంగీతానికి కొత్త దారులు చూపించింది. మెలోడీ పాటల నుంచి పెప్పీ నంబర్స్ వరకు, గజల్స్ నుంచి భజనల వరకు ప్రతి జానర్లో తనదైన ముద్ర వేసి అపారమైన అభిమానాన్ని సంపాదించారు. ఆమె సోదరి, గానకోకిల (Lata Mangeshkar)తో కలిసి భారతీయ సంగీతాన్ని ప్రపంచవ్యాప్తంగా ప్రాచుర్యం పొందేలా చేసిన వారిలో ఆశా భోస్లే ఒకరు. తన ప్రతిభతో, కృషితో అనేక తరాల గాయకులకు ఆదర్శంగా నిలిచారు.
Asha Bhosle Death | అనేక పురస్కారాలు
సంగీత రంగానికి ఆమె చేసిన అపూర్వ సేవలకు గాను భారత ప్రభుత్వం ‘పద్మ విభూషణ్’, ‘దాదాసాహెబ్ ఫాల్కే’ వంటి ప్రతిష్ఠాత్మక పురస్కారాలతో సత్కరించింది. ఆమె గానం కోట్లాది సంగీతాభిమానుల హృదయాల్లో చిరస్థాయిగా నిలిచిపోతుంది.ఆశా భోస్లే మరణంపై దేశ ప్రధాని సహా పలు రాష్ట్రాల ముఖ్యమంత్రులు, సినీ ప్రముఖులు, సంగీత దర్శకులు Music Directors తీవ్ర సంతాపం వ్యక్తం చేశారు. సోషల్ మీడియాలో అభిమానులు ఆమె పాటలను గుర్తుచేసుకుంటూ నివాళులు అర్పిస్తున్నారు.
దీనిని కూడా చదవండి : Diesel Export Duty | కేంద్రం కీలక నిర్ణయం.. డీజిల్ ఎగుమతులపై సుంకం పెంపు
