అక్షరటుడే, వెబ్డెస్క్: Banana Peel | సాధారణంగా దారిలో వెళ్లేటప్పుడు ఏదైనా పండు తొక్క కనిపిస్తే మనం పెద్దగా పట్టించుకోం. కానీ అదే అరటి తొక్క అయితే మాత్రం చాలా జాగ్రత్తగా ఉంటాం. ఎందుకంటే దానిపై కాలు వేస్తే క్షణాల్లో కింద పడిపోతాం. ఆపిల్ లేదా నారింజ వంటి ఇతర పండ్ల తొక్కల కంటే అరటి తొక్కకు అంత జారుడు గుణం ఎందుకు ఉందో ఎప్పుడైనా ఆలోచించారా? దీని వెనుక ఉన్న వింతైన శాస్త్రీయ కారణాన్ని జపాన్ పరిశోధకులు గుర్తించారు.
Banana Peel | ఆ సూక్ష్మ సంచులే అసలు కారణం:
మనం అరటి తొక్కను పైకి చూసినప్పుడు అది పొడిగా ఉన్నట్లు కనిపిస్తుంది. కానీ దాని లోపల వేల సంఖ్యలో ‘పాలీశాకరైడ్’ అనే జిగురు పదార్థంతో నిండిన చిన్న చిన్న సంచులు ఉంటాయి. మనం దానిపై అడుగు పెట్టగానే మన శరీర బరువుకు ఆ సంచులు ఒక్కసారిగా పగిలిపోతాయి. వెంటనే వాటి నుంచి ఒక రకమైన జెల్ బయటకు వస్తుంది. ఇది షూకు , నేలకు మధ్య ఒక లూబ్రికెంట్లా మారి ఘర్షణను పూర్తిగా తగ్గించేస్తుంది.
Banana Peel | ఆ జెల్
మనం రోడ్డుపై నడవాలంటే కాళ్లకు, నేలకు మధ్య కొంత ఘర్షణ (Friction) ఉండాలి. కానీ అరటి తొక్క ఈ ఘర్షణను దాదాపు సున్నా స్థాయికి తీసుకువస్తుంది. సైన్స్ ప్రకారం అరటి తొక్క ఘర్షణ విలువ కేవలం 0.07 మాత్రమే. ఇది బురద లేదా మంచు గడ్డ కంటే కూడా చాలా తక్కువ. ఆపిల్ తొక్కలో ఇలాంటి ప్రత్యేకమైన జెల్ ఉండదు కాబట్టే అది అరటి తొక్క అంత ప్రమాదకరంగా మారదు.
నియంత్రణ కోల్పోయే మెదడు:
నడిచేటప్పుడు మన శరీరాన్ని సమతుల్యం చేసే బాధ్యత మెదడుది. అయితే అరటి తొక్కపై కాలు వేయగానే, ఆ జెల్ కారణంగా కాలు ఊహించని వేగంతో ముందుకు జారిపోతుంది. ఈ ఆకస్మిక మార్పును మన మెదడు వెంటనే గుర్తించి శరీరాన్ని బ్యాలెన్స్ చేయలేకపోతుంది. ఫలితంగా సెకన్ల వ్యవధిలో నియంత్రణ కోల్పోయి మనం వెల్లకిలా పడిపోతాము. దీనివల్ల కలిగే గాయం చాలా తీవ్రంగా ఉంటుంది.
పరిశోధనకు దక్కిన గౌరవం:
ఈ వింత అంశంపై లోతుగా రీసెర్చ్ చేసినందుకు గాను జపాన్ శాస్త్రవేత్తలకు ప్రతిష్టాత్మకమైన ‘ఇగ్ నోబెల్’ అవార్డు దక్కింది. కేవలం అరటి తొక్కలోనే ఉండే ఈ ప్రత్యేకమైన గుణం సైన్స్ ప్రపంచంలో ఒక ఆసక్తికర చర్చకు దారితీసింది.
ఇది కూడా చదవండి: Diabetes Toothpaste Safety | షుగర్ పేషంట్లు తియ్యగా ఉండే పేస్ట్లు వాడొచ్చా? వాడితే ఏమౌతుంది?
