అక్షరటుడే, వెబ్డెస్క్ : BC Reservation Protest | రిజర్వేషన్ల పేరిట బీసీలను మోసం చేసిన కాంగ్రెస్ పార్టీ (Congress Party) గద్దె దిగాలని బీఆర్ఎస్ (BRS) నాయకులు డిమాండ్ చేశారు. ఆ పార్టీ ఎమ్మెల్యేలు, ఎమ్మెల్సీలు గురువారం ఉదయం గన్పార్క్లోని తెలంగాణ అమరవీరుల స్థూపం వద్ద నిరసన తెలిపారు. అనంతరం అసెంబ్లీ వరకు ర్యాలీ నిర్వహించారు.తాము అధికారంలోకి వస్తే బీసీలకు 42 శాతం రిజర్వేషన్లు ఇస్తామని కాంగ్రెస్ గతంలో హామీ ఇచ్చిన విషయం తెలిసిందే.
ఈ మేరకు స్థానిక సంస్థల ఎన్నికలు, విద్య, ఉద్యోగాల్లో రిజర్వేషన్ల అమలుకు అసెంబ్లీలో బిల్లులు ఆమోదించి కేంద్రానికి పంపింది. కేంద్రం వాటిని పెండింగ్లో పెట్టింది. అనంతరం రాష్ట్ర ప్రభుత్వం జారీ చేసిన జీవోను కోర్టులు కొట్టేశాయి. దీంతో బీసీ రిజర్వేషన్లు లేకుండానే పంచాయతీ, మున్సిపల్ ఎన్నికలను కాంగ్రెస్ నిర్వహించింది. ఈ క్రమంలో ప్రభుత్వ తీరుకు వ్యతిరేకంగా బీఆర్ఎస్ సభ్యులు నిరసన తెలిపారు.
BC Reservation Protest | బీసీ సబ్ ప్లాన్
మాజీ మంత్రి హరీశ్రావు (Former Minister Harish Rao) ఆధ్వర్యంలో బీఆర్ఎస్ ఎమ్మెల్యేలు, ఎమ్మెల్సీలు నిరసనలో పాల్గొన్నారు. బీసీ సబ్ ప్లాన్ అమలు ఏదంటూ నినాదాలు చేశారు. బీసీలకు 42 శాతం రిజర్వేషన్లు కల్పించకుండా, బీసీ కార్పొరేషన్కు నిధులు కేటాయించకుండా ప్రభుత్వం మోసం చేస్తుందని మండిపడ్డారు. బీసీ విద్యార్థుల ఫీజు రీయింబర్స్మెంట్ బకాయిలు వెంటనే విడుదల చేయాలని డిమాండ్ చేశారు.
BC Reservation Protest | బీసీ డిక్లరేషన్ పేరిట..
వెనుకబడిన తరగతుల సంక్షేమానికి ప్రతీ వార్షిక బడ్జెట్లో రూ.20 వేల కోట్ల రూపాయలు ఖర్చు పెడతామని చెప్పి కాంగ్రెస్ ప్రభుత్వం (Congress Government) బీసీలను మోసం చేసిందని మాజీ మంత్రి తలసాని శ్రీనివాస్యాదవ్ అన్నారు. అసెంబ్లీ ఎన్నికల్లో కామారెడ్డి (Kamareddy) డిక్లరేషన్ పేరుతో సిద్ధరామయ్యతో అబద్ధాలు చెప్పించి బీసీల ఓట్లు దండుకున్నారని పేర్కొన్నారు. అధికారంలోకి రాగానే బీసీ సబ్ ప్లాన్ కింద మొదటి ఏడాది రూ.800 కోట్ల ఖర్చు చేస్తామని మోసం చేశారన్నారు. రెండో ఏడాది రూ.11 వేల కోట్లు కేటాయించి, రూ.3 కోట్లు మాత్రమే ఖర్చు చేశారన్నారు.
BC Reservation Protest | హామీలు అమలు చేయాలి
కోరుట్ల ఎమ్మెల్యే సంజయ్ మాట్లాడుతూ.. కాంగ్రెస్ ఎన్నికల మేనిఫెస్టోలో బీసీలకు 42 శాతం రిజర్వేషన్ కల్పిస్తామని హామీ ఇచ్చిందన్నారు. కానీ ఇప్పటివరకు అమలు చేయలేదని మండిపడ్డారు. బీసీ వర్గానికి ఇచ్చిన హామీలను నెరవేర్చాలని డిమాండ్ చేశారు.
ఇది కూడా చదవండి..: Midday Meal Fish | విద్యార్థులకు గుడ్న్యూస్.. మధ్యాహ్న భోజనంలో చేపలు
