అక్షరటుడే, నిజామాబాద్ సిటీ: Bodhan Government Hospital | బోధన్ ప్రభుత్వ ఆస్పత్రిలో సదుపాయాల పెరుగుదలకు కృషి చేస్తామని కలెక్టర్ ఇలా త్రిపాఠి అన్నారు. పట్టణంలోని ప్రభుత్వ జిల్లా ఆస్పత్రిని (Collector Ila Tripathi) మంగళవారం సందర్శించారు.
Bodhan Government Hospital | అవుట్ పేషెంట్ బ్లాక్..
ఆస్పత్రిలోని అవుట్ పేషంట్ బ్లాక్, కాన్పుల విభాగం, ఇమ్యూనైజేషన్ గది, పోస్ట్ ఆపరేటివ్ వార్డు, ఇతర విభాగాలను సందర్శించి అందుబాటులో ఉన్న సౌకర్యాలను కలెక్టర్ పరిశీలించారు. ఆస్పత్రి ఆవరణను, శిథిలావస్థకు చేరిన ఐసోలేషన్ వార్డు భవనాన్ని పరిశీలించారు. అనంతరం జిల్లా ఆస్పత్రుల సమన్వయకర్త శ్రీనివాస్ ప్రసాద్, ఆస్పత్రి సూపరింటెండెంట్ డాక్టర్ రాహుల్తో కలెక్టర్ సమీక్ష నిర్వహించారు. జిల్లా ఆస్పత్రికి ఎంతమంది రోగులు సందర్శిస్తున్నారు. ఎక్కువగా ఎలాంటి వ్యాధులకు సంబంధించిన చికిత్సల కోసం వస్తున్నారనే విషయాన్ని ఆరా తీశారు. ఆస్పత్రిలో నెలకొని ఉన్న ఇబ్బందుల గురించి అడిగి తెలుసుకున్నారు. ప్రస్తుతం ఒకే గైనకాలజిస్టు సేవలు అందుబాటులో ఉన్నందున మరో గైనకాలజిస్టును నియమించేలా చర్యలు తీసుకుంటామని కలెక్టర్ తెలిపారు. ఆస్పత్రిలో ఇతర మౌలిక సదుపాయాల మెరుగుదలకు సైతం చొరవ చూపుతానన్నారు.
Bodhan Government Hospital | రోగులకు మెరుగైన సేవలు అందించాలి..
రోగులకు మెరుగైన సేవలు అందించాలని, ప్రభుత్వ ఆస్పత్రుల పనితీరుపై ప్రజల్లో నమ్మకాన్ని పెంపొందించాలని ఈ సందర్భంగా కలెక్టర్ పేర్కొన్నారు. ముఖ్యంగా అవుట్ పేషంట్ (Outpatient) రోగులకు అందిస్తున్న సేవలను మరింతగా పెంపొందించాలన్నారు. వైద్యులు, సిబ్బంది ఎల్లవేళలా అందుబాటులో ఉంటూ రోగులకు నాణ్యమైన సేవలు అందించేలా అంకిత భావంతో విధులు నిర్వర్తించాలని సూచించారు. ప్రస్తుత వేసవి సీజన్లో ఫుడ్ పాయిజనింగ్, డీహైడ్రేషన్ వంటి కేసులు ఎక్కువగా వచ్చే ఆస్కారం ఉన్నందున అప్రమత్తంగా ఉండాలని, సీజనల్ వ్యాధులు సోకకుండా ముందు జాగ్రత్తలు తీసుకోవాలని, అవసరమైన మందులను అందుబాటులో ఉండేలా చూసుకోవాలని ఆదేశించారు.
అవసరమైన మౌలిక సదుపాయాలు, వైద్యులు, సిబ్బందిని సమకూరుస్తామని, అయినా కూడా వైద్య సేవల్లో లోపాలు ఉంటే ఎంతమాత్రం ఉపేక్షించబోమని కలెక్టర్ స్పష్టం చేశారు. తాను క్రమం తప్పకుండా ఆకస్మిక తనిఖీలు జరుపుతానని, నిర్లక్ష్యానికి తావు కల్పిస్తే కఠిన చర్యలు తీసుకుంటానన్నారు. సాధ్యమైనంత వరకు అన్ని రకాల ఆరోగ్య సేవలను స్థానికంగానే అందించాలని, అత్యవసరం అయితేనే నిజామాబాద్ జిల్లా జనరల్ ఆస్పత్రి (Nizamabad District General Hospital)కి రిఫర్ చేయాలని సూచించారు.
ఇది కూడా చదవండి..: School Early Admissions | ముందస్తు అడ్మిషన్లు నిర్వహిస్తున్నవిద్యాసంస్థలపై చర్యలు తీసుకోవాలి
