అక్షరటుడే, వెబ్డెస్క్: BRS Municipal Victory | రాష్ట్రవ్యాప్తంగా తీవ్ర చర్చకు దారి తీసిన క్యాతన్పల్లి మున్సిపల్ పీఠాన్ని ఎట్టకేలకే బీఆర్ఎస్ (BRS) కైవసం చేసుకుంది. సీపీఐ (CPI)తో కలిసి చైర్పర్సన్ పదవి దక్కించుకుంది.
రాష్ట్రంలో మున్సిపల్ ఛైర్పర్సన్ ఎన్నికలను ఫిబ్రవరి 16న నిర్వహించిన విషయం తెలిసిందే. అయితే హంగ్ ఏర్పడిన కొన్ని బల్దియాల్లో ఎన్నికలు వాయిదా పడ్డాయి. బీఆర్ఎస్, కాంగ్రెస్ నాయకుల వాగ్వాదం, ఘర్షణ, కోరం లేకపోవడం వంటి కారణాలతో ఎన్నికలు నిలిచిపోయాయి. మంచిర్యాల జిల్లా (Mancherial District) క్యాతనపల్లిలో సైతం తీవ్ర ఉద్రిక్తత చోటు చేసుకోవడంతో రెండు సార్లు ఎన్నిక వాయిదా పడగా.. తాజాగా అధికారులు ఛైర్పర్సన్ ఎన్నిక ప్రక్రియ నిర్వహించారు.
BRS Municipal Victory | హాజరుకాని కాంగ్రెస్
క్యాతనపల్లి, ఖానాపూర్, ఇబ్రహీంపట్నం మున్సిపల్ ఛైర్పర్సన్ ఎన్నికను శనివారం అధికారులు నిర్వహించారు. ఈ క్రమంలో క్యాతన్పల్లి మున్సిపల్ ఛైర్పర్సన్గా గొడిసల సంధ్యారాణి (బీఆర్ఎస్),వైస్ ఛైర్పర్సన్గా మిట్టపల్లి సరిత (సీపీఐ) ఎన్నికయయ్యారు. బల్దియాలో బీఆర్ఎస్ 10 స్థానాల్లో, సీపీఐ 4 చోట్ల విజయం సాధించాయి. కాంగ్రెస్-7, ఇండిపెండెంట్ ఒక్క చోట గెలవగా.. ఇద్దరు ఎక్స్ అఫిషియో, ఇండిపెండెంట్ కలిసి కాంగ్రెస్ బలం 10కి చేరింది. అయితే ఎలాగైన మున్సిపాలిటీని దక్కించుకోవాలని కాంగ్రెస్ యత్నించింది. మంత్రి వివేక్ తీవ్ర ప్రయత్నాలు చేశారు. అయితే బీఆర్ఎస్ పకడ్బందీగా వ్యవహరించింది. దీంతో బీఆర్ఎస్ పీఠాన్ని దక్కించుకుంది. ఎన్నికకు కాంగ్రెస్ సభ్యులు హాజరు కాలేదు. క్యాతన్పల్లి మున్సిపల్ ఛైర్పర్సన్గా గొడిసల సంధ్యారాణి (బీఆర్ఎస్), వైస్ ఛైర్పర్సన్గా మిట్టపల్లి సరిత (సీపీఐ) ఎన్నికయ్యారు.
BRS Municipal Victory | ఇబ్రహీంపట్నంలో సైతం..
రంగారెడ్డి జిల్లా (Ranga Reddy District) ఇబ్రహీంపట్నం మున్సిపాలిటీ ఛైర్మన్ పదవి బీఆర్ఎస్ కైవసం చేసుకుంది. ఛైర్మన్గా టేకుల సుదర్శన్ రెడ్డి ఎన్నికయ్యారు. గతంలో ఇక్కడ ఎన్నిక నిర్వహించారు. అయితే హైకోర్టు స్టే ఇవ్వడంతో ప్రక్రియ నిలిచిపోయింది. దీంతో మరోసారి ఎన్నికలు నిర్వహించగా.. బీఆర్ఎస్ బల్దియా పీఠాన్ని గెలుచుకుంది. వైస్ఛైర్పర్సన్గా బీజేపీకి చెందిన ముత్యాల శ్యామల ఎన్నికయ్యారు. కాగా ఎన్నిక వాయిదా వేయాలని కాంగ్రెస్ కౌన్సిలర్లు కోరారు. కోర్టు ఆదేశాలతో ఎన్నికలు నిర్వహిస్తున్నట్లు అధికారులు తెలిపారు.
ఇది కూడా చదవండి..: Drunk Driving WhatsApp Group | మందుబాబుల మాస్టర్ ప్లాన్.. షాకిచ్చిన ఎస్సై
