అక్షరటుడే, వెబ్డెస్క్: Cesarean Recovery Tips | ప్రస్తుత కాలంలో ఆరోగ్య సమస్యలు లేదా జీవనశైలి మార్పుల కారణంగా ఈ రోజుల్లో చాలామందికి సిజేరియన్ ఆపరేషన్లే జరుగుతున్నాయి. అయితే, సహజ ప్రసవం (కానుపు) తో పోలిస్తే సిజేరియన్ తర్వాత శరీరం మునుపటి స్థితికి రావడానికి కొంత ఎక్కువ సమయం పడుతుంది.
ఈ క్రమంలో చాలామంది తల్లులు దీర్ఘకాలిక నొప్పులు ఉంటాయని లేదా భవిష్యత్తులో ఆరోగ్య సమస్యలు తలెత్తుతాయని ఆందోళన చెందుతుంటారు. కానీ, ప్రసవానంతరం సరైన జీవనశైలి, వైద్యుల సూచనలు పాటిస్తే చాలా త్వరగా కోలుకోవచ్చని నిపుణులు చెబుతున్నారు.
Cesarean Recovery Tips | విశ్రాంతికి మొదటి ప్రాధాన్యం:
ఆపరేషన్ తర్వాత కుట్లు త్వరగా మానాలన్నా, అంతర్గత గాయాలు నయం కావాలన్నా విశ్రాంతిని మించిన మందు లేదు. కొత్తగా తల్లైన వారికి శిశువుకు పాలివ్వడం, దుస్తులు మార్చడం, వారిని నిద్రపుచ్చడం వంటి పనులతోనే రోజంతా గడిచిపోతుంది. దీనివల్ల తల్లులకు సరైన నిద్ర ఉండదు, ఫలితంగా ఒత్తిడి పెరుగుతుంది.
ఇది తల్లి ఆరోగ్యానికే కాకుండా బిడ్డకు కూడా మంచిది కాదు. అందుకే నిపుణులు ఇచ్చే ప్రధాన సలహా ఏంటంటే.. శిశువు నిద్రపోయిన ప్రతిసారీ తల్లులు కూడా ఇతర పనులను పక్కన పెట్టి నిద్రకు ఉపక్రమించాలి. దీనివల్ల శరీరం త్వరగా శక్తిని పుంజుకుంటుంది.
Cesarean Recovery Tips | పాలిచ్చే విధానం:
బిడ్డకు పాలివ్వడం అనేది కేవలం శిశువు ఆకలి తీర్చడమే కాదు, అది తల్లి ఆరోగ్యానికి కూడా ఎంతో మేలు చేస్తుంది. ఇది ప్రసవం తర్వాత పెరిగిన బరువును తగ్గించడమే కాకుండా, త్వరగా మళ్లీ గర్భం దాల్చకుండా సహజమైన నియంత్రణగా పనిచేస్తుంది.
అయితే, పాలిచ్చే సమయంలో తల్లులు కూర్చునే విధానం (Posture) చాలా కీలకం. పాలిచ్చేటప్పుడు ముందుకు లేదా వెనక్కి వంగిపోకుండా నిటారుగా కూర్చోవడం అలవాటు చేసుకోవాలి. ఇలా చేయడం వల్ల సిజేరియన్ తర్వాత వచ్చే దీర్ఘకాలిక నడుము నొప్పిని నివారించవచ్చు. అవసరమైతే సౌకర్యం కోసం ఫీడింగ్ పిల్లోలను ఉపయోగించడం ఉత్తమం.
పోషకాహారం తీసుకోవడంలో అశ్రద్ధ వద్దు:
మన సమాజంలో బాలింతలకు ఆహారం విషయంలో అనేక ఆంక్షలు విధిస్తుంటారు. ఇది తినకూడదు, అది తాగకూడదు అని భయపెడుతుంటారు. కానీ వైద్య నిపుణుల ప్రకారం, బాలింతలకు ఎలాంటి కఠినమైన ఆహార నియమాలు అవసరం లేదు.
గర్భిణిగా ఉన్నప్పుడు ఎలాంటి బలమైన , పోషకాలున్న ఆహారం తీసుకున్నారో, ప్రసవం తర్వాత కూడా వైద్యుల సలహాతో అన్ని రకాల పండ్లు, కూరగాయలు , పప్పు ధాన్యాలను తీసుకోవాలి. సరైన పోషకాహారం తీసుకోవడం వల్ల ఆపరేషన్ గాయాలు త్వరగా మానడమే కాకుండా, బిడ్డకు సరిపడా పాలు కూడా అందుతాయి.
ఇది కూడా చదవండి: High Protein Breakfast | గుడ్ల కంటే ఎక్కువ ప్రొటీన్ వీటిలోనే..అవి ఏంటో తెలుసా!
