అక్షరటుడే, వెబ్డెస్క్ : Commercial LPG Price Hike | పశ్చిమాసియా ప్రాంతంలో కొనసాగుతున్న ఉద్రిక్త పరిస్థితులు ప్రపంచ ఆర్థిక వ్యవస్థపై ప్రభావం చూపుతున్నాయి. ముఖ్యంగా చమురు సరఫరా దెబ్బతినడంతో అంతర్జాతీయ మార్కెట్లో ధరలు భారీగా పెరిగాయి. ఈ ప్రభావం ఇప్పుడు భారత్లో కూడా స్పష్టంగా కనిపిస్తోంది. ప్రభుత్వ రంగ ఆయిల్ కంపెనీలు కమర్షియల్ ఎల్పీజీ సిలిండర్ ధర (Commercial LPG Cylinder Price)ను మరోసారి పెంచుతూ సామాన్యులకు షాక్ ఇచ్చాయి.
తాజా సవరణలో భాగంగా 19 కిలోల కమర్షియల్ సిలిండర్పై రూ. 195.50 పెంచారు.ఈ పెంపుతో దేశంలోని పలు ప్రధాన నగరాల్లో కమర్షియల్ సిలిండర్ ధర రూ. 2,000 మార్క్ను దాటింది. దేశ రాజధాని న్యూఢిల్లీ (New Delhi)లో 19 కిలోల సిలిండర్ ధర రూ. 2,078.50కి చేరింది. గత నెల మార్చి 1న కూడా రూ. 114.50 మేర పెంపు చేసిన విషయం తెలిసిందే. వరుసగా పెరుగుతున్న ధరలు హోటళ్లు, రెస్టారెంట్లు, చిన్న వ్యాపారాలపై తీవ్ర ప్రభావం చూపుతున్నాయి.
Commercial LPG Price Hike | గృహ వినియోగ సిలిండర్ ధరలు స్థిరం
ఇక గృహ వినియోగానికి ఉపయోగించే 14.2 కిలోల ఎల్పీజీ సిలిండర్ ధరల్లో మాత్రం ప్రస్తుతం మార్పులు లేవు. మార్చి 7న రూ. 60 పెంచిన తర్వాత, ధరలు స్థిరంగా కొనసాగుతున్నాయి. ప్రస్తుతం న్యూఢిల్లీలో గృహ వినియోగ సిలిండర్ ధర రూ. 913గా ఉంది. దేశంలోని ప్రభుత్వ రంగ సంస్థలు ఇండియన్ ఆయిల్ కార్పొరేషన్, భారత్ పెట్రోలియం (Bharat Petroleum),హిందుస్థాన్ పెట్రోలియం (Hindustan Petroleum) ప్రతి నెలా ఒకటో తేదీన LPG, ATF ధరలను సవరిస్తుంటాయి. అంతర్జాతీయ చమురు ధరలు, రూపాయి మారకపు విలువ వంటి అంశాలను పరిగణనలోకి తీసుకుని ఈ నిర్ణయాలు తీసుకుంటారు.
Commercial LPG Price Hike | ఎల్పీజీ ధరలపై ప్రభావం
పశ్చిమాసియాలో నెలకొన్న యుద్ధ పరిస్థితుల కారణంగా గ్లోబల్ మార్కెట్ (Global Market)లో చమురు ధరలు సుమారు 50% వరకు పెరిగినట్లు మార్కెట్ వర్గాలు చెబుతున్నాయి. ఈ పెరుగుదల ప్రత్యక్షంగా ఎల్పీజీ ధరలపై ప్రభావం చూపుతోంది. ఇప్పటికే మార్కెట్లో కమర్షియల్ గ్యాస్ సిలిండర్ల కొరత కూడా ఉండటం వ్యాపారులకు మరింత ఇబ్బందిని కలిగిస్తోంది. ధరలు పెరగడం, సరఫరా తగ్గడం కలిసి చిన్న వ్యాపారాలపై భారాన్ని పెంచుతున్నాయి. పశ్చిమాసియా ఉద్రిక్తతలు, అంతర్జాతీయ చమురు ధరల పెరుగుదల ప్రభావంతో దేశంలో గ్యాస్ ధరలు మరింత పెరిగే అవకాశం ఉందని నిపుణులు హెచ్చరిస్తున్నారు. రాబోయే రోజుల్లో పరిస్థితి ఎలా మారుతుందో అన్నది ఆసక్తికరంగా మారింది.
ఇది కూడా చదవండి..: Murder Accused Arrest | హత్య కేసులో నిందితుడిని పట్టించిన సిలిండర్ బుకింగ్
