అక్షరటుడే, వెబ్డెస్క్: Congress Senior Leaders | కాంగ్రెస్ పార్టీలో సీనియర్ నాయకులకు తీవ్ర అవమానాలు జరుగుతున్నాయని మాజీ ఎమ్మెల్సీ తాటిపత్రి జీవన్ రెడ్డి మరోసారి తీవ్రస్థాయిలో విరుచుకుపడ్డారు. పార్టీ కోసం దశాబ్దాలుగా పనిచేస్తున్న వారిని పక్కన పెడుతున్నారని విమర్శించారు. ఇతర పార్టీల నుంచి వచ్చిన వారికి పెద్దపీట వేస్తున్నారని ఆవేదన వ్యక్తం చేశారు.
Congress Senior Leaders | పోచారం ఇచ్చిన సలహాలు ఏమిటి?
మాజీ స్పీకర్ పోచారం శ్రీనివాస రెడ్డిని తెలంగాణ ప్రభుత్వ సలహాదారుగా నియమించడంపై జీవన్ రెడ్డి తీవ్రంగా అభ్యంతరం వ్యక్తం చేశారు గత 20 నెలలుగా ప్రభుత్వానికి పోచారం ఇచ్చిన సలహాలేంటో చెప్పాలని డిమాండ్ చేశారు. వ్యవసాయ రంగంలో ఆయన సాధించిన ప్రగతి ఏమిటని నిలదీశారు.
Congress Senior Leaders | రాహుల్ ఆశయాలకు విరుద్ధం
రాహుల్ గాంధీ ఆలోచనలకు అనుగుణంగా నడిచే వారిని పార్టీలో అణగదొక్కుతున్నారని మాజీ ఎమ్మెల్సీ జీవన్ రెడ్డి ఆరోపించారు. కేవలం “జీ హుజూర్” అనే వారికే పదవులు దక్కుతున్నాయని ఘాటుగా విమర్శించారు.
చిన్నారెడ్డికి అవమానం
సీనియర్ నాయకుడు చిన్నారెడ్డికి జరిగిన అన్యాయాన్ని జీవన్రెడ్డి ప్రస్తావించారు. వనపర్తి టికెట్ విషయంలో ఆయనను మోసం చేశారని ఆరోపించారు. ఆ అవమానంతో చిన్నారెడ్డి ఆత్మహత్య చేసుకోవాలనే ఆలోచన వచ్చిందని చెప్పడం కాంగ్రెస్ పార్టీ పరిస్థితికి అద్దం పడుతోందని జీవన్ రెడ్డి ఆవేదన వ్యక్తం చేశారు.
వేం నరేందర్ రెడ్డి పెత్తనం
రాష్ట్ర ప్రభుత్వంలో వేం నరేందర్ రెడ్డి సలహాలకు ఉన్న ప్రాధాన్యం సీనియర్లకు లేదని జీవన్రెడ్డి ఎద్దేవా చేశారు. వి. హనుమంతరావు, మధు యాష్కీ, వంశీచంద్ రెడ్డి వంటి సీనియర్లను పట్టించుకోవడం లేదని ఆయన ఆవేదన వ్యక్తం చేశారు.
నియంతలా..
“కాంగ్రెస్ పార్టీ నాది.. అడ్డు వచ్చేవారిని తొక్కుతా..” అనే ధోరణిలో ముఖ్యమంత్రి వ్యవహరిస్తున్నారని జీవన్ రెడ్డి ఆరోపించారు. జగిత్యాల గడ్డపై తనను ఏ శక్తి అడ్డుకోలేదని స్పష్టం చేశారు.
