అక్షరటుడే, కామారెడ్డి: De-Addiction Center | డ్రగ్స్ రహిత సమాజం కోసమే జిల్లా ఆస్పత్రుల్లో ప్రభుత్వం డీ అడిక్షన్ సెంటర్లను ఏర్పాటు చేస్తుందని ఎస్పీ రాజేష్ చంద్ర (SP Rajesh Chandra) అన్నారు. రాష్ట్ర ప్రభుత్వం ప్రతిష్టాత్మకంగా చేపట్టిన ప్రజా పాలన-ప్రగతి ప్రణాళిక 99 రోజుల ప్రత్యేక కార్యాచరణలో భాగంగా శనివారం కామారెడ్డి జీజీహెచ్లో (Kamareddy GGH) నూతనంగా ఏర్పాటు చేసిన డీ అడిక్షన్ కేంద్రాన్ని ఎస్పీ ప్రారంభించారు.
De-Addiction Center | మత్తు పదార్థాలకు బానిసలు కావొద్దు..
ఈ సందర్భంగా ఆయన మాట్లాడుతూ.. మద్యం, ఇతర మత్తుపదార్థాలకు బానిసలైన వారి జీవితాల్లో వెలుగులు నింపడానికి, వారిని తిరిగి సాధారణ స్థితికి తీసుకురావడానికి ఈ కేంద్రం ఎంతో దోహదపడుతుందన్నారు. భవిష్యత్ తరాలకు డ్రగ్స్ లేని స్వచ్ఛమైన సమాజాన్ని అందించడమే ప్రభుత్వం, పోలీసు శాఖ ప్రధాన లక్ష్యమని స్పష్టం చేశారు. జిల్లాలో అమలువుతున్న ప్రజా పాలన-ప్రగతి ప్రణాళిక 99 రోజుల ప్రణాళిక ద్వారా ప్రజలకు ప్రభుత్వ సేవలను మరింత చేరువ చేస్తున్నామన్నారు. ప్రజల సమస్యలపై ప్రత్యేక దృష్టి సారించినట్లు తెలిపారు. డ్రగ్స్, గంజాయి వంటి మహమ్మారుల వల్ల కేవలం తీసుకునే వారే కాకుండా, సమాజం మొత్తం ప్రభావితమవుతుందని ఆందోళన వ్యక్తం చేశారు. మత్తులో వాహనాలు నడపడం వల్ల అమాయకుల ప్రాణాలు పోతున్నాయని, పాఠశాలలు, బహిరంగ ప్రదేశాల్లో భద్రత కరువవుతోందని పేర్కొన్నారు.
De-Addiction Center | డ్రగ్స్ నిర్మూలనకు ఈగల్ టీం..
డ్రగ్స్ నిర్మూలనకు రాష్ట్ర ప్రభుత్వం (State Government) ఈగల్ టీమ్ ఏర్పాటు చేసిందన్నారు. ప్రజల నుంచి వచ్చే సమాచారం ఈ పోరాటంలో అత్యంత కీలకమని, ఎవరైనా అనుమానాస్పదంగా కనిపిస్తే వెంటనే పోలీసులకు సమాచారం అందించాలని కోరారు. జిల్లా ఆస్పత్రిలోని రెండో అంతస్తులో డీ అడిక్షన్ సెంటర్ కోసం ప్రత్యేక వార్డును కేటాయించడం జరిగిందని, సైకియాట్రిస్ట్ డాక్టర్ వివేక్ కుమార్ పర్యవేక్షణలో చికిత్స అందించడం హర్షణీయమని పేర్కొన్నారు. కార్యక్రమంలో అదనపు కలెక్టర్ విక్టర్ (Additional Collector Victor), కామారెడ్డి సబ్ డివిజన్ ఏఎస్పీ చైతన్య రెడ్డి (ASP Chaitanya Reddy), ఆస్పత్రి సూపరింటెండెంట్ డాక్టర్ వెంకటేశ్వర్లు, డాక్టర్ యాదగిరి, జిల్లా వైద్యాధికారి డాక్టర్ రవీందర్ గౌడ్, సైకియాట్రిస్ట్ డాక్టర్ వివేక్ కుమార్, వైద్య సిబ్బంది పాల్గొన్నారు.
ఇది కూడా చదవండి..: Artificial Intelligence Courses | ఆర్టిఫిషియల్ ఇంటలిజెన్స్ కోర్సులు తేవాలి: షబ్బీర్ అలీ
