అక్షరటుడే, వెబ్డెస్క్ : Driving License Test | డ్రైవింగ్ లైసెన్స్ (License) జారీ నిబంధనలను రాష్ట్ర ప్రభుత్వం మార్చనుంది. డ్రైవింగ్ లైసెన్స్ పొందాలంటే ఇకపై ఆన్లైన్ పరీక్షలో పాస్ కావాలి. కొత్త విధానం ఏప్రిల్ నుంచి అమలులోకి వస్తుందని రవాణా శాఖ తెలిపింది.
రోడ్డు ప్రమాదాల్లో నిత్యం ఎంతోమంది చనిపోతున్నారు. ఈ క్రమంలో వాహనదారుల్లో అవగాహన పెంపొందించడానికి ప్రభుత్వం రోడ్ సేఫ్టీ అవెర్నెస్ (Road Safety Awareness) పరీక్షను ఆన్లైన్లో నిర్వహించనుంది. ఈ పరీక్షలో పాస్ అయితేనే లైసెన్స్ ఇస్తారు. ప్రస్తుతం లైసెన్స్ కోసం లెర్నర్ లైసెన్స్ టెస్ట్, డ్రైవింగ్ టెస్ట్ (Driving Test) నిర్వహిస్తున్నారు. వీటికి అదనంగా ఆన్లైన్ పరీక్షను నిర్వహించనున్నారు.
Driving License Test | ఆన్లైన్లో పాఠాలు
కొత్త లైసెన్స్ విధానం ఏప్రిల్ మొదటి వారం నుంచి అమలులోకి రానుంది. దీని ప్రకారం లెర్నింగ్ లైసెన్స్ కోసం అప్లై చేసే ముందు వాహనదారులు మూడు గంటల పాటు ఆన్లైన్లో రోడ్డు భద్రతా పాఠాలు వినాల్సి ఉంటుంది. డ్రైవింగ్లో నిర్లక్ష్యం చేస్తే ప్రాణాలు పోతాయని వీడియోల్లో వివరిస్తారు. అనంతరం పరీక్ష రాయాల్సి ఉంటుంది. కెమెరా ఉన్న కంప్యూటర్, లేదా ల్యాప్టాప్ ద్వారా ఇంట్లో నుంచే ఈ ఆన్లైన్ పరీక్ష రాయొచ్చు. ఇందులో పాస్ అయితేనే లెర్నింగ్ లైసెన్స్ (LLR) కోసం స్లాట్ బుక్ చేసుకోవచ్చు. తొలుత ఈ విధానాన్ని హైదరాబాద్ (Hyderabad), రంగారెడ్డి జిల్లాల్లో పైలెట్ ప్రాజెక్ట్గా ప్రారంభించనున్నారు. అనంతరం రాష్ట్రవ్యాప్తంగా అమలు చేయాలని యోచిస్తున్నారు.
Driving License Test | డబ్బులిస్తే చాలు
రాష్ట్రంలో డ్రైవింగ్ లైసెన్స్ల జారీ ప్రక్రియలో భారీగా అవినీతి జరుగుతోంది. నేరుగా స్లాట్ బుక్ చేసుకొని లైసెన్స్ కోసం వెళ్తే పలువురు అధికారులు ఎక్కడో ఒక దగ్గర తప్పును ఎంచి మరి క్యాన్సల్ చేస్తారు. అదే ఏజెంట్కు డబ్బులు ఇచ్చామంటే కళ్లు మూసుకొని లైసెన్స్లు ఇస్తారు. ప్రస్తుతం లెర్నర్స్ లైసెన్స్ రిజిస్ట్రేషన్(LLR) పరీక్ష నిర్వహిస్తున్నారు. ట్రాఫిక్ రూల్స్, నిబంధనల గురించి ఇందులో ప్రశ్నలు ఉంటాయి. అయితే చాలా వరకు కార్యాలయా (RTO Office)ల్లో ఈ పరీక్షను అధికారులు, బ్రోకర్లే రాస్తారు. అనంతరం డ్రైవింగ్ టెస్ట్ ఉంటుంది. ఇందులో సైతం డబ్బులు ఇచ్చిన వారు వాహనం నడపకున్నా.. లైసెన్స్లు జారీ చేస్తున్నారనే ఆరోపణలు ఉన్నాయి. ప్రస్తుతం కొత్త విధానంలో పరీక్ష తీసుకొచ్చిన వాహనదారులు రాస్తారా.. లేక ఇతరులతో రాయిస్తారా అనేది చూడాలి.
దీనిని కూడా చదవండి : Jeevan Reddy Resignation | అవమానాలు భరిస్తూ పార్టీలో ఉండలేను : జీవన్రెడ్డి
