అక్షరటుడే, వెబ్డెస్క్: Eluru Child Tragedy | ఏలూరు జిల్లా (Eluru District)లో జరిగిన ఓ విషాదకర ఘటన స్థానికులను కలచివేసింది. కుటుంబ కలహాల వలన తల్లి తీసుకున్న నిర్ణయం అమాయక చిన్నారి ప్రాణాలను బలితీసుకుంది. కూల్డ్రింక్ బాటిల్లో పెట్టిన పురుగుల మందును నిజంగానే కూల్డ్రింక్గా భావించి తాగిన ఐదేళ్ల బాలిక మృతి చెందడం గ్రామాన్ని శోకసంద్రంలో ముంచెత్తింది.
పోలీసులు తెలిపిన వివరాల ప్రకారం, ఏలూరు జిల్లా బుట్టాయగూడెం మండలం (Buttaygudem Mandal) మర్రిగూడేనికి చెందిన పూనెం నాగేంద్రబాబు, అందర్వేదిగూడేనికి చెందిన కుమారికి సుమారు ఎనిమిదేళ్ల క్రితం వివాహమైంది. ఈ దంపతులకు ఒక కుమారుడు, ఐదేళ్ల కుమార్తె రితిక ఉన్నారు. అయితే కొంతకాలంగా భార్యాభర్తల మధ్య తరచూ గొడవలు జరుగుతున్నట్లు గ్రామస్థులు తెలిపారు.
Eluru Child Tragedy | భర్తని బెదిరించాలనే ఉద్దేశంతో..
ఈ నేపథ్యంలో భర్తను భయపెట్టి తన మాట వినిపించుకోవాలని భావించిన కుమారి, పొగాకు తోటలకు పిచికారీ చేసే జిడ్డు మందును కూల్డ్రింక్ బాటిల్ (Cool Drink Bottle)లో నింపి ఇంటి సమీపంలోని కంచె వద్ద ఉంచింది. భర్తను బెదిరించాలనే ఉద్దేశంతో ఇలా చేసినట్లు తెలుస్తోంది. అయితే ఇంటి వద్ద ఆడుకుంటున్న చిన్నారి రితిక ఆ బాటిల్ను గమనించింది. అందులో ఉన్న ద్రవాన్ని కూల్డ్రింక్గా భావించిన ఆమె ఎవరూ గమనించని సమయంలో ఆ సీసాలోని పురుగుల మందును తాగేసింది. కొద్దిసేపటికి ఆమెకు తీవ్రమైన కడుపునొప్పి, వాంతులు మొదలయ్యాయి. చిన్నారి పరిస్థితి విషమించడంతో కుటుంబ సభ్యులు వెంటనే అప్రమత్తమయ్యారు.
Eluru Child Tragedy | క్షణికావేశంలో తల్లి చేసిన చర్య
తక్షణమే రితికను బుట్టాయగూడెం ప్రభుత్వ ఆసుపత్రి (Buttaygudem Government Hospital)కి తరలించారు. వైద్యులు అత్యవసర చికిత్స అందించినప్పటికీ ఆమె ఆరోగ్య పరిస్థితి విషమించింది. చికిత్స పొందుతూ బుధవారం ఉదయం చిన్నారి మృతి చెందింది. ఈ ఘటనతో గ్రామంలో తీవ్ర విషాద వాతావరణం నెలకొంది. క్షణికావేశంలో తల్లి చేసిన చర్య ఒక పసిపాప ప్రాణాలను బలితీసుకోవడం స్థానికులను కలచివేసింది. కుటుంబ సభ్యులు, గ్రామస్తులు చిన్నారి మృతిపై తీవ్ర ఆవేదన వ్యక్తం చేస్తున్నారు. ఈ ఘటనపై సమాచారం అందుకున్న పోలీసులు కేసు నమోదు చేసి దర్యాప్తు ప్రారంభించారు. కుటుంబ కలహాల కారణంగా ఈ దుర్ఘటన చోటుచేసుకున్నట్లు ప్రాథమికంగా భావిస్తున్నట్లు పోలీసులు తెలిపారు. చిన్నారి మృతదేహాన్ని పోస్టుమార్టం నిమిత్తం ఆసుపత్రికి తరలించారు.
ఇది కూడా చదవండి..: Temple Circuit | బాసర నుంచి భద్రాచలం వరకు టెంపుల్ సర్క్యూట్
