అక్షరటుడే, వెబ్డెస్క్: Floor Sitting Benefits | నేటి ఆధునిక జీవనశైలిలో డైనింగ్ టేబుల్ సంస్కృతి పెరిగిపోయింది. దీనివల్ల మన పూర్వీకులు అనుసరించిన నేల మీద కూర్చొని తినే సంప్రదాయం క్రమంగా కనుమరుగవుతోంది. అయితే, కేవలం కుర్చీలో కూర్చొని తినడం కంటే నేల మీద పద్మాసనంలో కూర్చుని భోజనం చేయడం వల్ల శరీరానికి ఎంతో మేలు జరుగుతుందని ఆరోగ్య నిపుణులు స్పష్టం చేస్తున్నారు. ఇది కేవలం ఒక ఆచారం మాత్రమే కాదు, దీని వెనుక శాస్త్రీయ కారణాలు కూడా దాగి ఉన్నాయి. అవేంటో ఇప్పుడు తెలుసుకుందాం.
Floor Sitting Benefits | జీర్ణక్రియ మెరుగుపడుతుంది:
నేల మీద ప్లేట్ పెట్టుకుని భోజనం చేసే సమయంలో మనం ప్రతి ముద్దకు ముందుకు వంగి, మళ్ళీ వెనక్కి వస్తుంటాం. ఈ నిరంతర కదలిక వల్ల పొట్టలోని కండరాలు ఉత్తేజితమై, జీర్ణక్రియకు అవసరమైన ఆమ్లాలు (Digestive juices) వేగంగా విడుదలవుతాయి. దీనివల్ల తిన్న ఆహారం త్వరగా అరగడమే కాకుండా, గ్యాస్, ఎసిడిటీ వంటి సమస్యలు దరిచేరవు.
Floor Sitting Benefits | కండరాల దృఢత్వం:
నేల మీద కాళ్లు ముడుచుకుని కూర్చోవడం వల్ల వెన్నెముక, పొత్తికడుపు, పిరుదుల చుట్టూ ఉండే కండరాలు సాగుతాయి. ఇది శరీరానికి ఒక రకమైన వ్యాయామంలా పనిచేస్తుంది. రోజూ ఇలా కూర్చొని తినడం వల్ల కండరాలు ఫ్లెక్సిబుల్గా తయారవ్వడమే కాకుండా, కీళ్ల నొప్పులు, శారీరక అసౌకర్యం నుండి ఉపశమనం లభిస్తుంది.
బరువును నియంత్రించవచ్చు:
మనం తిన్న ఆహారం వల్ల పొట్ట నిండిందనే సంకేతాన్ని ‘వేగస్ నాడి’ మెదడుకు చేరవేస్తుంది. డైనింగ్ టేబుల్పై కూర్చున్నప్పటి కంటే నేల మీద కూర్చున్నప్పుడు ఈ నాడి అత్యంత ప్రభావవంతంగా పనిచేస్తుందని పరిశోధనలు చెబుతున్నాయి. దీనివల్ల మనం అతిగా తినకుండా ఆగిపోతాము, ఫలితంగా బరువు పెరగకుండా అదుపులో ఉంచుకోవచ్చు.
మానసిక ప్రశాంతత:
కుటుంబ సభ్యులందరూ కలిసి నేల మీద కూర్చొని భోజనం చేయడం వల్ల మనసు ప్రశాంతంగా మారుతుంది. ఇది ఒకరితో ఒకరు మాట్లాడుకోవడానికి, ఒకరి భావాలను మరొకరు పంచుకోవడానికి మంచి అవకాశాన్ని కల్పిస్తుంది. పరోక్షంగా ఇది కుటుంబ బంధాలను మరింత పటిష్టం చేస్తుంది.
తీవ్రమైన మోకాళ్ల నొప్పులు, కీళ్ల సమస్యలు లేదా నడుము నొప్పి ఉన్నవారు మాత్రం వైద్యుల సూచన మేరకు తమకు సౌకర్యంగా ఉండే చోట కూర్చొని భోజనం చేయడం మంచిది.
