అక్షరటుడే, వెబ్డెస్క్: gongura boti recipe | తెలుగు వారి వంటకాల్లో గోంగూరకు ఉన్న ప్రత్యేకతే వేరు. గోంగూర చికెన్, మటన్ గురించి అందరికీ తెలిసిందే కానీ.. పుల్లని గోంగూరతో బోటీని కలిపి వండితే వచ్చే ఆ రుచి, సువాసన అద్భుతం.
ముఖ్యంగా జొన్న రొట్టె, రాగి ముద్ద లేదా వేడి అన్నంలో ఈ గోంగూర బోటీని కలుపుకుని తింటే ఆ మజాయే వేరు. రుచితో పాటు ఆరోగ్యానికి కూడా ఎంతో మేలు చేసే ఈ సంప్రదాయ వంటకాన్ని పక్కా కొలతలతో, నీచు వాసన రాకుండా ఎలా తయారు చేసుకోవాలో ఇప్పుడు వివరంగా చూద్దాం.
gongura boti recipe | కావలసిన పదార్థాలు:
ప్రధానమైనవి: శుభ్రం చేసిన బోటీ (మేక లేదా గొర్రె) 500 గ్రాములు,
పుల్లని గోంగూర: 3 నుంచి 4 పెద్ద కట్టలు.
ఉల్లిపాయలు: 2 పెద్దవి (సన్నగా తరిగినవి)
పచ్చిమిర్చి: 5 – 6 (మధ్యలోకి చీల్చినవి)
అల్లం-వెల్లుల్లి పేస్ట్: 2 టేబుల్ స్పూన్లు
కారం: 3 టీస్పూన్లు (మీ ఘాటుకు తగినట్లు)
పసుపు: అర టీస్పూన్
ధనియాల పొడి: 1 టీస్పూన్
గరం మసాలా: 1 టీస్పూన్
నూనె: 4 టేబుల్ స్పూన్లు
ఉప్పు: రుచికి సరిపడా
కొత్తిమీర: అర కప్పు (సన్నగా తరిగినది)
gongura boti recipe | తయారీ విధానం (Step-by-Step):
బోటీని శుభ్రం చేయడం (చాలా ముఖ్యం): బోటీ కూర రుచిగా రావాలంటే క్లీనింగ్ అనేది అత్యంత కీలకం. మొదట బోటీని మామూలు నీళ్లతో కడగాలి. ఆ తర్వాత ఒక గిన్నెలో నీళ్లు బాగా మరిగించి, అందులో బోటీ ముక్కలను వేసి ఒక 5 నిమిషాలు ఉంచాలి. ఆ వేడి నీళ్ల వల్ల బోటీ పైన ఉండే పొర సులభంగా వచ్చేస్తుంది. చాకుతో లేదా చెంచాతో ఆ పొరను గీరి తీసేసి, మళ్లీ శుభ్రంగా కడగాలి. ఇలా చేస్తే నీచు వాసన రాకుండా కూర కమ్మగా ఉంటుంది.
ఉడికించడం: శుభ్రం చేసిన బోటీని కుక్కర్లో వేసి అందులో పసుపు, కొద్దిగా ఉప్పు, అల్లం-వెల్లుల్లి పేస్ట్, తగినన్ని నీళ్లు పోసి 5 నుంచి 6 విజిల్స్ వచ్చే వరకు ఉడికించాలి.
gongura boti recipe | గోంగూర ప్రిపరేషన్:
గోంగూర ఆకులను వేరు చేసి శుభ్రంగా కడిగి, కొద్దిగా నూనెలో మగ్గించాలి. ఆకులు మెత్తగా అయ్యాక వాటిని పేస్టులా చేసి పక్కన పెట్టుకోవాలి.
కూర వండటం: ఇప్పుడు ఒక కడాయిలో నూనె వేసి వేడయ్యాక ఉల్లిపాయలు, పచ్చిమిర్చి వేసి వేయించాలి. ఉల్లిపాయలు గోల్డెన్ కలర్లోకి రాగానే ఉడికించి పెట్టుకున్న బోటీ ముక్కలను వేయాలి.
మసాలాల కలయిక: ఇందులో కారం, గరం మసాలా వేసి ముక్కలకు పట్టేలా వేయించాలి. చివరగా మనం సిద్ధం చేసుకున్న గోంగూర పేస్టును వేసి బాగా కలిపి, తక్కువ మంట మీద కాసేపు ఉడికించాలి.
ఫినిషింగ్: కూర దగ్గరకు పడి నూనె పైకి తేలుతున్నప్పుడు కొత్తిమీర చల్లుకుని దించుకోవాలి. అంతే.. నోరూరించే గోంగూర బోటీ సిద్ధం.
ఇది కూడా చదవండి: Muskmelon | సమ్మర్ స్పెషల్ తర్బూజా.. ఈ పండు చేసే మ్యాజిక్ మామూలుగా లేదుగా!
