అక్షరటుడే, వెబ్డెస్క్ : Heart Problems in Children | ప్రస్తుతం వయసుతో సంబంధం లేకుండా గుండెపోట్లు పెరిగాయి. యువత, చిన్నారులు సైతం గుండెపోటుతో చనిపోతున్నారు. పాఠశాలలో ఆడుకుంటూ, పాఠాలు వింటూ గతంలో పలువురు విద్యార్థులు కుప్పకూలారు.
రాజస్థాన్ (Rajasthan)లో ఇటీవల తొమ్మిదేళ్ల బాలిక గుండెపోటు (Heart Problems in Children)తో మృతి చెందింది. ఐదో తరగతి చదవుతున్న చిన్నారి పాఠశాల మైదానంలో ఆడుకుంటూ ఒక్కసారిగా కుప్పకూలింది. వెంటనే పాఠశాల సిబ్బంది బాలికను ఆస్పత్రికి తరలించగా.. అప్పటికే మృతి చెందినట్లు వైద్యులు తెలిపారు. ఈ ఘటన ఈ నెల 23న చోటు చేసుకుంది. సదరు బాలిక సోదరుడు సైతం ఇదే విధంగా మరణించడం గమనార్హం. ఇటీవల చిన్నారుల్లో గుండెపోట్లు పెరగడంతో తల్లిదండ్రులు ఆందోళన చెందుతున్నారు. ఈ క్రమంలో పిల్లల్లో హార్ట్ ఎటాక్ కారణాలు, లక్షణాలను వైద్యులు వివరించారు.
Heart Problems in Children | పుట్టుకతో..
పిల్లల్లో గుండె ఒక్కసారిగా ఆగిపోవడం, హృదయ సంబంధ పరిమితుల కారణంగా జబ్బులు రావడం చాలా ప్రమాదకర పరిస్థితిగా వైద్యులు పేర్కొంటున్నారు. దీనిని సడెన్ కార్డియాక్ అరెస్ట్ (SCA) అని పిలుస్తారు. కొందరు పిల్లల్లో పుట్టుకతో గుండె సంబంధ సమస్యలు ఉంటాయి. అయితే వాటి గురించి తల్లిదండ్రులకు తెలియకపోవడంతో పిల్లలు హార్ట్ఎటాక్కు గురయ్యే అవకాశం ఉంది. గుండె నాళాల్లో పరిమాణం తప్పుగా ఉండటం వంటివి రక్తప్రవాహాన్ని అడ్డుకునే అవకాశం ఉంటుంది. గుండె రక్తం పంపింగ్ చేసే వేగం కొందరిలో ఒక్కోసారి మారిపోతు ఉంటుంది. ఇది కూడా కార్డియాక్ అరెస్ట్కు కారణమవుతుంది.
Heart Problems in Children | వాపు రావడంతో..
వైరల్ ఇన్ఫెక్షన్ ఫ్లూ, డెంగీ వంటి వ్యాధులతో గుండె కండరాల్లో వాపు వచ్చే అవకాశం ఉంది. కొన్నిసార్లు పిల్లల్లో Long QT syndrome, Wolff-Parkinson-White వంటి రోగాలు ఉంటాయి. ఇవి గుండె పనితీరులో మార్పులు తెస్తాయి. అలాగే శరీరానికి గట్టిగ దెబ్బలు తగలడం, ఊపిరితిత్తుల వ్యవస్థలో పెద్ద ఇబ్బంది కూడా హార్ట్ ఎటాక్లకు కారణం అవుతాయి. సాధారణంగా పిల్లల్లో సడెన్ కార్డియాక్ అరెస్ట్ అరుదుగా వస్తుంది. అది వస్తే మాత్రం ప్రమాదకరంగా ఉంటుంది.
లక్షణాలు
పిల్లలో సడెన్ కార్డియాక్ అరెస్ట్కు ముందు కొన్ని లక్షణాలు కనిపిస్తాయి. శరీరం బలహీనంగా ఉంటుంది. వెంటనే అలసిపోతారు. కాళ్లు, చేతుల్లో వాపు వస్తుంది. ఈ లక్షణాలు కనిపిస్తే తల్లిదండ్రులు అప్రమత్తం కావాలి. వెంటనే వైద్యులను సంప్రదించాలి. వైద్యులు పలు రకాల పరీక్షలు చేసి గుండె సమస్యలను గుర్తిస్తారు. ఈసీజీ, ఎకో టూడీ, రక్తంలో ఆక్సీజన్ స్థాయి చెక్ చేస్తారు. అవసరం అయితే కార్డియాక్ ఎంఆర్ఐ, సిటీ స్కాన్ కూడా చేస్తారు. పిల్లలు గుండెపోటుకు గురైతే వెంటనే సీపీఆర్ చేయాలి.
తీసుకోవాల్సిన జాగ్రత్తలు
పిల్లలో గుండె సంబంధ సమస్యలపై తల్లిదండ్రులు అప్రమత్తంగా ఉండాలి. అప్పుడప్పుడు పిడియాట్రిక్ చెకప్లతో పాటు కార్డీయాలజీ పరీక్షలు చేయించాలి. కుటుంబంలో ఎవరికైన గుండె సంబంధ సమస్యలు ఉంటే వారు మరిన్ని జాగ్రత్తలు తీసుకోవాలి. మంచి ఆహారం, క్రీడలు, మంచి నిద్రలు హృదయ ఆరోగ్యానికి అవసరం.
– డాక్టర్ సందీప్రావు, గుండె వైద్య నిపుణులు
