అక్షరటుడే, ఇందూరు : Indalwai Student | ఇందల్వాయిలోని ఏకలవ్య మోడల్ రెసిడెన్షియల్ స్కూల్లో (Ekalavya Model Residential School) విద్యార్థి రామ్ చరణ్ (15) ఆత్మహత్య చేసుకున్న ఘటనను కలెక్టర్ ఇలా త్రిపాఠి తీవ్రంగా పరిగణించారు. ఘటనపై ప్రాథమిక విచారణ జరిపించారు.
ప్రాంతీయ సమన్వయకర్త గంగారాం నాయక్ నేతృత్వంలో ఇతర జిల్లాల నుంచి వచ్చిన ఏకలవ్య మోడల్ స్కూళ్ల ప్రిన్సిపాళ్లు శ్రీనివాస్ స్వామి, డాక్టర్ సైదా జైనబ్ ఫణి కుమార్, డాక్టర్ జ్యోతి ప్రాథమికంగా విచారణ జరిపి నివేదిక సమర్పించారు. ఈ నివేదిక ఆధారంగా ఇందల్వాయి ఏకలవ్య మోడల్ రెసిడెన్షియల్ స్కూల్ ప్రిన్సిపాల్ రమేష్ కుమార్ను, హౌస్ మాస్టర్ కుల్దీప్ యాదవ్, హాస్టల్ వార్డెన్ విశ్వంభర్, మెస్ ఇన్చార్జి ఆకాష్ యాదవులను సస్పెండ్ (Suspend) చేస్తూ కలెక్టర్ బుధవారం ఉత్తర్వులు జారీ చేశారు.
Indalwai Student | సమస్యలను ధైర్యంగా ఎదుర్కోవాలి
జీవితంలో అనేక సమస్యలు వస్తుంటాయని వాటిని ధైర్యంగా ఎదుర్కోవాలని కలెక్టర్ ఇలా త్రిపాఠి (Collector Ila Tripathi) సూచించారు. ఇందల్వా ఏకలవ్య మోడల్ రెసిడెన్షియల్ స్కూల్ను బుధవారం ఆమె సందర్శించారు. అధ్యాపకులు, విద్యార్థులతో భేటీ అయ్యారు. రామ్ చరణ్ ఆత్మహత్య సంఘటనపై వివరాలు తెలుసుకున్నారు. ఈ సందర్భంగా కలెక్టర్ మాట్లాడుతూ… రామ్ చరణ్ బలవన్మరణానికి పాల్పడటం ఎంతో బాధ కలిగించిందన్నారు. ఆత్మహత్య ఆలోచనలు దరిచేరకుండా ఏకాగ్రతతో చదువుపై దృష్టి కేంద్రీకరించాలన్నారు. తప్పుడు నిర్ణయాలతో జీవితాన్ని అంతం చేసుకోవద్దని, తల్లిదండ్రులకు కడుపుకోత మిగిల్చవద్దని చెప్పారు. కలెక్టర్ వెంట ఆర్సీవో గంగారాం నాయక్ తదితరులున్నారు.
ఇది కూడా చదవండి : Eye Camp to Drivers | డ్రైవర్లకు కంటి చూపు చాలా ముఖ్యం : ఎస్పీ రాజేష్ చంద్ర
