అక్షరటుడే, వెబ్డెస్క్: Indian Stock Market Rally | పశ్చిమాసియాలో జరుగుతున్న యుద్ధం కారణంగా స్టాక్ మార్కెట్ అతలాకుతలమవుతోంది. అమెరికా, ఇరాన్ల మధ్య యుద్ధం తీవ్ర రూపం దాల్చడంతో గ్యాస్, క్రూడ్ ఆయిల్ (Crude Oil) సరఫరాకు తీవ్ర అంతరాయం ఏర్పడి అన్ని దేశాల ఆర్థిక వ్యవస్థలు ప్రభావితమవుతున్నాయి.
రూపాయి బలహీనతతో విదేశీ సంస్థాగత మదుపరులు పెట్టుబడులను భారీగా ఉపసంహరిస్తున్నారు. దీంతో మన మార్కెట్లపై భారీగా అమ్మకాల ఒత్తిడి ఉంటోంది. సోమవారం సైతం నష్టాలతో ప్రారంభమై భారీ నష్టాల దిశగా సాగాయి. అయితే కనిష్టాల వద్ద కొనుగోలుదారులు వాల్యూ బయ్యింగ్కు మొగ్గు చూపడంతో సూచీలు కోలుకుని భారీ లాభాలతో ముగిశాయి.
Indian Stock Market Rally | తీవ్ర ఒడిదుడుకులు..
దేశీయ స్టాక్ మార్కెట్ (Domestic Stock Market) సోమవారం తీవ్ర ఒడిదుడుకులను ఎదుర్కొంది. ఉదయం సెన్సెక్స్ 148 పాయింట్ల నష్టంతో ప్రారంభమై వెంటనే కోలుకుని 568 పాయింట్లు పెరిగింది. గరిష్టాల వద్ద ఇన్వెస్టర్లు అమ్మకాలకు పాల్పడడంతో ఒక్కసారిగా 1,034 పాయింట్లు పతనమైంది. నిఫ్టీ 35 పాయింట్ల నష్టంతో ప్రారంభమై 168 పాయింట్లు పెరిగింది. ఇంట్రాడే గరిష్టాలనుంచి 329 పాయింట్లు పడిపోయి ఒకదశలో 23 వేల పాయింట్ల దిగువకు వచ్చింది. కనిష్టాల వద్ద కొనుగోళ్ల మద్దతు లభించడంతో సూచీలు కోలుకున్నాయి. ఇంట్రాడే కనిష్టాలనుంచి సెన్సెక్స్ 1,934 పాయింట్లు, నిఫ్టీ 329 పాయింట్లు పెరిగాయి. చివరికి సెన్సెక్స్ 938 పాయింట్ల లాభంతో 75,502 వద్ద, నిఫ్టీ 257 పాయింట్ల లాభంతో 23,408 వద్ద స్థిరపడ్డాయి.
Indian Stock Market Rally | రాణించిన ఆటో, బ్యాంకింగ్ రంగాలు..
ఆటో, బ్యాంకింగ్ అండ్ ఫైనాన్షియల్ రంగాల షేర్లు రాణించడంతో సూచీలు పరుగులు తీశాయి. నిఫ్టీలో ఆటో ఇండెక్స్ 1.67 శాతం, ఫైనాన్షియల్ 1.32 శాతం, బ్యాంక్ నిఫ్టీ 1.22 శాతం, ఎఫ్ ఎంసీజీ ఇండెక్స్ 1.14 శాతం పెరిగాయి. రియాలిటీ 1.57 శాతం, ఆయిల్ అండ్ గ్యాస్ ఇండెక్స్ 1.56 శాతం, ఎనర్జీ 1.36 శాతం, ఫార్మా 1.25 శాతం, క్యాపిటల్ గూడ్స్ ఇండెక్స్ 0.91 శాతం నష్టపోయాయి.
Indian Stock Market Rally | అడ్వాన్సెస్ అండ్ డిక్లయిన్స్..
బీఎస్ఈలో నమోదైన కంపెనీలలో 1,509 కంపెనీలు లాభపడగా 2,860 స్టాక్స్ నష్టపోయాయి. 168 కంపెనీలు ఫ్లాట్గా ముగిశాయి. 81 కంపెనీలు 52 వారాల గరిష్టాల వద్ద ఉండగా.. 907 కంపెనీలు 52 వారాల కనిష్టాల వద్ద కదలాడాయి. 11 కంపెనీలు అప్పర్ సర్క్యూట్ను, 12 కంపెనీలు లోయర్ సర్క్యూట్ను తాకాయి.
Top Gainers : బీఎస్ఈ సెన్సెక్స్లో 24 కంపెనీలు లాభాలతో, 6 కంపెనీలు నష్టాలతో ముగిశాయి. అల్ట్రాటెక్ సిమెంట్ 4.22 శాతం, ట్రెంట్ 3.01 శాతం, హెచ్డీఎఫ్ సీ బ్యాంక్ 2.88 శాతం, ఎంఅండ్ ఎం 2.86 శాతం, ఎటర్నల్ 2.80 శాతం లాభపడ్డాయి.
Top Losers : బీఈఎల్ 2.32 శాతం, సన్ఫార్మా 1.25 శాతం, పవర్గ్రిడ్ 0.98 శాతం, ఎయిర్టెల్ 0.82 శాతం, ఎన్టీపీసీ 0.59 శాతం నష్టపోయాయి.
ఇది కూడా చదవండి..: Lava Bold 2 5G | పవర్ఫుల్ ప్రాసెసర్తో బడ్జెట్ ధరలో ఫోన్
