అక్షరటుడే, వెబ్డెస్క్: Jeevan Reddy Resignation | మాజీ మంత్రి, కాంగ్రెస్ సీనియర్ నాయకుడు జీవన్రెడ్డి కాంగ్రెస్ పార్టీకి రాజీనామా చేశారు. అనుచరులు, మద్దతుదారుల సమక్షంలో రాజీనామా లేఖను విడుదల చేశారు.
జీవన్రెడ్డి కొంతకాలంగా అధిష్టానంపై అసంతృప్తితో ఉన్న విషయం తెలిసిందే. బీఆర్ఎస్ నుంచి కాంగ్రెస్లో చేరిన జగిత్యాల ఎమ్మెల్యే సంజయ్కుమార్ (Jagtial MLA Sanjay Kumar)కు ప్రాధాన్యత ఇచ్చి, తనను పట్టించుకోకపోవడంపై ఆయన ఆగ్రహం వ్యక్తం చేశారు. ఈ క్రమంలో పార్టీ మారుతానని ప్రకటించారు. మంత్రులు, ఏఐసీసీ పెద్దలు బుజ్జగించినా ఆయన వెనక్కి తగ్గలేదు. బుధవారం జగిత్యాలలో కార్యకర్తలతో సమావేశం అయ్యారు. తాను పార్టీకి రాజీనామా చేస్తున్నట్లు ప్రకటించారు.
Jeevan Reddy Resignation | బాధతో పార్టీని వీడుతున్నా..
పార్టీ ఫిరాయింపులు మంచిది కాదని చెప్పినా వినిపించుకోలేదని జీవన్ రెడ్డి (Jeevan Reddy) అన్నారు. జగిత్యాలలో ఎమ్మెల్యేను పార్టీలోకి తీసుకోవద్దని చెప్పినా వినలేదని పేర్కొన్నారు. తాను, తన కార్యకర్తలు అనేక ఇబ్బందులు, అవమానాలు ఎదుర్కొన్నామని ఆవేదన వ్యక్తం చేశారు. తీవ్రమైన బాధతో పార్టీని వీడుతున్నాని ప్రకటించారు.
Jeevan Reddy Resignation | రేవంత్రెడ్డిని ఎదిరించి పోరాటం చేస్తా
దానం నాగేందర్ (Danam Nagender) బీఆర్ఎస్ ఎమ్మెల్యేగా ఉంటూ, కాంగ్రెస్ గుర్తుపై ఎంపీగా పోటీ చేయడం దేనికి సంకేతమని జీవన్రెడ్డి ప్రశ్నించారు. ఆయనను రాజీనామా చేయించి పోటీ చేయించాల్సిందని చెప్పారు. అందుకే సికింద్రాబాద్ ఎంపీ సీటును కాంగ్రెస్ పార్టీ (Congress Party) ఓడిపోయిందని తెలిపారు. సీఎం రేవంత్ రెడ్డి నిర్ణయాలతో ఆయన సొంత పార్లమెంట్ మహబూబ్ నగర్లో పార్టీ ఓడిపోయిందన్నారు. తాను రేవంత్ రెడ్డిని ఎదిరించి పోరాటం చేస్తానని జీవన్రెడ్డి అన్నారు. ఆయనతో అణగదొక్కించుకోవడం కంటే పోరాటం చేస్తే తనకు పోయేది ఏమి లేదన్నారు.
Jeevan Reddy Resignation | వారికే పదవులు
సీఎం రేవంత్రెడ్డి (CM Revanth Reddy) అడుగులకు మడుగులు ఒత్తే వారికి పదవులు ఇస్తున్నారని జీవన్రెడ్డి ఆగ్రహం వ్యక్తం చేశారు. ప్రశ్నించే వారిని పక్కన పెడుతున్నారన్నారు. వేం నరేందర్ రెడ్డి ఎవడని తీవ్ర వ్యాఖ్యలు చేశారు. ఆయన కాంగ్రెస్ పార్టీకి చేసిన సేవ ఏమిటని ప్రశ్నించారు. బాన్సువాడ ఎమ్మెల్యే పోచారం శ్రీనివాస్ రెడ్డికి కాంగ్రెస్ పార్టీకి ఏం సంబంధం అని నిలదీశారు. బతకడానికి వచ్చిన పోచారం శ్రీనివాస్ రెడ్డికి ప్రభుత్వ సలహాదారు పదవి ఇచ్చారని ఆగ్రహం వ్యక్తం చేశారు. ఆయన ప్రభుత్వ సలహాదారుడిగా నియామకం అయిన తర్వాత ఇచ్చిన సలహాలు ఏమైనా ఉన్నాయా అని ఎద్దేవా చేశారు.
Jeevan Reddy Resignation | ఎంతమందిని తొక్కుతావు
తనకు ఎవరైనా అడ్డం వస్తే తొక్కుతా అని రేవంత్ రెడ్డి అంటున్నారని జీవన్రెడ్డి అన్నారు. ఎంతమందిని తొక్కుతారని ప్రశ్నించారు. జగిత్యాలలో ఏ శక్తి తనను ఆపలేదన్నారు. కొంతమంది లాగా ముఖ్యమంత్రి అయ్యేందుకు తాను కాంగ్రెస్ పార్టీలోకి రాలేదన్నారు. రేవంత్రెడ్డి తమను కూడా బతకనివ్వాలన్నారు. విధి లేని పరిస్థితుల్లో రాజీనామా నిర్ణయం తీసుకున్నట్లు తెలిపారు. తాను రోడ్డు ఎక్కితే ఎవ్వరూ పట్టించుకోలేదని ఆవేదన వ్యక్తం చేశారు.
ఇది కూడా చదవండి..: Sircilla Weavers Dues | నేత కార్మికుల విద్యుత్ బకాయిలు రద్దు చేయాలి : కేటీఆర్
