అక్షరటుడే, వెబ్డెస్క్ : Jeevan Reddy Resignation | కాంగ్రెస్ సీనియర్ నాయకుడు, మాజీ మంత్రి జీవన్రెడ్డి ఆ పార్టీకి రాజీనామా చేయనున్నారు. త్వరలో పార్టీని వీడనున్నట్లు ఆయన ప్రకటించారు. ఉగాది, రంజాన్ అనంతరం తన అనుచరులతో చర్చించి నిర్ణయం తీసుకుంటానని ప్రకటించారు.
కాంగ్రెస్లో జీవన్రెడ్డి సుదీర్ఘ కాలంగా కొనసాగుతున్నారు. ఆయన 1983లో తొలిసారి టీడీపీ నుంచి ఎమ్మెల్యేగా గెలిచారు. తొలిసారి గెలిచి ఎన్టీఆర్ మంత్రివర్గంలో మంత్రిగా పనిచేశారు. 1985లో ఆయన కాంగ్రెస్లో చేరారు. ఆ ఎన్నికల్లో ఓడిపోయిన జీవన్రెడ్డి 1989లో రెండోసారి ఎమ్మెల్యేగా గెలిచారు. మొత్తం ఆరుసార్లు జగిత్యాల (Jagtial) నుంచి విజయం సాధించారు. ఎన్టీఆర్, నాదెండ్ల భాస్కర్రావు, వైఎస్ రాజశేఖర్ రెడ్డి మంత్రివర్గాల్లో పని చేశారు.
Jeevan Reddy Resignation | సంజయ్ రాకతో..
సుదీర్ఘ కాలంగా కాంగ్రెస్ (Congress)కు సేవలు అందించిన జీవన్రెడ్డి కొంతకాలంగా ఆ పార్టీలో ఇమడలేకపోతున్నారు. బీఆర్ఎస్ (BRS) అధికారంలో ఉన్న సమయంలో సైతం పార్టీని అట్టిపెట్టుకొని ఉన్న ఆయన కాంగ్రెస్ గెలిచాక.. వీడాలని నిర్ణయించుకోవడం గమనార్హం. జగిత్యాల ఎమ్మెల్యేగా అసెంబ్లీ ఎన్నికల్లో బీఆర్ఎస్ నుంచి పోటీ చేసిన సంజయ్ విజయం సాధించారు. జీవన్రెడ్డి ఓటమి పాలు అయ్యారు. అనంతరం సంజయ్ కాంగ్రెస్లో చేరడంతో జీవన్రెడ్డికి ప్రాధాన్యత తగ్గింది. రెండు వర్గాల మధ్య కొంతకాలంగా పొసగడం లేదు. ఎమ్మెల్యే సంజయ్ (MLA Sanjay)పై జీవన్రెడ్డి గతంలో అనేకసార్లు బహిరంగంగా విమర్శలు చేశారు. అయితే పార్టీ అధిష్టానం ఎమ్మెల్యేకు అనుకూలంగా వ్యవహరిస్తుండటంతో జీవన్రెడ్డి పార్టీ వీడాలని నిర్ణయించుకున్నారు.
Jeevan Reddy Resignation | మున్సిపల్ ఎన్నికల్లో..
ఇటీవల జరిగిన మున్సిపల్ ఎన్నికల్లో (Municipal Elections) జీవన్రెడ్డికి పార్టీలో అవమానం జరిగింది. ఆయన అనుచరులకు టికెట్లు ఇవ్వలేదు. ఎమ్మెల్యే అనుచరులు ఎక్కవ మంది బీఫామ్లు ఇచ్చారు. దీంతో జీవన్రెడ్డి తన అనుచరులను స్వతంత్రంగా బరిలో నిలిపి గెలిపించుకున్నారు. అనంతరం ఛైర్పర్సన్ పదవి విషయంలో సైతం జీవన్రెడ్డికి కాంగ్రెస్ మొండి చేయి చూపింది. దీంతో ఆయన రాజీనామాకు సిద్ధం అయ్యారు. ఏళ్లుగా పార్టీ సేవలు అందించానని, ప్రస్తుతం ప్రభుత్వంలో జరుగుతున్న పరిణామాల నేపథ్యంలో ఇమడలేకపోతున్నానని ఆదివారం ఆయన తెలిపారు.
Jeevan Reddy Resignation | గులాబీ గూటికి?
రంజాన్, ఉగాది పండుగల అనంతరం అభిమానులతో సమావేశమై ఏ పార్టీలోకి వెళ్లాలో నిర్ణయం తీసుకుంటానని జీవన్రెడ్డి తెలిపారు. అయితే ఆయన బీఆర్ఎస్లో చేరుతారని ప్రచారం జరుగుతోంది. ఈ నెల 27న కేసీఆర్ సమక్షంలో జీవన్ రెడ్డి గులాబీ కండువా కప్పుకోనున్నట్లు సమాచారం. బీఆర్ఎస్లో ఆయనకు సముచిత గౌరవం కల్పిస్తామని హామీ ఇచ్చినట్లు తెలిసింది. తాజాగా ఆయన సోషల్ మీడియా హ్యాండిల్ నుంచి కాంగ్రెస్ పేరును సైతం తొలగించారు.
ఇది కూడా చదవండి..: KTR Assembly Attack | శాసనసభలో ప్రభుత్వాన్ని నిలదీస్తాం : కేటీఆర్
