అక్షరటుడే, వెబ్డెస్క్ : Jresta Villas RERA | రియల్ ఎస్టేట్ రెగ్యులేటరీ అథారిటీ (TG RERA) కోకాపేటలోని జ్రెస్టా విల్లాస్ ప్రాజెక్ట్ ప్రమోటర్లకు షాక్ ఇచ్చింది. విల్లాలను అమ్మడం, బదిలీ చేయడంపై నిషేధం విధించింది.
రంగారెడ్డి (Rangareddy) జిల్లా గాంధీపేట మండలం, కోకాపేట (Kokapet) గ్రామంలోని సర్వే నెం. 84లో ఉన్న ఈ ప్రాజెక్ట్లోని విల్లా కొనుగోలుదారులు దాఖలు చేసిన నాలుగు ఫిర్యాదులపై రెరా విచారణ జరిపింది. ఈ మేరకు మధ్యంతర ఉత్తర్వులు జారీ చేసింది. భూ యజమానులు, ఒక ప్రైవేట్ డెవలపర్ సంస్థ కలిసి ఈ గేటెడ్ కమ్యూనిటీ ప్రాజెక్ట్ను అభివృద్ధి చేశాయి. అయితే ఇది RERA కింద నమోదు కాలేదు. 6 ఎకరాల 14 గుంటల విస్తీర్ణంలో 42 విల్లాలతో ఈ ప్రాజెక్ట్ చేపట్టారు. దీనికి హెచ్ఎండీఏ (HMDA) అనుమతి తీసుకున్నారు. అయితే రెరా నుంచి పర్మిషన్ తీసుకోలేదు. అయినా కూడా విల్లాలను మార్కెటింగ్ చేయడం, అమ్మడంపై రెరా ఆగ్రహం వ్యక్తం చేసింది.
Jresta Villas RERA | నిర్మాణంలో జాప్యం..
ఈ విల్లాలు కొనడానికి 2016 నుంచి 2020 మధ్య ఒప్పందాలు కుదుర్చుకుని కొందరు ఒక్కో విల్లాకు రూ.3.44 కోట్ల నుంచి రూ.5 కోట్ల వరకు చెల్లించారు. అయితే నిర్ణిత వ్యవధిలో విల్లాలు పూర్తి చేసి వారికి అప్పగించలేదని బాధితులు ఫిర్యాదు చేశారు. 2022 నాటికి ప్రాథమిక నిర్మాణ పనులు మాత్రమే పూర్తయ్యాయని, పాక్షికంగా పూర్తయిన విల్లాలను స్వాధీనం చేసుకోవలసి వచ్చిందని పేర్కొన్నారు. ప్రమోటర్లు ప్రాజెక్టును మధ్యలోనే వదిలేసి, సేకరించిన నిధులను మళ్లించారని ఆరోపించారు. ఈ క్రమంలో విచారణ చేపట్టిన రెరా మిగిలిన యూనిట్ల అమ్మకంపై నిషేధం విధించింది. విచారణను ఏప్రిల్ 8కి వాయిదా వేసింది.
ఇది కూడా చదవండి : Encroachment Drive | ఫుట్పాత్లపై ఆక్రమణల తొలగింపు.. సికింద్రాబాద్లో ఉద్రిక్తత
