అక్షరటుడే, వెబ్డెస్క్: Kalvakuntla Kavitha arrest | తెలంగాణ జాగృతి అధ్యక్షురాలు కల్వకుంట్ల కవితను పోలీసులు అరెస్ట్ చేశారు. ఖమ్మంలో నిరాహార దీక్ష చేస్తున్న ఆమెను హైదరాబాద్ తరలించారు.
ఖమ్మం (Khammam) వెలుగుమట్లలో ఇటీవల పలువురి ఇళ్లను ప్రభుత్వం కూల్చి వేసిన విషయం తెలిసిందే. బాధితులకు న్యాయం చేయాలని డిమాండ్ చేస్తూ కల్వకుంట్ల కవిత ఖమ్మం అంబేడ్కర్ భవన్లో ధర్మ సమాజ్ పార్టీ అధ్యక్షుడు విశారదన్ మహరాజ్తో కలిసి నిరాహార దీక్ష చేపట్టారు. సోమవారం రాత్రి దీక్ష ప్రారంభించారు. అయితే మంగళవారం తెల్లవారు జామున కవిత, విశారదన్తో పాటు నిరాహార దీక్ష చేపట్టిన వారిని పోలీసులు అరెస్ట్ చేశారు. అనంతరం హైదరాబాద్ (Hyderabad) తరలించారు.
Kalvakuntla Kavitha arrest | దీక్ష కొనసాగింపు
హైదరాబాద్ చేరుకున్న కల్వకుంట్ల కవిత బంజారాహిల్స్ (Banjara Hills) జాగృతి ప్రధాన కార్యాలయంలో తన దీక్ష కొనసాగిస్తున్నారు. వెలుగుమట్ల భూబాధితులకు న్యాయం చేయాలని డిమాండ్ చేశారు. ప్రభుత్వం ఎన్ని కుట్రలు చేసినా.. తన దీక్ష కొనసాగుతుందని ఆమె ప్రకటించారు. వెలుగుమట్లలో ఇళ్లు కూల్చిన చోట బాధితులకు ఇందిరమ్మ ఇళ్లు మంజూరు చేయాలని ఆమె డిమాండ్ చేశారు. అప్పటి వరకు దీక్ష కొనసాగుతుందని పేర్కొన్నారు.
కవిత నిరాహార దీక్ష నేపథ్యంలో జాగృతి కార్యాలయానికి భారీగా ఆమె అనుచరులు, కార్యకర్తలు తరలి వస్తున్నారు. నిరవదిక నిరాహార దీక్ష చేస్తానని ఆమె ప్రకటించడంతో పోలీసులు మరోసారి అరెస్ట్ చేసే అవకాశం ఉంది. దీంతో పెద్ద ఎత్తున కార్యాలయం వద్ద జాగృతి నాయకులు గుమిగూడారు. మరోవైపు పోలీసులు సైతం భారీగా మోహరించారు. ఎలాంటి ఘటనలు చోటు చేసుకోకుండా చర్యలు చేపట్టారు.
ఇది కూడా చదవండి..: Kalvakuntla Kavitha Protest | వెలుగుమట్ల నిర్వాసితులకు కల్వకుంట్ల కవిత మద్దతు.. రోడ్డుపై బైఠాయించి నిరసన
