అక్షరటుడే, కామారెడ్డి: Kamareddy Municipal Controversy | ‘కొత్తగా ఏర్పడిన పాలకవర్గ సభ్యులకు కనీస సమాచారం ఇవ్వరా..? ఇదేనా మాకు మీరిచ్చే గౌరవం..’ అంటూ.. మున్సిపల్ నూతన పాలకవర్గ కౌన్సిలర్లు మున్సిపల్ అధికారుల (Municipal Officers)పై ఆగ్రహం వ్యక్తం చేశారు. ప్రభుత్వం 99 రోజుల పాటు ప్రతిష్టాత్మకంగా చేపట్టిన ప్రజాపాలన-ప్రగతి ప్రణాళిక కార్యక్రమం మొదటిరోజే రసాభాసగా మారింది.
Kamareddy Municipal Controversy | కుర్చీల్లేవు.. సరైన టెంట్ లేదంటూ..
ప్రజాపాలన-ప్రగతి ప్రణాళిక కార్యక్రమానికి శుక్రవారం ఉదయం రావాల్సిందిగా గురువారం రాత్రి మున్సిపల్ కౌన్సిలర్లకు వాట్సాప్ ద్వారా సమాచారం అందించారు. కొంతమందికి వార్డు ఆఫీసర్లు ఫోన్చేసి సమాచారమిచ్చారు. అయితే ఆహ్వానం మేరకు మున్సిపల్ కార్యాలయానికి (Municipal Office) వచ్చిన కౌన్సిలర్లకు సరిపడా కుర్చీలు వేయలేదు. టెంటు కూడా సగం మందికే సరిపోయేలా ఏర్పాటు చేశారు. ఎండలో కుర్చీలు వేసి ఉండడం, టెంట్ సరిగా లేకపోవడం, కౌన్సిలర్ల మాట ఎత్తకుండా సమావేశం ప్రారంభించడం పట్ల కౌన్సిలర్లు ఆగ్రహం వ్యక్తం చేశారు.
Kamareddy Municipal Controversy | కమిషనర్ నిలదీత..
పాలకవర్గం గెలిచాక ఇప్పటివరకు ఒక్క సమావేశమైనా ఏర్పాటు చేసి సమస్యలు తెలుసుకున్నారా అంటూ కమిషనర్ను నిలదీశారు. సమస్యలు చెప్పడానికి వస్తే కనీస స్పందన కూడా ఉండడం లేదని, ఇన్వార్డు సెక్షన్లో ఫిర్యాదు చేస్తే తీసుకునే పరిస్థితి కూడా లేదని మండిపడ్డారు. వార్డుల్లో శానిటేషన్ పరిస్థితి గందరగోళంగా ఉందని, చెత్త వాహనాలు సరిగ్గా రావడం లేదని, ఇలా అయితే ప్రజలకు తాము సమాధానం ఏం చెప్పుకోవాలని ప్రశ్నించారు. ప్రభుత్వ కార్యక్రమానికి అధికారులు కనీస సమాచారం కూడా ఇవ్వరా అంటూ మండిపడ్డారు.
Kamareddy Municipal Controversy | వెనుదిరిగిన బీజేపీ, బీఆర్ఎస్ కౌన్సిలర్లు..
అధికారుల తీరును నిరసిస్తూ బీజేపీ (BJP Councilors), బీఆర్ఎస్ కౌన్సిలర్లు (BRS Councilors) సమావేశంలో పాల్గొనకుండానే వెళ్లిపోయారు. కమిషనర్, ఛైర్పర్సన్ బతిమాలినా వినిపించుకోకుండా సమావేశాన్ని బాయ్కాట్ చేశారు. అనంతరం కాంగ్రెస్ పార్టీకి చెందిన కౌన్సిలర్లు మాత్రమే ఉండగా ఛైర్పర్సన్ ఇప్ప ఉమారాణి ఆధ్వర్యంలో ప్రతిజ్ఞ చేసి కార్యక్రమాన్ని ముగించారు. కార్యక్రమంలో పాల్గొన్న మెప్మా ఆర్పీలకు కనీసం కుర్చీలు కూడా కరువయ్యాయి. కూర్చోవడానికి కుర్చీలు లేకపోవడంతో మున్సిపల్ కార్యాలయం ప్రధాన ద్వారం ముందు కొంతమంది ఆర్పీలు మెట్లపై కూర్చోగా మరికొందరు నిలబడే కార్యక్రమంలో పాల్గొన్నారు.
ఇది కూడా చదవండి..: Praja Palana Health Programs | ప్రజాపాలన ప్రగతి ప్రణాళికలో ఆరోగ్య కార్యక్రమాలు
