అక్షరటుడే,హైదరాబాద్: Kitchen Sponge Bacteria | ఇల్లు ఆరోగ్యంగా ఉండాలంటే వంటిల్లు శుభ్రంగా ఉండాలని మన పెద్దలు చెబుతుంటారు. అందుకే గృహిణులు వంటగదిని తళతళలాడేలా ఉంచుతారు. అయితే, అందరూ నిర్లక్ష్యం చేసే ఒక చిన్న వస్తువు ఇప్పుడు కుటుంబ ఆరోగ్యాన్ని ప్రమాదంలో పడేస్తోంది. గిన్నెలు తోమడానికి మీరు ఉపయోగించే ‘స్పాంజ్’ (Sponge) బ్యాక్టీరియాకు నిలయంగా మారుతోందని ఆరోగ్య నిపుణులు హెచ్చరిస్తున్నారు.
Kitchen Sponge Bacteria | కనిపించని శత్రువు
చాలామంది గిన్నెలు తోమిన తర్వాత స్పాంజ్ను నీళ్లతో కడిగేస్తే సరిపోతుందని భావిస్తారు. కానీ, శాస్త్రీయ నివేదికల ప్రకారం వంటింట్లో అత్యంత ప్రమాదకరమైన క్రిములు ఉండే చోటు ఇదే. స్పాంజ్లో ఉండే తేమ, ఆహార కణాలు , వంటగదిలోని ఉష్ణోగ్రత సూక్ష్మక్రిములు వేగంగా పెరగడానికి దోహదపడతాయి. మీరు ఎంత శుభ్రం చేసినా, దాని లోపలి పొరల్లో ఉండే బ్యాక్టీరియా చనిపోదని పరిశోధనలు చెబుతున్నాయి.
16 రోజుల పాటు జీవించే బ్యాక్టీరియా
‘సైంటిఫిక్ రిపోర్ట్స్’ జర్నల్ ప్రచురించిన అధ్యయనం ప్రకారం, వంటగది స్పాంజ్లు సూక్ష్మజీవులకు ‘హాట్ స్పాట్’గా మారుతున్నాయి. వీటిలో ముఖ్యంగా:
ఈ-కోలి (E. coli),సాల్మొనెల్లా (Salmonella), స్టెఫిలోకాకస్ (Staphylococcus)
వంటి ప్రమాదకర బ్యాక్టీరియాలు దాదాపు 16 రోజుల పాటు స్పాంజ్పైనే జీవించి ఉంటాయి. పాత్రలు కడిగే సమయంలో ఇవి ప్లేట్లు, స్పూన్ల ద్వారా మనం తినే ఆహారంలోకి చేరిపోతాయి.
Kitchen Sponge Bacteria | ఆరోగ్య సమస్యలు ఇవే..
ఈ బ్యాక్టీరియా శరీరంలోకి చేరడం వల్ల విరేచనాలు, వాంతులు, కడుపునొప్పి వంటి జీర్ణసంబంధిత సమస్యలు తలెత్తుతాయి. ముఖ్యంగా రోగనిరోధక శక్తి తక్కువగా ఉన్న పిల్లలు, వృద్ధులపై దీని ప్రభావం ఎక్కువగా ఉంటుంది.
Kitchen Sponge Bacteria | నిపుణులు ఇస్తున్న సూచనలు..
గిన్నెలు తోమే స్పాంజ్లను కనీసం వారం లేదా రెండు వారాలకు ఒకసారి కచ్చితంగా మార్చాలి. వాడిన తర్వాత స్పాంజ్ను నీళ్లు లేకుండా పిండి, గాలి తగిలే చోట ఉంచాలి.
వీలైతే స్పాంజ్లకు బదులుగా కాటన్ క్లాత్స్ లేదా డిష్ బ్రష్లను వాడటం మంచిది, ఎందుకంటే ఇవి త్వరగా ఆరిపోతాయి.
వంటగది శుభ్రత అంటే కేవలం గిన్నెలు మెరవడం మాత్రమే కాదు.. వాటిని శుభ్రం చేసే వస్తువులూ ఆరోగ్యకరంగా ఉండాలి. కాబట్టి, ఇకపై మీ వంటింట్లోని స్పాంజ్ విషయంలో అశ్రద్ధ వహించకండి.
ఇది కూడా చదవండి..: Nosebleeds in Summer | వేసవిలో ముక్కు నుండి రక్తం వస్తోందా? భయపడకండి.. ఈ చిన్న చిట్కాలు పాటిస్తే చాలు!
