అక్షరటుడే, వెబ్డెస్క్: Lavanya Tripathi Harassment | టాలీవుడ్ హీరోయిన్, మెగా ఫ్యామిలీ కోడలు లావణ్య త్రిపాఠికి సోషల్ మీడియాలో వేధింపులు వచ్చాయి. దీంతో ఆమె హైదరాబాద్ సైబర్ క్రైమ్ పోలీసు (Hyderabad Cyber Crime Police) లకు ఫిర్యాదు చేశారు.
నటి లావణ్య త్రిపాఠి (Actress Lavanya Tripathi) పలు సినిమాలతో తెలుగులో గుర్తింపు తెచ్చుకున్న విషయం తెలిసిందే. అనంతరం ఆమె నాగబాబు కుమారుడు, హీరో వరుణ్ తేజ్ను ప్రేమ వివాహం చేసుకున్నారు. అయితే కొంతకాలంగా లావణ్యను ఇన్స్టాగ్రామ్ అకౌంట్ (Instagram Account)లో ఓ వ్యక్తి వేధిస్తున్నాడు. ‘పర్పుల్ క్రెయిన్ 00’ అనే ఖాతా ద్వారా తనపై, తన కుటుంబసభ్యులపై అసభ్య పోస్టులు, కామెంట్లలో దూషణలు చేస్తున్నారని లావణ్య పేర్కొన్నారు. ఈ మేరకు నిందితుడిపై చర్యలు తీసుకోవాలని సైబర్ క్రైమ్ పోలీసులకు ఫిర్యాదు చేశారు.
Lavanya Tripathi Harassment | కేసు నమోదు
తనపై వేధింపులకు పాల్పడుతున్న వ్యక్తిపై చర్యలు తీసుకొని, దూషణలకు పాల్పడిన పోస్టులను తొలగించాలని లావణ్య కోరారు. దీంతో పోలీసులు ఐటీ చట్టం సెక్షన్ 67, BNS 78,79 సెక్షన్ల కింద కేసు నమోదు చేసి దర్యాప్తు చేస్తున్నారు. అకౌంట్ వివరాల ఆధారంగా నిందితుడిని పట్టుకునే ప్రయత్నం చేస్తున్నారు. తనపై అసభ్యకర పోస్టులు పెట్టడంతో పాటు కామెంట్లలో సైతం దూషిస్తున్నారని ఆమె ఆవేదన వ్యక్తం చేశారు. తనను ట్రోల్ చేయడంతో పాటు మార్ఫింగ్ ఫొటోలను పోస్టు చేస్తున్నారని ఆరోపించారు.
Lavanya Tripathi Harassment | రెచ్చిపోతున్న ఆకతాయిలు
సోషల్ మీడియాలో కొందరు ఆకతాయిలు రెచ్చిపోతున్నారు. ఫేక్ అకౌంట్ల ద్వారా యువతులు, మహిళలను వేధిస్తున్నారు. సోషల్ మీడియా (Social Media)లో మహిళలు ఫొటోలు, పోస్టులు పెడితే వాటి కింద అసభ్యకరమైన కామెంట్లు చేస్తున్నారు. అలాగే పలువురు మహిళలకు నిత్యం మెసేజ్లు పంపుతూ వేధింపులకు పాల్పడుతున్నారు. హీరోయిన్లు, నటులను సైతం వీరు వదలడం లేదు. అయితే పోకిరీలపై చాలా మంది ఫిర్యాదు చేయడం లేదు. దీంతో వారు మరింత రెచ్చిపోతున్నారు.
ఇది కూడా చదవండి..: Bellamkonda Srinivas Engagement | అది నిశ్చితార్థం కాదు.. కావ్యమ్మపై ప్రేమని వ్యక్తం చేస్తూ ఆసక్తికర కామెంట్స్ చేసిన బెల్లంకొండ శ్రీనివాస్
