అక్షరటుడే, వెబ్డెస్క్: LB Nagar Hookah Raid | హైదరాబాద్ (Hyderabad) నగరంలో పలువురు యువత వ్యసనాలకు బానిసలు అవుతున్నారు. డ్రగ్స్, గంజాయి వినియోగం భారీగా పెరిగింది. మరోవైపు హుక్కా సెంటర్లు సైతం చాలా చోట్ల నిర్వహిస్తున్నారు. తాజాగా ఎల్బీ నగర్ పరిధిలోని హుక్కా సెంటర్పై పోలీసులు దాడులు చేశారు.
ఎల్బీ నగర్ పోలీస్ స్టేషన్ (LB Nagar Police Station) పరిధిలోని రాజీవ్ గాంధీ నగర్లో హుక్కా సెంటర్ నిర్వహిస్తున్నారనే సమాచారం మేరకు పోలీసులు సోమవారం రాత్రి దాడులు చేశారు. హుక్కా తాగడానికి వచ్చిన 32 మంది కస్టమర్లు, సెంటర్లో పని చేస్తున్న నలుగురు సిబ్బందిని అదుపులోకి తీసుకున్నారు. వారి నుంచి 38 ఫోన్లు, హుక్కా పాట్లు స్వాధీనం చేసుకున్నారు.
LB Nagar Hookah Raid | కఠిన చర్యలు తీసుకుంటాం
ఎల్బీ నగర్ ఏసీపీ కృష్ణయ్య (ACP Krishnayya) మాట్లాడుతూ.. కేఫ్ పేరిట అనుమతులు తీసుకొని హుక్కా సెంటర్ నడుపుతున్నారని తెలిపారు. వివిధ ప్రాంతాల నుంచి ఇక్కడ హుక్కా సేవిస్తున్నారని చెప్పారు. వారిలో విద్యార్థులు, యువత అధికంగా ఉన్నారని పేర్కొన్నారు. ఒక్కొక్కరి నుంచి రూ.800 నుంచి రూ.1200 వరకు వసూలు చేస్తున్నట్లు ఏసీపీ తెలిపారు. మోహన్, సాగర్ అనే ఇద్దరు కలిసి హుక్కా సెంటర్ నిర్వహిస్తున్నారని చెప్పారు. వారు పరారీలో ఉన్నారని, త్వరలో పట్టుకుంటామన్నారు. యువత జీవితాలను నాశనం చేసే ఇలాంటి కేంద్రాలపై కఠిన చర్యలు తీసుకుంటామని హెచ్చరించారు. ఇలాంటి కేంద్రాలకు అద్దెకు ఇస్తే భవనాలను సైతం సీజ్ చేస్తామన్నారు. ఈ ఘటనపై తదుపరి విచారణ కొనసాగుతోందని తెలిపారు.
ఇది కూడా చదవండి..: Rohit Reddy Drugs Case | మాజీ ఎమ్మెల్యే రోహిత్ రెడ్డిపై కేసీఆర్ ఆగ్రహం.. షోకాజ్ నోటీసులు జారీ
