Loan Apps | లోన్​ యాప్స్​కు మరో యువకుడు బలి

అక్షరటుడే, వెబ్​డెస్క్ : Loan Apps | లోన్​ యాప్స్​ ఉచ్చులో చిక్కుకొని మరో యువకుడు బలి అయ్యాడు. అప్పుల బాధతో ఆత్మహత్య చేసుకున్నాడు. ఈ ఘటన ఆంధ్రప్రదేశ్​ (Andhra Pradesh)లోని కాకినాడలో చోటు చేసుకుంది.

ఒడిశాకు చెందిన మహ్మద్​ బషీర్ (22) కాకినాడ జిల్లా (Kakinada District) గండేపల్లి మండలం సూరంపాలెం ఆదిత్య యూనివర్సిటీలో చదువుతున్నాడు. అతడు ఆన్​లైన్​ బెట్టింగ్​కు బానిస అయ్యాడు. దీంతో భారీగా డబ్బులు నష్టపోయాడు. ఈ క్రమంలో పోయిన డబ్బులు తిరిగి రాబట్టుకోవాలని లోన్​ యాప్​ల ద్వారా అప్పులు తీసుకున్నాడు. వాటితో ఆన్​లైన్​ బెట్టింగ్​ (Online Betting) పెట్టగా.. అవికూడా పోయాయి. దీంతో అప్పులు ఎక్కువ కావడంతో వాటిని ఎలా తీర్చలో తెలియక మనోవేదనకు గురయ్యాడు. ఈ క్రమంలో హాస్టల్​ గదిలో ఉరి వేసుకొని ఆత్మహత్య చేసుకున్నాడు.

Loan Apps | మంచి కొడుకుగా ఉండలేకపోయా

బషీర్​ సూసైడ్​ నోట్ ప్రతి ఒక్కరిని కలిచి వేస్తోంది. అమ్మ నన్ను క్షమించు.. మంచి కొడుకుగా ఉండలేకపోయా.. నా కోసం ఎంతో కష్టపడ్డ నీకు మళ్లీ భారాన్ని మిగిల్చాను అంటూ తల్లికి లేఖ రాసి తనువు చాలించాడు. అప్పుల నుంచి బయటపడే మార్గం కనిపించకపోవడంతో ఈ నిర్ణయం తీసుకుంటున్నట్లు పేర్కొన్నాడు. సమాచారం అందుకున్న పోలీసులు ఘటన స్థలానికి చేరుకొని పరిశీలించారు. కేసు నమోదు చేసుకొని దర్యాప్తు చేస్తున్నారు.

Loan Apps | విద్యార్థులే లక్ష్యంగా..

ఆన్​లైన్​ బెట్టింగ్​ను ప్రభుత్వం నిషేధించింది. అయినా కూడా బెట్టింగ్​ జోరుగా సాగుతోంది. అలాగే లోన్​ యాప్​లపై ఆర్బీఐ (RBI) కఠిన ఆంక్షలు అమలు చేస్తున్నా… అనేక యాప్​లు పుట్టుకొస్తున్నాయి. యువత, విద్యార్థులే లక్ష్యంగా ఈ యాప్​లో రుణాలు ఇస్తున్నాయి. సాధారణంగా రుణ సంస్థలు, బ్యాంకులు ఉద్యోగులు, ఆర్థిక భరోసా ఉన్న వారికి అప్పులు ఇస్తాయి. లోన్​ యాప్​లు మాత్రం విద్యార్థులు, యువతకు అడిగినంత లోన్లు ఇస్తున్నాయి. అయితే వాటితో పలువురు బెట్టింగ్​లు, ఆన్​లైన్​ గేమ్స్​, ఇతర జల్సాలు చేస్తున్నారు.

Loan Apps | డబ్బుల కోసం వేధింపులు

అప్పులు తీసుకున్న వారు వాటిని తిరిగి తీర్చలేక అనేక ఇబ్బందులు పడుతున్నారు. లోన్​ యాప్​ల్లో వడ్డీ సైతం అధికంగా ఉంటుంది. తిరిగి చెల్లించకపోతే యాప్​ నిర్వాహకులు వేధింపులకు పాల్పడుతున్నారు. సదరు వ్యక్తి తల్లిదండ్రులు, బంధువులకు ఫోన్​ చేసి తీసుకున్న అప్పు గురించి చెబుతున్నారు. దీంతో పరువు పోతుందని పలువరు ఆత్మహత్యలు చేసుకుంటున్నారు. లోన్ యాప్​లపై కఠిన చర్యలు తీసుకోవాలని ప్రజలు కోరుతున్నారు.
ముఖ్యంగా ఈ మధ్యకాలంలో విద్యార్థులే లక్ష్యంగా సాగుతున్న లోన్ యాప్‌ల వేధింపులు, అధిక వడ్డీలు యువతను బలవన్మరణాలకు ప్రేరేపిస్తున్నాయి. సులభంగా డబ్బు వస్తుందన్న ఆశతో మొదలై, చివరకు అది ప్రాణాలు తీసే స్థాయికి చేరుతుండటం ఆందోళన కలిగిస్తోంది.

ఇది కూడా చదవండి : Markapuram Bus Accident | మార్కాపురం బస్సు ప్రమాదం.. 13కు చేరిన మృతుల సంఖ్య