అక్షరటుడే, ఇందూరు: Manik Bhandar Witchcraft | నిజామాబాద్ జిల్లా మాక్లూరు మండలం మాణిక్ బండార్ గ్రామంలో క్షుద్ర పూజల ఘటనలు కలకలం రేపుతున్నాయి. గత కొంతకాలంగా అర్ధరాత్రి వేళల్లో కొందరు మంత్ర తంత్రాలు ప్రయోగిస్తూ గ్రామస్థులను భయభ్రాంతులకు గురిచేస్తున్నారు.
ఈ మూఢనమ్మకాలతో పాటు మహిళల పట్ల అసభ్యకరంగా ప్రవర్తిస్తున్నారనే ఆరోపణలతో గ్రామస్థులు పెద్ద ఎత్తున నిజామాబాద్ పోలీస్ కమిషనర్ (సీపీ) కార్యాలయానికి తరలివచ్చారు.
Manik Bhandar Witchcraft | అర్ధరాత్రి బలులు:
గ్రామస్థులు తెలిపిన వివరాల ప్రకారం.. గ్రామంలోని కొన్ని ప్రాంతాల్లో.. ముఖ్యంగా అమావాస్య, పౌర్ణమి, గురు, ఆదివారాల్లో అర్ధరాత్రి పూట కొందరు వ్యక్తులు క్షుద్ర పూజలు నిర్వహిస్తున్నారు. ఈ క్రమంలో జంతు బలులతోపాటు వింత అరుపులు వినిపించడంతో స్థానికులకు కంటి మీద కునుకు లేకుండా పోయింది.
గతంలోనూ ఇలాంటి ఘటనలపై పోలీసులకు సమాచారం ఇవ్వగా.. పోలీసులపైకి నిందితులు రాళ్ళు రువ్విన సందర్భాలు సైతం ఉన్నాయని గ్రామస్థులు ఆవేదన వ్యక్తం చేస్తున్నారు.
Manik Bhandar Witchcraft | అసభ్య ప్రవర్తన:
క్షుద్ర పూజలు చేస్తున్న వ్యక్తులు గ్రామంలోని మహిళలు, చిన్న పిల్లల పట్ల అసభ్యకరంగా ప్రవర్తిస్తున్నారని బాధితులు ఆరోపిస్తున్నారు. సెవెంత్ క్లాస్ చదువుతున్న చిన్న పిల్లలకు సైతం అసభ్యకరమైన సందేశాలు పంపిస్తూ వేధిస్తున్నారని ఒక మహిళ మీడియా ఎదుట వాపోయారు. వారి వల్ల మహిళలు, పిల్లలు బయటకు రావాలంటేనే భయపడిపోతున్నారు.
సీపీ హామీ:
గ్రామస్థుల సమస్యపై నిజామాబాద్ సీపీ సాయి చైతన్య స్పందించారు. ఈ ఘటనపై తక్షణమే విచారణ జరిపి నిందితులపై కఠిన చర్యలు తీసుకుంటామన్నారు. గ్రామంలో నిఘాను పెంచాలని పోలీసు అధికారులను ఆదేశించారు. మూఢనమ్మకాల పేరుతో ఎవరైనా ఇబ్బందులకు గురిచేస్తే పోలీసులకు సమాచారం అందించాలని కోరారు.
ఇది కూడా చదవండి: Temple Pradakshina Secrets | గుడిలో ప్రదక్షిణలు చేస్తున్నారా.. అయితే ఈ రహస్యం తెలుసుకోవాల్సిందే!
ఇది కూడా చదవండి: Masik Krishna Janmashtami | మాసిక కృష్ణ జన్మాష్టమి.. ఈ చిన్న నియమాలు పాటిస్తే ఇంట్లో అన్నీ శుభాలే!
