అక్షరటుడే, వెబ్డెస్క్ : Middle East war impact | పశ్చిమాసియా యుద్ధ ప్రభావం అనేక రంగాలపై పడింది. ఇప్పటికే గ్యాస్ (Gas), ఇంధన కొరతతో అనేక దేశాలు ఇబ్బందులు పడుతున్నాయి. తాజాగా కండోమ్ల తయారీపై సైతం దీని ఎఫెక్ట్ పడింది.
ఇరాన్ (Iran), అమెరికా- ఇజ్రాయెల్ మధ్య నెల రోజులుగా యుద్ధం సాగుతున్న విషయం తెలిసిందే. ఇరాన్ హర్ముజ్ జలసంధిని మూసి వేయడంతో పాటు గల్ఫ్ దేశాలపై దాడులు చేస్తోంది. దీంతో ముడి చమురు, గ్యాస్ సరఫరాలో అంతరాయం నెలకొంది. ఇప్పటికే అనేక దేశాలు ఇంధన, గ్యాస్ ధరలు పెంచాయి. అయితే సరఫరా కొరతతో అమ్మోనియా (Ammonia), సిలికాన్ (Silicon) ఆయిల్ వంటి కీలక ముడిసరుకుల ధరలు పెరగడంతో, ఉత్పత్తి, ఆర్డర్ల అమలు దెబ్బతింటున్నాయని కండోమ్ తయారీదారులు అంటున్నారు.
Middle East war impact | ధరలు పెరిగే అవకాశం
హెచ్ఎల్ఎల్ లైఫ్కేర్ లిమిటెడ్, మ్యాన్కైండ్ ఫార్మా లిమిటెడ్, క్యూపిడ్ లిమిటెడ్ సంస్థలు సిలికాన్ ఆయిల్ (పాలిడైమిథైల్సిలోక్సేన్ పిడిఎంఎస్) లభ్యత లేకపోవడం, అమ్మోనియా ధరల పెరుగుదలతో సతమతమవుతున్నాయి. లేటెక్స్ను స్థిరీకరించడానికి, అదనపు ప్రోటీన్లను తొలగించడానికి అమ్మోనియాను ఉపయోగిస్తారు, అయితే సిలికాన్ ఆయిల్ కోటింగ్ కందెనగా పనిచేస్తుంది. దేశంలోని ఒక ప్రముఖ కండోమ్ తయారీ సంస్థకు చెందిన సీనియర్ అధికారి మాట్లాడుతూ ముడిసరుకుల సరఫరా పరిమితులు, ధరల అస్థిరత కారణంగా కండోమ్ల ధరలు పెరిగే అవకాశం ఉందన్నారు.
Middle East war impact | దిగుమతులపై ఆధారం
భారతదేశపు 1.7 బిలియన్ డాలర్ల గర్భనిరోధక మార్కెట్, తన అనహైడ్రస్ అమ్మోనియాలో సుమారు 86 శాతం దిగుమతులపై ఆధారపడి ఉంది. సౌదీ అరేబియా, ఖతార్, ఒమన్ వంటి దేశాల నుంచి దిగుమతి చేసుకుంటుంది. ప్రస్తుతం అమ్మోనియా ధరలు సుమారు 40–50 శాతం మేర పెరిగే అవకాశం ఉందని సమాచారం. అలాగే సిలికాన్ ఆయిల్ ధరలో విపరీతమైన పెరుగుదల మార్కెట్లో అనిశ్చితికి కారణమవుతోంది నిపుణులు పేర్కొంటున్నారు. దీంతో ధరల పెరుగుదల, సరఫరా కొరత నెలకొనే అవకాశం ఉందన్నారు.
దీనిని కూడా చదవండి : Iran Missile Attack | అమెరికా నౌక అబ్రహం లింకన్పై ఇరాన్ దాడి!
