అక్షరటుడే, వెబ్డెస్క్ : Modi YouTube Subscribers | రాజకీయాల్లోనే కాదు.. డిజిటల్ ప్రపంచంలోనూ ప్రధానమంత్రి నరేంద్ర మోదీ ప్రభంజనం కొనసాగుతోంది. ఆయనకు దేశంలోనే కాకుండా విదేశాల్లోనూ చాలామంది అభిమానులున్నారు. దీంతో సామాజిక మాధ్యమాల్లోనూ ఆయన హవా కొనసాగుతోంది. యూట్యూబ్, ఇన్స్టాగ్రామ్, ఎక్స్, ఫేస్బుక్.. ఇలా ప్రతి వేదికలోనూ మోదీదే హవా నడుస్తోంది.
ఆయన ప్రపంచ దేశాధి నేతలందరినీ వెనక్కి నెట్టి సోషల్ మీడియా సామ్రాజ్యంలో అగ్రస్థానంలో కొనసాగుతున్నారు. తాజాగా ప్రముఖ వీడియో స్ట్రీమింగ్ ప్లాట్ఫాం యూట్యూబ్ (YouTube)లో మోదీ చానల్ సబ్స్క్రైబర్ల సంఖ్య 3 కోట్లు దాటింది. దీంతో ఈ వేదికపై ప్రపంచంలోనే అత్యధిక సబ్స్క్రైబర్లు ఉన్న రాజకీయ నేతగా మోదీ రికార్డు సృష్టించారు. ప్రధానమంత్రి నరేంద్ర మోదీ (PM Narendra Modi) 2007లో యూట్యూబ్ చానల్ను ప్రారంభించారు. ఇప్పటివరకు ఆయన 33 వేలకు పైగా వీడియోలను షేర్ చేశారు.
Modi YouTube Subscribers | ట్రంప్ కన్నా ఏడు రెట్లు ఎక్కువ
అంతర్జాతీయ స్థాయిలో ఇతర ప్రముఖులతో పోలిస్తే కూడా ప్రధాని మోదీ ఆధిక్యం స్పష్టంగా కనిపిస్తోంది. బ్రెజిల్ మాజీ అధ్యక్షుడు జైర్ బోల్సోనారో రెండో స్థానంలో(6.6 మిలియన్లు) ఉన్నప్పటికీ, ఆయనకు ఉన్న సబ్స్క్రైబర్లు మోదీ సంఖ్యలో సుమారు నాలుగో వంతు మాత్రమే. కాగా అగ్ర రాజ్యాధిపతి డొనాల్డ్ ట్రంప్ (Donald Trump) కంటే ప్రధాని మోదీకి ఉన్న సబ్స్క్రైబర్ల సంఖ్య ఏడు రెట్లు ఎక్కువ కావడం గమనార్హం. దేశంలోనూ ఇదే తీరు ఉంది. కాంగ్రెస్ అగ్రనేత రాహుల్ గాంధీ (Rahul Gandhi)తో పోలిస్తే మోదీ యూట్యూబ్ చానల్కు దాదాపు మూడింతలు ఎక్కువ మంది సబ్స్క్రైబర్లున్నారు. మోదీ ఎక్స్ ఖాతాకు 106.3 మిలియన్ల ఫాలోవర్లు, ఫేస్బుక్ ఖాతాకు 54 మిలియన్ల ఫాలోవర్లు ఉన్నారు.
Modi YouTube Subscribers | భారీగా ఫాలోవర్లు
సోషల్ మీడియా (Social Media) వేదికలను సమర్థంగా వినియోగించుకోవడం ద్వారా ప్రజలతో నేరుగా మమేకమవడం మోదీ వ్యూహంలో భాగం. ఆయన ప్రసంగాలు, ప్రభుత్వ కార్యక్రమాలు, అంతర్జాతీయ పర్యటనల దృశ్యాలు, ప్రత్యేక సందేశాలు వంటి కంటెంట్ను నిరంతరం అప్లోడ్ చేస్తూ ఉంటారు. దీంతో యూట్యూబ్ మాత్రమే కాకుండా ఇతర సోషల్ మీడియా ప్లాట్ఫామ్లలో కూడా ఆయనకు భారీగా ఫాలోవర్లు ఉన్నారు.
Modi YouTube Subscribers | ఇన్స్టాగ్రామ్లోనూ మోదీ ఫాలోవర్ల సంఖ్య
ఇటీవల ఇన్స్టాగ్రామ్లోనూ మోదీ ఫాలోవర్ల సంఖ్య 10 కోట్లు దాటిన విషయం తెలిసిందే. ఆయన 2014లో ఇన్స్టాగ్రామ్ (Instagram)లో అడుగుపెట్టారు. పుష్కర కాలంలోనే ఫాలోవర్ల సంఖ్య 10 కోట్లు దాటడం గమనార్హం. రాబోయే రోజుల్లో సబ్స్క్రైబర్ల సంఖ్య మరింత పెరిగే అవకాశముంది. కాగా ఇన్స్టాగ్రామ్ ఫాలోవర్ల విషయంలో అమెరికా అధ్యక్షుడు ట్రంప్ రెండో స్థానంలో ఉండగా, ఇండోనేషియా అధ్యక్షుడు ప్రబోవో, బ్రెజిల్ అధ్యక్షుడు లూలా, టర్కీ అధ్యక్షుడు ఎర్డోగాన్ తర్వాతి స్థానాల్లో ఉన్నారు. మోదీకి ఫాలోయింగ్ ఎంతలా ఉందంటే ప్రపంచంలోని తదుపరి ఐదుగురు అగ్రనేతల ఫాలోవర్ల సంఖ్యను కలిపినా మోదీ దరిదాపుల్లో లేకపోవడం గమనార్హం.
ఇది కూడా చదవండి..: HPV Vaccination Launch | హెచ్పీవీ వ్యాక్సినేషన్ ప్రారంభించిన ప్రధాని మోదీ
