అక్షరటుడే, వెబ్డెస్క్: Nitish Kumar Reddy | ఐపీఎల్ 2026 సీజన్లో భాగంగా ఈడెన్ గార్డెన్స్ వేదికగా గురువారం రాత్రి జరిగిన మ్యాచ్లో సన్రైజర్స్ హైదరాబాద్ జట్టు అద్భుత విజయాన్ని నమోదు చేసింది. కోల్కతా నైట్ రైడర్స్పై (Kolkata Knight Riders) 65 పరుగుల తేడాతో గెలిచి ఈ సీజన్లో తొలి విజయాన్ని ఖాతాలో వేసుకుంది.
ఈ మ్యాచ్లో తెలుగు తేజం నితీష్ కుమార్ రెడ్డి బ్యాట్, బాల్ రెండింటితోనూ మెరిసి మ్యాచ్ విన్నింగ్ ప్రదర్శన చేశాడు. 39 కీలక పరుగులు చేయడంతో పాటు బౌలింగ్లో 2 వికెట్లు తీసి జట్టుకు విజయం అందించాడు. ఈ ప్రదర్శనకు గాను అతనికి ‘ప్లేయర్ ఆఫ్ ది మ్యాచ్’ అవార్డు దక్కింది.
Nitish Kumar Reddy | నితీష్ ఎమోషనల్ కామెంట్స్
అవార్డు అందుకుంటూ నితీష్ తన మనసులోని భావాలను పంచుకున్నాడు. గత సీజన్లో తన ఫామ్ కోల్పోవడంతో తీవ్ర ఒత్తిడిని ఎదుర్కొన్నానని చెప్పాడు. పాజిటివ్గా ఉండటానికి చాలా ప్రయత్నించాను. కానీ నా మైండ్ నిండా నెగిటివ్ ఆలోచనలే ఉండేవి. గత ఏడాది నేను నా స్థాయిలో ఆడలేకపోయాను. ముఖ్యంగా బౌలింగ్లో చాలా కష్టపడ్డాను. ఇప్పుడు ఆ కష్టానికి ఫలితం దక్కింది. నన్ను ఫిట్గా ఉంచిన నా ట్రైనర్, ఫిజియోలకు ధన్యవాదాలు” అంటూ భావోద్వేగానికి గురయ్యాడు. మ్యాచ్ విషయానికి వస్తే టాస్ గెలిచిన కోల్కతా నైట్ రైడర్స్ బౌలింగ్ ఎంచుకుంది. ముందుగా బ్యాటింగ్ చేసిన సన్రైజర్స్ హైదరాబాద్ (Sunrisers Hyderabad) ఓపెనర్లు ప్రారంభం నుంచే దూకుడు ప్రదర్శించారు. పవర్ప్లేలోనే 84 పరుగులు బాదడంతో భారీ స్కోరు దిశగా పయనించారు.
Nitish Kumar Reddy | ఐపీఎల్ 2023లో అరంగేట్రం చేసిన నితీష్
ట్రావిస్ హెడ్ 46, అభిషేక్ శర్మ (Abhishek Sharma) 48 పరుగులతో జట్టుకు మంచి ఆరంభం ఇచ్చారు. అనంతరం హెన్రిచ్ క్లాసెన్ 52 పరుగులతో మెరుపులు మెరిపించగా, నితీష్ కీలకంగా 39 పరుగులు జోడించాడు. దీంతో 20 ఓవర్లలో 8 వికెట్ల నష్టానికి 226 పరుగుల భారీ స్కోరు నమోదు చేసింది. భారీ లక్ష్యంతో బరిలోకి దిగిన కోల్కతా నైట్ రైడర్స్ మంచి ఆరంభం ఇచ్చినా, మిడిల్ ఆర్డర్ విఫలమవడంతో గెలుపు దూరమైంది. అంగ్క్రిష్ రఘువంశీ 52, రింకూ సింగ్ (Rinku Singh) 35 పరుగులతో కొంత పోరాటం చేసినా, మిగతా బ్యాట్స్మెన్ విఫలమయ్యారు. చివరికి 16 ఓవర్లలోనే 161 పరుగులకు ఆలౌట్ అయి 65 పరుగుల తేడాతో ఓటమి చవిచూశారు. కాగా, ఐపీఎల్ 2023లో అరంగేట్రం చేసిన నితీష్, 2024లో అద్భుత ప్రదర్శనతో స్టార్గా ఎదిగాడు. అయితే 2025 సీజన్లో ఫామ్ కోల్పోయి విమర్శలు ఎదుర్కొన్నాడు. ఇప్పుడు 2026లో ఈ ప్రదర్శనతో బలమైన కమ్బ్యాక్ ఇచ్చి తన ప్రతిభను మరోసారి నిరూపించాడు.
ఇది కూడా చదవండి..: PSL Ball Tampering | పీఎస్ఎల్ 2026లో బాల్ ట్యాంపరింగ్ కలకలం.. వీడియోలో అడ్డంగా దొరికిన స్టార్ ప్లేయర్
