అక్షరటుడే, వెబ్డెస్క్: Old Pillow Effects | “దిండే కదా.. ఏమవుతుంది?” అని నిర్లక్ష్యం చేస్తే, అది తీవ్రమైన అనారోగ్య సమస్యలకు దారితీస్తుందని ఆరోగ్య నిపుణులు హెచ్చరిస్తున్నారు. పాత దిండు వల్ల వచ్చే నష్టాలు, దానిని ఎప్పుడు మార్చాలో తెలుసుకుందాం..
Old Pillow Effects | అలర్జీలు , శ్వాస సమస్యలు:
మనం నిద్రపోయేటప్పుడు శరీరం నుంచి రాలే మృత చర్మ కణాలు, చెమట, నూనెలు దిండులోకి చేరుతాయి. కాలక్రమేణా అందులో కంటికి కనిపించని దుమ్ము పురుగులు (Dust Mites), బ్యాక్టీరియా పేరుకుపోతాయి. దీనివల్ల ఉబ్బసం (Asthma), అలర్జీలు, తరచూ తుమ్ములు రావడం వంటి శ్వాసకోశ ఇబ్బందులు తలెత్తుతాయి.
Old Pillow Effects | చర్మ సమస్యలు:
ఎన్ని రకాల క్రీములు వాడినా మొటిమలు తగ్గకపోవడానికి పాత దిండు కూడా ఒక కారణం కావచ్చు. దిండులో పేరుకుపోయిన బ్యాక్టీరియా ముఖ చర్మానికి తగిలినప్పుడు ఇన్ఫెక్షన్లు, దద్దుర్లు, మొటిమలు (Acne) వచ్చే ప్రమాదం ఉంది. పాత దిండు కాలక్రమేణా బ్యాక్టీరియాకు నిలయంగా మారుతుందనే విషయాన్ని అస్సలు మర్చిపోకూడదు.
మెడ, వెన్నునొప్పి:
దిండు పాతగా మారే కొద్దీ అది తన ఆకృతిని (Shape) కోల్పోతుంది. లోపల ఉన్న మెటీరియల్ గడ్డలుగా మారడం లేదా మరీ మెత్తగా అయిపోవడం వల్ల నిద్రలో మెడకు, వెన్నెముకకు సరైన సపోర్ట్ లభించదు. ఫలితంగా ఉదయం లేవగానే మెడ నొప్పి, భుజాల నొప్పులు, తీవ్రమైన తలనొప్పి వేధిస్తాయి.
నిద్రలేమి – మానసిక ఒత్తిడి:
దిండు అసౌకర్యంగా ఉంటే నిద్రలో పదే పదే మెలకువ వస్తుంది. సరైన పొజిషన్ దొరక్క అటు ఇటు దొర్లడం వల్ల గాఢ నిద్ర కరవవుతుంది. ఇది దీర్ఘకాలంలో నిద్రలేమి (Insomnia) సమస్యకు, తద్వారా మానసిక ఒత్తిడికి దారితీస్తుంది.
దిండు మార్చే సమయం వచ్చిందని ఎలా తెలుసుకోవాలి?
దిండును మధ్యలోకి మడిచి చూడండి. అది వెంటనే మళ్ళీ పాత స్థితికి రాకపోతే, ఆ దిండు పని అయిపోయిందని అర్థం. దిండుపై పసుపు రంగు మచ్చలు ఏర్పడినా లేదా ఒక రకమైన దుర్వాసన వస్తున్నా వెంటనే మార్చేయాలి. సాధారణంగా ప్రతి ఒకటిన్నర (18 నెలలు) నుంచి రెండేళ్లకు ఒకసారి కొత్త దిండుకు మారడం ఆరోగ్యకరం.
దిండును ప్రతి మూడు నెలలకు ఒకసారి ఎండలో ఉంచడం లేదా ఉతకడం ద్వారా బ్యాక్టీరియాను కొంతవరకు అరికట్టవచ్చు.
ఇది కూడా చదవండి: Diabetes Toothpaste Safety | షుగర్ పేషంట్లు తియ్యగా ఉండే పేస్ట్లు వాడొచ్చా? వాడితే ఏమౌతుంది?
